មន្ត្រីជំនាញចុះត្រួតពិនិត្យស្ថានភាពស្រូវ ដែលរងការបំផ្លាញពីសត្វមមាចត្នោត ដង្កូវមូរស្លឹក និងមុស្សផ្លុងជាង៤០ហិកតា នៅស្រុកស្វាយអន្ទរ ខេត្តព្រវែង

(ព្រៃវែង)៖ មន្ត្រីជំនាញ នៃមន្ទីរកសិកម្ម រុក្ខាប្រមាញ់ និងនេសាទខេត្តព្រៃវែង បានពួតដៃគ្នា ចុះពិនិត្យស្ថានភាពស្រូវដែលរងការបំផ្លាញពីសត្វមមាចត្នោត ដង្កូវមូរស្លឹក និងមុស្សផ្លុង ប្រមាណជាង ៤០ហិកតា ស្ថិតនៅភូមិត្បូងក្តី ឃុំដំរីពួន ស្រុកស្វាយអន្ទរ ខេត្តព្រៃវែង។

ការចុះពិនិត្យស្រូវប្រាំងដែលរងការបំផ្លាញ់ដោយសត្វល្អិតនេះ មានការចូលរួមពីក្រុមប្រឹក្សាឃុំដំរីពួន និងប្រជាកសិករដែលមានស្រែបំផ្លាញពីសត្វល្អិតចង្រៃ កាលពីថ្ងៃទី២២ ខែកុម្ភៈ ឆ្នាំ២០២៤។

លោក អ៊ុក សំណាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រៃវែង បានឱ្យដឹងថា ក្រោយពីចុះពិនិត្យស្រូវ មន្ត្រីជំនាញសង្កេតឃើញថា ស្រូវដែលរងការបំផ្លាញខ្លាំងជាងគេ គឺដង្កូវមូរស្លឹក និងមុសផ្លុង រីឯមមាចត្នោតមិនមានច្រើនដូចការរាយការណ៍នោះទេ។

ជាមួយគ្នានេះលោក អ៊ុក សំណាង បានបញ្ជាក់ថា ដំណោះស្រាយជាបឋម មន្ត្រីជំនាញបានអូសរនាស់បំបែកសំបុកដង្កូវមូរស្លឹក និងបំបាក់ដើមផ្លុង ដើម្បីឱ្យខ្នែងថ្មីដុះឡើងវិញ និងប្រើប្រាស់ប្រេងម៉ាស៊ូតពី ១,៥ ដល់ ២លីត្រ ក្នុង១ហិកតា ព្រមទាំងកាត់បន្ថយការប្រើប្រាស់ពូជស្រូវ និងកាត់បន្ថយការប្រើប្រាស់ជីអ៊ុយរ៉េ កាត់បន្ថយការប្រើថ្នាំពុលកសិកម្មមិនត្រឹមត្រូវនៅពេលមិនទាន់មានសត្វល្អិតចង្រៃនាំឲ្យមានភាពសាំនឹងថ្នាំ។ ក្រៅពីវិធានការទាំងខាងលើនេះ មន្ត្រីជំនាញបានណែនាំបន្ថែម ស្ដីពីការធ្វើឱ្យសត្វល្អិតចង្រៃកើនឡើង និងកត្តាអាកាសធាតុផងដែរ៕ ផ្តល់សិទ្ធិដោយ៖ freshnews