ព័ត៌មានជាតិ

ក្រុមហ៊ុនមកពីជប៉ុន, ម៉ាឡេស៊ី និងសិង្ហបុរី គ្រោងសាងសង់រោងចក្រកែច្នៃគ្រាប់ស្វាយចន្ទីចំនួន៤កន្លែង នៅខេត្តចំនួន៣របស់កម្ពុជា

BY
Khmerpress
January 15, 2022
ក្រុមហ៊ុនមកពីជប៉ុន, ម៉ាឡេស៊ី និងសិង្ហបុរី គ្រោងសាងសង់រោងចក្រកែច្នៃគ្រាប់ស្វាយចន្ទីចំនួន៤កន្លែង នៅខេត្តចំនួន៣របស់កម្ពុជា

(ភ្នំពេញ)៖ ក្រុមហ៊ុនមកពីប្រទេសជប៉ុន, ម៉ាឡេស៊ី និងសិង្ហបុរី គ្រោងសាងសង់រោងចក្រកែច្នៃគ្រាប់ស្វាយចន្ទីចំនួន៤ ក្នុងខេត្តចំនួន៣ គឺនៅកំពង់ធំ ខេត្តកំពង់ចាម និងខេត្តក្រចេះ នាពេលខាងមុខនេះ ដែលនឹងជំរុញការនាំចេញផលិតផលគ្រាប់ស្វាយចន្ទីសម្រេច ទៅកាន់ទីផ្សារអន្តរជាតិ ដើម្បីបង្កើនតម្លៃបន្ថែមដល់កសិករ។

លោក អួន ស៊ីឡុត ប្រធានសមាគម ស្វាយចន្ទីកម្ពុជា បានប្រាប់បណ្តាញព័ត៌មាន Fresh News នៅថ្ងៃទី១៥ ខែមករានេះថា ក្រុមហ៊ុន TPJ របស់ជប៉ុន ដែលមានគម្រោងសាងសង់រោងចក្រកែច្នៃគ្រាប់ស្វាយចន្ទីនៅខេត្តកំពង់ធំ និងកំពង់ចាម ទទួលការអនុញ្ញាតពីក្រុមហ៊ុនធំប្រចាំ នៅប្រទេសជប៉ុនរួចហើយ ដោយក្រុមហ៊ុននេះ មានគម្រោងសាងសាង់កាលពីខែវិច្ឆិកា ឆ្នាំ២០២០ ក៏ប៉ុន្តែត្រូវផ្អាកទៅវិញ ដោយសារផ្ទុះការរាតត្បាតជំងឺកូវីដ១៩។

លោកបន្តថា បើទោះបីជាការសាងសង់ជាក់លាក់មិនទាន់បានកំណត់ក៏ដោយ ប៉ុន្តែក្រុមហ៊ុនមានបំណងសាងសង់ នៅក្នុងឆ្នាំ២០២២នេះ ដែលអាចនឹងបញ្ចប់ការសាងសងនៅឆ្នាំ២០២៥។ គម្រោងបើករោងចក្ររបស់ក្រុមហ៊ុននេះ ដោយសារតែសិប្បកម្មក្នុងស្រុក ដែលសហការក្នុងផលិតឱ្យក្រុមហ៊ុននេះផ្គត់ផ្គង់ បានតិចមិនទាន់តម្រូវការ។

លោកបន្តថា «តាមពិតទៅក្រុមហ៊ុនជប៉ុនគាត់ ចង់បង្កើតរបស់កម្ពុជាជាបណ្តុំស្វាយចន្ទី សម្រាប់នាំចេញទៅបណ្តាប្រទេសជឿនលឿន ព្រោះស្តង់ដារជប៉ុន ជាស្តង់ដារមួយដែលអឺរ៉ុបទទួលស្គាល់ អីចឹងគាត់អត់ផ្តោតទៅលើជប៉ុនទាំងអស់ទេ គាត់ផ្តោតលើទីផ្សារពិភពលោក ជាពិសេសទីផ្សារប្រទេសអ្នកមាន»។

ដោយឡែក ក្រុមហ៊ុនមួយទៀតរបស់ម៉ាឡេស៊ី ក៏បានសិក្សាគ្រប់ជ្រុងជ្រោយរួចហើយ ក្នុងការសាងសង់រោងចក្រកែច្នៃស្វាយចន្ទីមួយទៀត នៅខេត្តក្រចេះ ។ ចំណែកក្រុមហ៊ុន អូឡាំ របស់ប្រទេសសិង្ហបុរី ដែលមានទីតាំងផលិតនៅវៀតណាមដែរនោះ បានបង្ហាញបំណងសាងសង់រោងចក្រ នៅខេត្តកំពង់ធំមួយទីតាំងផងដែរ។ ប៉ុន្តែដោយសារបញ្ហាកូវីដ១៩ ធ្វើឱ្យក្រុមហ៊ុនផ្អាកសិក្សាគម្រោងសិន តែបន្តទិញគ្រាប់ឆៅ យកទៅកែច្នៃដដែល។

ប្រធានសមាគមរូបនេះបញ្ជាក់ថា មូលហេតុដែលជំរុញឱ្យវិនិយោគិនជ្រើសរើសខេត្តទាំងបី ដោយសារតែខេត្តទាំងបីនេះ ជាត្រីកោណនៃស្វាយចន្នី ដែលមានបណ្តុំកសិករដាំស្វាយចន្នីច្រើនជាងគេ ជាពិសេសនៅខេត្តកំពង់ធំ ឈរនៅលំដាប់ទី១ ដែលមានផ្ទៃដីដាំស្វាយចន្ទីច្រើនជាងគេ។

លោកបានឱ្យដឹងផងដែរថា ក្នុងមួយរោងចក្រនឹងប្រមូលទិញគ្រាប់ស្វាយចន្នី ក្នុងបរិមាណ២ម៉ឺនតោន ក្នុងមួយឆ្នាំសម្រាប់ការកែច្នៃ ប្រសិនបើរោងចក្រទាំង៤ដំណើរការនោះ នឹងប្រមូលទិញពីកសិករប្រមាណពី៨ម៉ឺន ទៅ១០ម៉ឺនតោនក្នុងមួយឆ្នាំៗ សម្រាប់ការនាំចេញទៅទីផ្សារអន្តរជាតិ។

តែទោះជាយ៉ាងក្តីនេះ បើទោះបីជារោងចក្រទាំង៤នេះ ដំណើរការក៏ដោយ ក៏មិនអាចផលិត និងកែច្នៃគ្រាប់ស្វាយចន្ទី តាមតម្រូវការនាំចេញបាននោះទេ ដោយកម្ពុជាត្រូវការយ៉ាងហោចណាស់រោងចក្រចំនួន១០០ ទើបអាចផលិត និងកែច្នៃតាមតម្រូវការបាន ហើយកម្ពុជាបច្ចុប្បន្ននេះ រោងចក្រធំៗដែលកំពុងដំណើការផលិត និងកែច្នៃគ្រាប់ស្វាយចន្ទីនៅកម្ពុជា មានតែ៤ប៉ុណ្ណោះ គឺនៅខេត្តព្រះវិហារ នៅខេត្តត្បូងឃ្មុំ រតនគិរី និងមួយទីតាំងទៀតនៅខេត្តសៀមរាប ខណៈឆ្នាំ២០២១នេះ កម្ពុជាបាននាំចេញគ្រាប់ស្វាយចន្ទីឆៅប្រមាណ១លាន១ម៉ឺនតោនទៅប្រទេសវៀតណាម ។

«កាលណាយើងមានរោងចក្រ នៅក្នុងស្រុកយើង ទី១ ជួយបង្កើនតម្លៃបន្ថែមដល់កសិករយើង មានន័យថា កសិករលក់បានតម្លៃស្ថេរភាពមួយ អត់ដូចបច្ចុប្បន្នទេ។ បច្ចុប្បន្នគឺឈ្មួញក្រឡុកបានតាមចិត្ត អីចឹងបើគាត់មានរោងចក្រគាត់ អាចផលិតគ្រាប់ស្វាយចន្ទីតម្រូវស្តង់ដារ រោងចក្រលក់ក្នុងតម្លៃមួយល្អបំផុត ។ ផលប្រយោជន៍មួយទៀត គឺសម្រាប់បង្កើតការងារដល់ពលករ»។ លោក អួន ស៊ីឡុត លើកឡើងបន្ថែម។

ដោយសារតែវិបត្តិជំងឺកូវីដ១៩ តម្លៃគ្រាប់ស្វាយចន្ទីស្រស់ បានធ្លាក់ថ្លៃពីរឆ្នាំជាប់គ្នាៗ ប៉ុន្តែនៅឆ្នាំ២០២១ តម្លៃគ្រាប់ឆៅឡើងបន្តិច ដល់៣០០០រៀលក្នុងមួយគីឡូ ដែលធ្វើឱ្យកសិករគ្មានឃ្លាំងស្តុកទុកមានការខាតបង់។ នាអំឡុងខែកញ្ញាឆ្នាំ២០២១ គ្រាប់ស្វាយចន្ទីស្ងួត បានចាប់ផ្តើមឡើងថ្លៃបន្តិចវិញ។ តម្លៃគ្រាប់ស្វាយចន្ទីនាពេលបច្ចុប្បន្ននេះ សម្រាប់គ្រាប់ស្ងួតដែលជាប្រភេទគ្រាប់លេខ១ មានតម្លៃ៥៨០០រៀលក្នុងមួយគីឡូ និងប្រភេទគ្រាប់ដីមានតម្លៃ៤២០០រៀល ក្នុងមួយគីឡូ។

តាមរបាយការណ៍របស់សមាគមស្វាយចន្ទីកម្ពុជា ផ្ទៃដីដាំដុះស្វាយចន្ទីមានចំនួនជាង៤៩ម៉ឺនហិកតា ប៉ុន្តែសមាគមនេះ ប៉ាន់ប្រមាណថាអាចមានរហូតដល់៨០ម៉ឺនហិកតា។ ស្វាយចន្ទីដាំដុះច្រើនជាងគេ នៅខេត្តចំនួន១០ គឺ កំពង់ធំ ខេត្តរតនគីរី ខេត្តកំពង់ចាម មណ្ឌលគិរី ត្បូងឃ្មុំ ស្ទឹងត្រែង សៀមរាប ក្រចេះ កំពង់ឆ្នាំង និងខេត្តព្រះវិហារ។

តាមរបាយការណ៍ក្រសួងកសិកម្ម ក្នុងឆ្នាំ២០២១ កម្ពុជានាំចេញគ្រាប់ស្វាយចន្ទី បានជាង ៩៣ ៧៩៧៤ តោន កើនឡើងចំនួន ៣២៨.៣៤% ក្នុង នាំចេញទៅប្រទេសវៀតណាមចំនួន ៩២៨ ៩២៦តោន ប្រទេសចិនចំនួន ៤ ៥៥២តោន ប្រទេសថៃចំនួន ៤ ២៩៧តោន ប្រទេសឥណ្ឌាចំនួន ៩៨តោន ប្រទេសជប៉ុនចំនួន ៤៤តោន ប្រទេសកូរ៉េចំនួន ២១តោន ប្រទេស អារ៉ាប់ចំនួន ១៤តោន ប្រទេសណេដឺឡែនចំនួន៨តោន ប្រទេសបង់ក្លាដែសចំនួន៧តោន និងប្រទេសឡាវចំនួន៤តោន រួមនឹងប្រទេសផ្សេងទៀត។ ការនាំចេញគ្រាប់ឆៅ ឬគ្រាប់ស្រស់មានជាង៥០ភាគរយ៕ ផ្តល់សិទ្ធិដោយ៖ freshnews

Share This Post: