បាក់មុខខ្មែរយើងណាស់! YouTuber ខ្មែរម្នាក់យកស្បែកជើងផ្ទាត់ជ្រលក់អំបិលម្ទេសហើយទទួលទាន ឥលូវនេះលើបណ្តាញសង្គមថៃ នាំគ្នាបញ្ចេញមតិហួសចិត្ត
ថៃ៖ កាលពីពេលថ្មីៗនេះ មានការចុះផ្សាយជាព័ត៌មាននៅប្រទេសថៃ ក្រោយបុរសនារីជនជាតិខ្មែរមួយគូបានថតវីដេអូ «ទទួលទានស្បែកជើងផ្ទាត់ជ្រលក់អំបិលម្ទេស» បង្ហាញជូនដល់អ្នកគាំទ្រដែលបានសំណូមពរអោយធ្វើ Challenge មួយនេះ។ ក្រោយពីវីដេអូខាងលើបានផុសចូលទៅក្នុងសង្គមអនឡាញ ហាក់បីដូចជាទទួលបានការគាំទ្រ និងរិះគន់ផងដែរ។
ដោយកន្លងមកតាមរយៈគណនីហ្វេសប៊ុកដែលមានឈ្មោះថា Jin Su តែងថតវីដេអូបង្ហាញអំពីការទទួលទានរបស់ចម្លែកៗជាច្រើនដូចជា៖ ម្រះឆៅ ត្រប់ ស្ពៃក្តោម ដូង ល្ពៅ រឺម្នាស់ ទាំងដែលមិនបានបករឺចិតសំបកចេញជាមួយនឹងអំបិលម្ទេស។ ដោយថ្មីៗនេះ គណនី Jin Su បានបង្ហោះវីដេអូ ទទួល Challenge ពីអ្នកគាំទ្រ គឺការ«ទទួលទានស្បែកជើងផ្ទាត់ជាមួយអំបិលម្ទេស» ប៉ុន្តែនៅក្នុងឃ្លីបវីដេអូនេះដែរក៏មានអក្សរបញ្ជាក់ប្រាប់ថា «ការទទួលទាននៅក្នុងវីដេអូខាងលើនេះគ្រាន់តែជាការសម្តែងតែប៉ុណ្ណោះហាមត្រាប់តាមដាច់ខាត»។
វីដេអូឃ្លីបមួយនេះ បានក្លាយជាប្រធានបទដ៏ពេញនិយម ដែលមានអ្នកចូលមើល 20 លានដង ជាង 1.3 ម៉ឺននាក់ចូលចិត្ត (like) បូករួមទាំងអ្នកនិយមលេងអ៊ីនធឺណែតជាច្រើនបាននាំគ្នាចូល Comment ថែមទាំងមានមនុស្សជាច្រើនបានឲ្យនាងជ្រលក់ទឹកម្ទេស និងរបស់ប្លែកៗដូចជា កង្ហា ខោអាវ ស្ករ ម្រេច ឥដ្ឋ ថ្ម ឬសំបកកង់ ជាដើម។ យ៉ាងណាមិញ ឃ្លីបនោះបានធ្វើឲ្យអ្នកលេងអ៊ីនធឺណិតមួយចំនួនមិនសើចនោះទេ ថែមទាំងសំណូមពរអោយនាងឈប់ញ៉ាំអ្វីដែលមិនមែនជាអាហារ។ អ្នកខ្លះថាវាជាទង្វើមិនសមរម្យ ព្រោះមានការព្រួយបារម្ភចំពោះកុមារ និងយុវជនអាចនឹងយកតម្រាប់តាមបាន ចំណែកឯក្រុមអ្នកគាំទ្រក៏បានសុំឱ្យនាងត្រឡប់ទៅរកមាតិកាធ្វើម្ហូបឬបរិភោគផ្លែឈើដូចជាធម្មតាវិញ៕
https://youtu.be/G9ITPi7RKo4
អត្ថបទ៖ Bee
ប្រភព៖ sanook