កម្លាំងកងរាជអាវុធហត្ថ ឆ្មក់បង្រ្កាបករណីសារធាតុខុសច្បាប់នៅស្រុកបសេដ្ឋ ខេត្តកំពង់ស្ពឺ ចាប់ខ្លួនជនល្មើសម្នាក់ ដកហូតសារធាតុខុសច្បាប់មួយចំនួន និងកាំភ្លើ.ងខ្លី ២ដើម
(កំពង់ស្ពឺ)៖ កម្លាំងកងរាជអាវុធហត្ថខេត្តកំពង់ស្ពឺ បានសហការជាមួយកម្លាំងកងរាជអាវុធហត្ថខេត្តតាកែវ ឆ្មក់បង្រ្កាបករណីគ្រឿងញៀន និងបានចុះឆែកឆេលំនៅដ្ឋាជនសង្ស័យដែលជាកម្មកររោងចក្រម្នាក់ បានរកឃើញកាំភ្លើងខ្លីចំនួន ២ដេីម រថយន្តពីរគ្រឿង និងម្សៅក្រាមពណ៌សថ្លាសង្ស័យថាជាសារធាតុញៀន ព្រមទាំងវត្ថុតាងមួយចំនួនទៀត។
ប្រតិបត្តិការនេះធ្វើឡើងតាមការចង្អុលបង្ហាញតម្រង់ទិសរបស់ លោកនាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស និងមានការណែនាំដោយផ្ទាល់ពីសំណាក់ លោកបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ ក្រោមការដឹកនាំបញ្ជាដោយផ្ទាល់របស់ លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ និងមានការសម្របសម្រួលនីតិវិធីពី លោក សុិន វីរៈ ព្រះរាជអាជ្ញាអមសាលាដំបូងខេត្តកំពង់ស្ពឺ និង លោក ឯក សេងហួត ព្រះរាជអាជ្ញាអមសាលាដំបូងខេត្តតាកែវ។
កាលពីវេលាម៉ោង ៦:៥០នាទីព្រឹក នាថ្ងៃទី២៩ ខែវិច្ចិកា ឆ្នាំ២០២៥ កម្លាំងមូលដ្ឋានកងរាជអាវុធហត្ថស្រុកបសេដ្ឋ ដឹកនាំដោយ លោកវរសេនីយ៍ត្រី ស៊ូ ប៊ុនរឿន បានសហការជាមួយ កម្លាំងកងរាជអាវុធហត្ថខេត្តតាកែវ ដឹកនាំដោយ លោកអនុសេនីយ៍ឯក ជួន តូរៈនៈ បានឆ្មក់ចុះឆែកឆេលំនៅដ្ឋានជនសង្ស័យឈ្មោះ សែម រក្សា ភេទស្រី អាយុ២៣ឆ្នាំ មុខរបរកម្មកររោងចក្រ រស់នៅភូមិត្មាតលេង ឃុំបសេដ្ឋ ស្រុកបសេដ្ឋ ខេត្តកំពង់ស្ពឺ។
កម្លាំងជំនាញកងរាជអាវុធហត្ថបានរកឃេីញវត្ថុតាងរួមមាន៖ម្សៅក្រាមពណ៌សថ្លា០៣កញ្ចក់ធំ សង្ស័យថាជាសារធាតុញៀន,រថយន្តចំនួន០២គ្រឿង,ម៉ូតូចំនួន០១គ្រឿង,ទូរស័ព្ទចំនួន០១គ្រឿង,កាំភ្លើងខ្លីចំនួន០២ដេីម,បង់ចំនួន០៣(១៨១គ្រាប់) និងសម្ភារប្រេីប្រាស់គ្រឿងញៀនមួយចំនួនថែមទៀត។
បច្ចុប្បន្ន និងវត្ថុតាងត្រូវបានកម្លាំងមូលដ្ឋាកងរាជអាវុធហត្ថស្រុកបសេដ្ឋ ប្រគល់ជូនទៅ កម្លាំងកងរាជអាវុធហត្ថខេត្តតាកែវ ដេីម្បីចាត់ការតាមនីតីវិធីបន្ត៕ ផ្ដល់សិទ្ធិដោយ៖ Freshnews
អត្ថបទទាក់ទង
