Meta រឹតបន្តឹងច្បាប់ផ្សាយពាណិជ្ជកម្ម ដើម្បីទប់ស្កាត់ការបោ.កប្រាស់ផ្នែកហិរញ្ញវត្ថុសំដៅលើប្រជាជនអូស្ត្រាលី
(បរទេស)៖ ម្ចាស់កម្មវិធី Instagram និង Facebook គឺ Meta Platforms បានប្រកាសនៅថ្ងៃចន្ទដើមសប្តាហ៍នេះថា ខ្លួនបានដាក់ចេញនូវច្បាប់តឹងរ៉ឹង សម្រាប់អ្នកផ្សាយពាណិជ្ជកម្មផលិតផល ដើម្បីទប់ស្កាត់ការបោកប្រាស់ផ្នែកហិរញ្ញវត្ថុ ដែលសំដៅលើប្រជាជនអូស្ត្រាលី។ នេះបើតាមការចេញផ្សាយដោយទីភ្នាក់ងារព័ត៌មាន Reuters នៅថ្ងៃទី០២ ខែធ្នូ ឆ្នាំ២០២៤។
ការដាក់ចេញច្បាប់ខាងលើ បានកើតឡើងបន្ទាប់ពីក្រុមហ៊ុន Meta កាលពីខែតុលាបានប្រកាសថា ខ្លួនបានដកការផ្សាយពាណិជ្ជកម្ម ៨,០០០ ដែលគេហៅថា «celeb bait» ជាផ្នែកមួយនៃកិច្ចខិតខំប្រឹងប្រែងជាមួយធនាគារអូស្ត្រាលី ដើម្បីទប់ស្កាត់ការបោកប្រាស់ដែលប្រើរូបភាពរបស់មនុស្សល្បីៗ ដើម្បីបញ្ឆោតអ្នកប្រើប្រាស់ឱ្យផ្តល់ប្រាក់ដល់គម្រោងវិនិយោគក្លែងក្លាយ។ Meta បានប្រកាសថា ឥឡូវនេះអ្នកផ្សាយពាណិជ្ជកម្មនឹងត្រូវបានតម្រូវឱ្យផ្ទៀងផ្ទាត់អ្នកទទួលផល និងអ្នកបង់ប្រាក់របស់ពួកគេ រួមទាំងលេខអាជ្ញាប័ណ្ណសេវាកម្មហិរញ្ញវត្ថុអូស្ត្រាលីរបស់ពួកគេ មុនពេលពួកគេអាចដំណើរការការផ្សាយពាណិជ្ជកម្មសេវាកម្មហិរញ្ញវត្ថុ។
លោក Will Easton នាយកគ្រប់គ្រងក្រុមហ៊ុន Meta ANZ បាននិយាយនៅក្នុងសេចក្តីថ្លែងការណ៍មួយថា «ការណែនាំនៃការផ្ទៀងផ្ទាត់អ្នកផ្សាយពាណិជ្ជកម្មហិរញ្ញវត្ថុ គឺជាជំហានបន្ថែមដ៏សំខាន់មួយឆ្ពោះទៅរកការការពារប្រជាជនក្នុងប្រទេសអូស្ត្រាលី ពីអ្នកបោកប្រាស់ក្នុងសម័យដ៏ទំនើបនេះ»។
គួរជម្រាបថា កាលពីខែមុន រដ្ឋាភិបាលអូស្ត្រាលីបានទម្លាក់ផែនការពិន័យក្រុមហ៊ុនប្រព័ន្ធផ្សព្វផ្សាយតាមអ៊ីនធឺណិតរហូតដល់ ៥% នៃប្រាក់ចំណូលសកលរបស់ពួកគេ ដោយសារការខកខានក្នុងការការពារការផ្សព្វផ្សាយព័ត៌មានមិនពិតតាមអ៊ីនធឺណិត៕ ផ្ដល់សិទ្ធិដោយ៖ Fresh News
