សម្តេចតេជោ ហ៊ុន សែន ជំរុញការផលិតសម្ភារៈយោធាក្នុងស្រុកដើម្បីការពារជាតិ និងត្រៀមលក្ខណៈនាំចេញទៅបរទេស

ក្នុងឱកាសអញ្ជើញចុះទស្សនកិច្ចនៅរោងចក្រផលិតឯកសណ្ឋានយោធា DSS ក្នុងខេត្តបាត់ដំបង នាថ្ងៃទី១១ ខែមិថុនា ឆ្នាំ២០២៦ សម្តេចតេជោ ហ៊ុន សែន ប្រមុខរដ្ឋស្តីទីនៃកម្ពុជា បានប្រកាសយ៉ាងច្បាស់ថា ការពង្រឹងសមត្ថភាពផលិតសម្ភារៈយោធារបស់កម្ពុជានាពេលនេះ គឺធ្វើឡើងក្នុងគោលបំណងបម្រើឱ្យវិស័យការពារជាតិ និងកាត់បន្ថយការនាំចូលពីក្រៅប្រទេសតែប៉ុណ្ណោះ ពោលគឺមិនមែនដើម្បីឈ្លានពានប្រទេសណាមួយឡើយ។

សម្តេចបានសង្កត់ធ្ងន់ថា ចាប់តាំងពីមានវត្តមានរោងចក្រ DSS នេះមក កងកម្លាំងយោធា និងនគរបាលជាតិលែងមានការនាំចូលសម្លៀកបំពាក់ ឬអាវក្រោះពីបរទេសដូចមុនទៀតហើយ ដែលនេះជាការជួយសម្រួលដល់ការចំណាយ និងដោះស្រាយបញ្ហាតម្លៃបានយ៉ាងច្រើន។ ក្រៅពីការផ្គត់ផ្គង់តម្រូវការក្នុងស្រុក សម្តេចតេជោ ហ៊ុន សែន ក៏បានបង្ហាញពីផែនការយុទ្ធសាស្ត្រក្នុងការនាំចេញសម្ភារៈយោធាដែលកម្ពុជាផលិតបាន ទៅកាន់ទីផ្សារអន្តរជាតិនៅថ្ងៃខាងមុខផងដែរ។ ទោះជាយ៉ាងណា ការលក់សម្ភារៈទាំងនេះទៅក្រៅប្រទេស នឹងត្រូវធ្វើឡើងតាមរយៈកិច្ចព្រមព្រៀងផ្លូវការជាមួយរដ្ឋាភិបាលនៃប្រទេសដែលមានតម្រូវការតែប៉ុណ្ណោះ ដើម្បីធានាបាននូវសុវត្ថិភាព និងទំនួលខុសត្រូវ។

ជាមួយគ្នានេះ សម្តេចបានបញ្ជាក់ពីគុណភាពខ្ពស់នៃផលិតផលកម្ពុជា ជាពិសេសអាវក្រោះការពារដែលត្រូវបានធ្វើតេស្តគុណភាពយ៉ាងម៉ត់ចត់ដោយនាយករដ្ឋមន្ត្រីផ្ទាល់។ បន្ថែមលើសពីនេះ ការបង្កើតរោងចក្រផលិតសម្ភារៈយោធាក្នុងខេត្តបាត់ដំបង ក៏ជាចំណែកមួយដ៏សំខាន់ក្នុងការបង្កើតការងារជូនដល់ប្រជាពលរដ្ឋ ជាពិសេសពលករដែលបានត្រឡប់មកពីប្រទេសថៃឱ្យមានការងារធ្វើក្នុងស្រុក។ ជាសញ្ញាណវិជ្ជមាននៃឧស្សាហកម្មការពារជាតិនេះ ក្នុងរយៈពេលប្រមាណ ៣ខែចុងក្រោយនេះ រាជរដ្ឋាភិបាលកម្ពុជាបានបញ្ជាទិញឯកសណ្ឋានយោធាពីរោងចក្រ DSS រួចជាស្រេចនូវទឹកប្រាក់សរុបប្រមាណ ៧,៥ លានដុល្លារអាមេរិក ដែលនេះសបញ្ជាក់ឱ្យឃើញពីការគាំទ្រយ៉ាងពេញទំហឹងលើផលិតផលក្នុងស្រុក៕