កីឡាការិនី U19 ឈិត សាភឿន ដែលស៊ុតបញ្ចូលទី២គ្រាប់ យកឈ្នះក្រុមជម្រើសជាតិឡាវ បានដួលបាក់ដៃឆ្វេង, នាយឧត្ដមសេនីយ៍ សៅ សុខា ឧបត្ថម្ភទាំងស្រុងចំពោះការព្យាបាល និងវះកាត់

(ឥណ្ឌូនេស៊ី)៖ កីឡាការិនី ឈិត សាភឿន ពាក់លេខ១៥ ដែលបានស៊ុតបញ្ចូលទី២គ្រាប់ម្នាក់ឯង ធ្វើឲ្យក្រុមបាល់ទាត់នារីជម្រើសជាតិកម្ពុជា អាយុក្រោម១៩ឆ្នាំ យកឈ្នះក្រុមជម្រើសជាតិឡាវ ក្នុងពានរង្វាន់ AFF U19 Women’s Championship 2023 បានជួបគ្រោះថ្នាក់ដួលបាក់ដៃឆ្វេង និងកំពុងសម្រាកព្យាបាលវះកាត់ នៅមន្ទីរពេទ្យ​ប្រទេសឥណ្ឌូនេស៊ី។

នេះបើតាមការបញ្ជាក់ពីនាយឧត្ដមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជា ប្រាប់មកបណ្ដាញព័ត៌មាន Fresh News នៅថ្ងៃទី០៦ ខែកក្កដា ឆ្នាំ២០២៣។

ទន្ទឹមគ្នានេះនាយឧត្ដមសេនីយ៍ សៅ សុខា បានយកចិត្ដទុកដាក់ និងឧបត្ថម្ភទាំងស្រុងចំពោះការព្យាបាលកីឡាការិនី ឈិត សាភឿន រូបនេះផងដែរ។ កីឡាការីនី ឈិន សាភឿន​ មកពីក្លឹបបាត់ទាត់ព្រះខ័នរាជស្វាយរៀង ដែលចេញមកពីវិទ្យាល័យ ហ៊ុន សែន ជ្រៃធំ ក្នុងឃុំជ្រៃធំ ស្រុករមាសហែក ខេត្តស្វាយរៀង។

សូមរំលឹកថា ក្រុមបាល់ទាត់នារីជម្រើសជាតិអាយុក្រោម ១៩ឆ្នាំកម្ពុជា យកបាន ៣ពិន្ទុដំបូង ក្រោយឈ្នះឡាវ ២-១ បើកឆាកពានរង្វាន់ AFF U19 Women’s Championship 2023 នាថ្ងៃទី០៥ ខែកក្កដានេះ ក្នុងជំនួបបើកឆាកពានរង្វាន់បាល់ទាត់នារីអាយុក្រោម ១៩ឆ្នាំប្រចាំតំបន់អាស៊ីអាគ្នេយ៍ ឆ្នាំ២០២៣ (AFF U19 Women’s Championship 2023) នៅប្រទេសឥណ្ឌូនេស៊ី។

នេះគឺជាការប្រកួតដំបូងរបស់ក្រុមបាល់ទាត់នារី U19 កម្ពុជា ក្នុងពូល A ដែលមានបេក្ខភាព ៤ក្រុម រួមមានកម្ពុជា ឡាវ ទីម័រខាងកើត និងម្ចាស់ផ្ទះឥណ្ឌូនេស៊ី ហើយក៏ជាការយកបាន ៣ពិន្ទុដំបូងយ៉ាងសំខាន់របស់ក្រុមនារី U19 កម្ពុជា ក្នុងការប្រកួតប្រជែងនៅសល់ ២លើកទៀត ដែលស្ថិតក្រោមការដឹកនាំដោយលោក ប្រាក់ វុទ្ធី ។

គួរដឹងថា ព្រឹត្តិការណ៍នេះ គឺមាន ១០ក្រុមចូលរួម និងបែងចែកជា ៣ពូល ខណៈ ២ពូលទៀត មានតែ ៣ក្រុមប៉ុណ្ណោះក្នុងមួយពូល ក្នុងនោះពូល B មានវៀតណាម ម៉ាឡេស៊ី និងសិង្ហបុរី និងពូល C មានថៃ មីយ៉ាន់ម៉ា និងហ្វីលីពីន។

ចំពោះកម្មវិធីប្រកួតរបស់ក្រុមកម្ពុជា បន្ទាប់ពីជួបឡាវ នឹងត្រូវជួបក្រុម U19 ទីម័រខាងកើត នាថ្ងៃទី៧-កក្កដា មុនប្រកួតចុងក្រោយក្នុងពូល ជាមួយក្រុមម្ចាស់ផ្ទះឥណ្ឌូនេស៊ី នាថ្ងៃទី០៩ ខែកក្កដា ឆ្នាំ២០២៣ ខាងមុខ៕ ផ្តល់សិទ្ធិដោយ៖ freshnews