លោក អ៊ាង សុផល្លែត ប្រកាសផ្តល់ផ្កាស្បៃរឿង ជូនអ្នកមានបំណងយក ទៅដាំលំអរលំនៅឋាន និងទីតាំងនានា

(ភ្នំពេញ)៖ លោក អ៊ាង សុផល្លែត ជំនួយការផ្ទាល់របស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជារដ្ឋលេខាធិការក្រសួងបរិស្ថាន ប្រកាសផ្តល់ផ្កាស្បៃរឿងប្រមាណ ១លានទង ជូនដល់អ្នកមានបំណងយកទៅដាំដុះលំអរលំនៅឋាន ឬនៅតាមទីតាំងនានា។

លោក អ៊ាង សុផល្លែត កាលពីពេលថ្មីៗនេះ បានដាំផ្កាស្បៃរឿងដោយផ្ទាល់ដៃ ប្រមាណ ១លានទង ដើម្បីលំអរលំនៅឋានក្នុងថ្ងៃរៀបអាពាហ៍ពិពាហ៍ កូនស្រីរបស់លោក។ បច្ចុប្បន្នផ្កាស្បៃរឿងនេះ បានលូតលាស់យ៉ាងល្អ។

លោក អ៊ាង សុផល្លែត បានគូសបញ្ជាក់ថា ការដែលលោកចែកផ្កាស្បៃរឿងនេះ គឺសង្ឃឹមថា ពូជផ្កានេះនឹងរីកសាយធ្វើឱ្យបរិស្ថានតាមលំនៅឋាន និងតាមផ្លូវសាធារណៈកាន់តែស្រស់បំព្រង។

អ្នកដែលចង់បានផ្កាស្បៃរឿងនេះ ទៅដាំដុះបន្តអាចទៅយកនៅតាមបណ្តោយផ្លូវ៥៩៨ ក្រោមដើមត្នោតរបងផ្ទះលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីរៀបចំដែនដីនគរូបនីយកម្ម និងសំណង់។

លោក អ៊ាង សុផល្លែត បានឱ្យដឹងថា ក្រោយពីការប្រកាសផ្តល់ផ្កានេះហើយ គឺមានប្រជាពលរដ្ឋជាច្រើន បានទៅទាក់ទងយកផ្កា។ ត្រឹមរយៈពេលប្រមាណពីរម៉ោង ផ្កាជាង ២ម៉ឺនគុម្ពត្រូវបានចែកជូនដល់អ្នកមានបំណងយកទៅដាំដុះបន្ត។

ទន្ទឹមនឹងការប្រកាសផ្តល់ផ្កាហើយនោះ លោក អ៊ាង សុផល្លែត ក៏បានចែករំលែកពីរបៀបដាំដុះផ្កានេះផងដែរ។

អំពីផ្កាស្បៃរឿង៖
១. ផ្កាមូលៗ គឺផ្កាក្រពុំដែលនឹងរីក
២. ផ្កាកំពុងរីក
៣. ផ្កាទ្រវែង គឺផ្កាដាក់គ្រាប់ ពេលឡើងខ្មៅហើយ គឺអាចបេះដាំបន្តពូជបាន

វិធីដាំ៖
១. យកគ្រាប់ត្រាំទឹក ១២ម៉ោង
២. សាបលើដីធូៗ
៣. ដកកូនទៅដាំក្នុងថង់ ឬក្នុងរងនៅសប្តាហ៍ទីពីរ
៤. ស្រោចទឹកមួយថ្ងៃពីដង ដាក់ជីកំប៉ុស ឬលាមកគោ សប្ដាហ៍ទី១ ទី៣ ទី៦
៥. ក្តិចត្រួយសប្តាហ៍ទីបី ដើម្បីឱ្យបែកមែក ផ្កាច្រើន
៦. ចាប់ផ្តើមផ្កានៅសប្តាហ៍ទី៧ និងទី៨
៧. ក្នុងករណីចង់ទុឱ្យបានយូរ ក្តិចផ្កាដែលរោយរៀបចេញជាគ្រាប់ ដើម្បីឱ្យបែកមែក និងផ្កាបន្តទៀត៕ ផ្តល់សិទ្ធិដោយ៖ freshnews