រដ្ឋមន្រ្តី ជា វ៉ាន់ដេត ប្រកាសផ្តល់ថវិកា២,០០០ដុល្លារ ដល់កីឡាករ Thiago សញ្ជាតិប្រេស៊ីល

(ភ្នំពេញ)៖ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ នាថ្ងៃទី៨ ខែមេសា ឆ្នាំ២០២៣នេះ បានប្រកាសឧបត្ថម្ភថវិកាចំនួន២,០០០ដុល្លារអាមេរិក ដល់កីឡាករប្រដាល់ Thiago Teixeira សញ្ជាតិប្រេស៊ីល។

ការប្រគល់ប្រាក់ឧបត្ថម្ភនេះគឺជាការលើកទឹកចិត្តចំពោះកីឡាករ Thiago ដែលជានិច្ចកាលតែងតែជួយលើកតម្កើងតម្លៃវប្បធម៌ខ្មែរ ពិសេសគឺក្បាច់គុនខ្មែរផ្សព្វផ្សាយនៅលើឆាកជាតិនិងអន្តរជាតិនាពេលកន្លងមក។

គិតមកដល់ពេលនេះ កីឡាករ Thiago ទទួលបានប្រាក់ឧបត្ថម្ភសរុប២៤,០០០ដុល្លារហើយសម្រាប់ការលើកទឹកចិត្តនេះ ក្នុងនោះសម្ដេចតេជោនាយករដ្ឋមន្ត្រីបានឧបត្ថម្ភចំនួន២០,០០០ដុល្លារ រដ្ឋមន្ត្រីក្រសួងព័ត៌មានឧបត្ថម្ភចំនួន១,០០០ដុល្លារ រដ្ឋមន្ត្រីក្រសួងវប្បធម៌ និងវិចិត្រសិល្បៈចំនួន១,០០០ដុល្លារ ព្រមទាំងរដ្ឋមន្ត្រីក្រសួងប្រៃសណីយ៍ និងទូរគមនាគមន៍ចំនួន២,០០០ដុល្លារទៀត សរុបគឺ២៤,០០០ដុល្លារ។

សម្ដេចតេជោ ហ៊ុន សែន ក៏បានបញ្ជាក់ដែរថា ប្រសិនបើមិនខុសទាស់ផ្នែកផ្លូវច្បាប់ណាមួយរបស់ប្រេស៊ីលទេនោះ សម្ដេចនឹងស្នើទៅព្រះករុណាព្រះមហាក្សត្រនៃព្រះរាជាណាចក្រកម្ពុជា ដើម្បីទ្រង់ព្រះរាជានុញ្ញាតផ្តល់សញ្ជាតិខ្មែរជូនកីឡាករ Thiago នេះ ដើម្បីជាការលើកទឹកចិត្តបន្ថែមចំពោះការលើកតម្កើងតម្លៃវប្បធម៌ខ្មែរ ពិសេសគឺក្បាច់គុនខ្មែរ ផ្សព្វផ្សាយនៅលើឆាកជាតិនិងអន្តរជាតិនាពេលកន្លងមក៕ ផ្តល់សិទ្ធិដោយ៖ freshnews