សករាជថ្មី! ក្រុមជម្រើសជាតិកម្ពុជា ផ្ដល់កៅអីសម្រាប់កីឡាករបរទេសលើកដំបូង គឺកីឡាករជប៉ុន Yudia Ogawa

(ភ្នំពេញ)៖ សហព័ន្ធកីឡាបាល់ទាត់កម្ពុជា បានប្រកាសស្វាគមន៍កីឡាករជនជាតិជប៉ុន Yudai Ogawa សមាជិកក្លិបភ្នំពេញក្រោន ចូលរួមជាមួយក្រុមជម្រើសជាតិកម្ពុជា។ នេះជាលើកដំបូងហើយ ដែលក្រុមជម្រើសជាតិកម្ពុជា ផ្ដល់កៅអីសម្រាប់កីឡាករបរទេស។

យោងតាមទំព័រហ្វេសប៊ុកផ្លូវការរបស់សហព័ន្ធដែលបានប្រកាសនៅព្រឹកថ្ងៃសុក្រនេះបានបញ្ជាក់ថា «សករាជថ្មីនៅលើទឹកដីអង្គរ! ស្វាគមន៍កីឡាករ Yudai Ogawa មកកាន់ក្រុមជម្រើសជាតិកម្ពុជា។ ជូនពរជោគជ័យលើវិថីបាល់ទាត់ជាមួយក្រុមជម្រើសជាតិយើង»។

តាមរយៈការប្រកាសជាសាធារណៈនេះ មានន័យថា Yudai Ogawa បានក្លាយជាកីឡាករបរទេសចូលសញ្ជាតិដំបូង ដែលបានចូលរួមជាមួយក្រុមជម្រើសជាតិកម្ពុជា ដើម្បីត្រៀមការប្រកួតអន្ដរជាតិនានា ពិសេសការប្រកួតពានរង្វាន់ FIFA World Cup 2026 វគ្គជម្រុះជុំទី២ រវាងក្រុមគោព្រៃកម្ពុជា និងប៉ាគីស្ថាន នាថ្ងៃទី១២ និងថ្ងៃទី១៧ ខែតុលា ឆ្នាំ២០២៣ ខាងមុខ៕ ផ្តល់សិទ្ធិដោយ៖ freshnews