ខ្សែការពារ ជួន ចាន់ចាវ វះកាត់ដោយជោគជ័យ ពីរបួសធ្ងន់ក្នុងជំនួបទល់នឹងម្ចាស់ផ្ទះ ISI

(ភ្នំពេញ)៖ ខ្សែការពារដ៏សំខាន់របស់ក្រុមភ្នំពេញក្រោន និងជម្រើសជាតិកម្ពុជា ជួន ចាន់ចាវ បានរងរបួសកជើងខាងស្ដាំធ្ងន់ធ្ងរ រហូតតម្រូវឲ្យធ្វើការវះកាត់ភ្លាមៗ ក្រោយប៉ះទង្គិចគ្នា ក្នុងជំនួបទល់ក្រុមម្ចាស់ផ្ទះ ISI ដង្កោសែនជ័យ ក្នុងសប្ដាហ៍ទី១៥ នៃលីគកំពូលកម្ពុជាកាលពីយប់មិញ។

យោងតាមការជូនដំណឹងរបស់ក្រុមការពារតំណែងជើងឯកភ្នំពេញក្រោន នៅព្រឹកថ្ងៃទី២៥ ខែធ្នូនេះ បានបញ្ជាក់ថា ចាន់ចាវ បានធ្វើការវះកាត់ដោយជោគជ័យហើយ ហើយក្លិបក៏បានអរគុណអ្នកគាំទ្របាល់ទាត់ជាតិដែលបានបារម្ភ និងលើកទឹកចិត្តសមាជិករបស់ខ្លួន បន្ទាប់ពីរងរបួសក្នុងការប្រកួតកាលពីយប់មិញផងដែរ។

គួរដឹងថា ជួន ចាន់ចាវ គឺជាសមាជិកដ៏សំខាន់របស់ក្រោន ដែលបានរួមចំណែកជួយក្លិបនាពេលកន្លងមក ពិសេសថ្មីៗនេះ គេទើបរួមចំណែកជួយក្រុមសិង្ហក្រហម បើកទំព័រប្រវត្តិសាស្ដ្រថ្មី ក្នុងការឆ្លងផុតវគ្គចែកពូល និងឡើងទៅកាន់វគ្គពាក់កណ្ដាលផ្ដាច់ព្រ័ត្រប្រចាំតំបន់អាស៊ាន នៃពានរង្វាន់ AFC Cup 2023-24 ដែលត្រូវជួបក្រុមអូស្ដ្រាលី Central Coast Mariners នាពាក់កណ្ដាលខែកុម្ភៈ ឆ្នាំ២០២៤ ខាងមុខ។

ការបង្ហាញខ្លួនដ៏ល្អលើទីលាននេះដែរនាំឲ្យ ចាន់ចាវ ត្រូវបានកោះហៅចូលរួមជាមួយក្រុមជម្រើសជាតិកម្ពុជាជាបន្ដបន្ទាប់ ជាក់ស្ដែងថ្មីៗនេះ រូបគេក៏ត្រូវបានកោះហៅចូលរួមជាមួយក្រុមគោព្រៃ ដើម្បីត្រៀមការប្រកួតមិត្តភាពលក្ខណៈសាកល្បងសមត្ថភាពអន្ដរជាតិជាមួយក្រុមជម្រើសជាតិកាតា នៅទីក្រុងដូហា នាថ្ងៃទី៣១ ខែធ្នូ ឆ្នាំ២០២៣ ចុងសប្ដាហ៍នេះផងដែរ។

ដូច្នេះផ្អែកលើស្ថានភាពរបស់ ជួន ចាន់ចាវ បច្ចុប្បន្នរូបគេទំនងនឹងត្រូវសម្រាករយៈពេលយូរ ដើម្បីព្យាបាលរបួស ហើយក៏មិនអាចជួយជម្រើសជាតិកម្ពុជា ក្នុងការប្រកួតសាកល្បងសមត្ថភាពជាមួយក្រុមជម្រើសជាតិកាតា ក៏ដូចជាជួយក្រុមភ្នំពេញក្រោន ក្នុងការប្រកួតវគ្គពាក់កណ្ដាលផ្ដាច់ព្រ័ត្រប្រចាំតំបន់នៃពានរង្វាន់ AFC Cup 2023-24 នាពេលខាងមុខផងដែរ។ បែបនេះក្ដី អ្នកគាំទ្របានជូនពរ ចាន់ចាវ ឆាប់ជាសះស្បើយ នឹងអាចត្រឡប់ចូលទីលានវិញឆាប់ៗ ដើម្បីជួយក្លិប និងក្រុមជម្រើសជាតិកម្ពុជាបន្ដទៀត។

សូមបញ្ជាក់ដែរថា ចាន់ចាវ បានរងរបួសនៅនាទី៤៨ ស្របពេលក្រុមភ្នំពេញក្រោនបានរក្សាលទ្ធផលស្មើគ្នា ០-០ ជាមួយក្រុមម្ចាស់ផ្ទះ ISI ដង្កោសែនជ័យ។ បន្ទាប់មកទើបកីឡាករ Shimizu Shintaro និង Andres Neito រកបានម្នាក់ ១គ្រាប់ ជួយឲ្យក្រុមសិង្ហក្រហម យកឈ្នះក្រុមកំពុងឡើងជើង ISI ដង្កោសែនជ័យ ក្នុងជំនួបជើងទី២ នេះតែម្ដង៕ ផ្តល់សិទ្ធិដោយ៖ freshnews