(រតនគិរី)៖ លោក ញ៉ែម សំអឿន អភិបាលខេត្តរតនគិរី បានប្រាប់ភ្នាក់ងារ Fresh News ប្រចាំខេត្តរតនគិរី នៅព្រឹកថ្ងៃទី១ ខែមិថុនា ឆ្នាំ២០២៤នេះថាសម្តេចតេជោ ហ៊ុន សែន ប្រធានព្រឹទ្ធសភា ដែលជាកូនធម៌លោកតា «ជួង» បានឧបត្ថម្ភថវិកាចំនួន ៥មុឺនដុល្លារ ដល់ដំណើរការកែលម្អសោភ័ណភាពនៅរមណីដ្ឋានបឹងកន្សែង។

ក្នុងនាមរដ្ឋបាលខេត្តរតនគិរី លោកបានគោរពថ្លែងអំណរគុណយ៉ាងជ្រាលជ្រៅជាទីបំផុតជូនចំពោះសម្តេចតេជោ ហ៊ុន សែន ដែលសម្តេចបានឧបត្ថម្ភចំនួនទឹកប្រាក់ ៥ម៉ឺនដុល្លារ ក្នុងការរៀបចំបឹងកន្សែង រួមរចនាសម្ព័ន្ធបឹងឱ្យមានសោភ័ណភាពជាទីលំហែរកម្សាន្តរបស់ប្រជាពលរដ្ឋក្នុងខេត្តជាពិសេសអ្នកក្រុងបានលុង និងការទាក់ទាញភ្ញៀវទេសចរជាតិ-អន្តរជាតិ ឱ្យមកកម្សាន្ត នៅខេត្តភាគឦសានទឹកដីក្រហមដ៏សែនមនោរម្យនេះ។

សូមបញ្ជាក់ថា បឹងកន្សែង គឺជាបឹងមួយ នៅកណ្តាលក្រុងបានលុង បឹងនេះមានជម្រៅប្រមាណ៧ម៉ែត្រ នៅរដូវទឹកឡើង មានធារទឹកបិទបើក១ មានផែរឈើ១ (៣០ម៉ែត្រ គុណ១០ម៉ែត្រ) និងមានអាស្រមលោកតាជួង១។ ចុងទសវត្ស៨០ មានការសាងសង់មន្ទីរសុខាភិបាលមួយនៅមាត់បឹងមានរហូតមកដល់សព្វថ្ងៃ។មានផ្លូវបេតុងក្រវាត់៧០% ជុំវិញបឹង ដោយសារថាក្រុងបានលុង មិនមានទីតាំងកម្សាន្តលំហែរ និងស្ថានភាពបឹងមិនស្អាតទើប លោក ញ៉ែម សំអឿន អភិបាលខេត្តរតនគិរី បានរៀបចំបឹងនេះឱ្យមានសោភ័ណភាពសម្រាប់បងប្អូនប្រជាពលរដ្ឋកម្សាន្ត ជាពិសេសពិធីបុណ្យអ៊ុំទូក និងបុណ្យផ្សេងៗ ដោយប្រើថវិកាលោកផ្ទាល់ និងការកៀគរពីសប្បុរសជននានា។

បច្ចុប្បន្នក្រុមការងារកែលម្អ បានកំពុងធ្វើ៖*បារចក សារ៉ាយ កម្ទេចឈើ ប្រមូលសំរាម និងស្តារភក់ដាក់មកលើរួចពង្រាបដាំដើមឈើ និងផ្កា*កំពុងកសាងរូបអក២ (ញី ឈ្មោល) ដើម្បីរំលឹកដល់បទចម្រៀងអធិរាជសំលេងមាសលោក ស៊ីន ស៊ីសាមុត និងសត្វទោមអម១ ចំនួននៅផ្នែកខាងកើត*កសាងដំរី៣ (បា មេ និងកូន) នៅផ្នែកខាងត្បូងបឹង និងកន្លែងអង្គុយកម្សាន្ត*កំពុងកសាងអាស្រមតាជួង ដែលត្រូវជាឪពុកធម៌របស់សម្តេចតេជោ ហ៊ុន សែន ឡើងវិញឱ្យស្អាត នៅទីតាំងដដែល*រៀបសួនសម្រាប់កម្សាន្ត និងហាត់ប្រាណផ្នែកខាងលិច*ដាំឈើ និងផ្កាក្រោយ និងចំហៀងមន្ទីរសុខាភិបាលលើដីដែលស្តារពីបឹង*សង់បន្ទប់ទឹកអនាម័យសាធារណៈ១ (ប្រុស២ ស្រី២ និងក្រឡបត់ជើងតូចបុរស៥)*សំអាត និងពង្រាបដីដាំស្មៅឱ្យទីវាលស្មៅធំលំអដោយផ្កា ដើមឈើ និងសួនមានរូបបេះដូង ទោង…សម្រាប់អង្គុយលេង និងមានកន្លែងរត់កីឡា*បានបំពាក់ឧបករណ៍ហាត់ប្រាណ៤កំប្លេររួចរាល់នៅផ្នែកខាងត្បូង៕ផ្តល់សិទ្ធិដោយ Fresh News