(ប៉េកាំង)៖ នៅថ្ងៃពុធនេះ នាយករដ្ឋមន្រ្តីថៃ លោក សេដ្ឋា ថាវីស៉ីន បានឱ្យដឹងថា រូបលោកបានអញ្ជើញប្រធានាធិបតីរុស្ស៉ី លោក វ៉្លាឌីមៀ ពូទីន ឱ្យទៅបំពេញទស្សនកិច្ចផ្លូវការនៅប្រទេសថៃ នាឆ្នាំក្រោយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃពុធ ទី១៨ ខែតុលា ឆ្នាំ២០២៣។

លោក សេដ្ឋា និងលោក ពូទីន បានជួបគ្នានៅក្រៅវេទិកាស្តីពីគំនិតផ្តួចផ្តើមខ្សែក្រវាត់និងផ្លូវ កាលពីយប់ថ្ងៃអង្គារសប្តាហ៍នេះ ហើយជជែក​អំពីការជំរុញចំណងទាក់ទង ផ្នែកពាណិជ្ជកម្មនិងវប្បធម៌។ នៅថ្ងៃពុធនេះ លោកនាយករដ្ឋមន្រ្តីថៃ បានឱ្យដឹងយ៉ាងដូច្នេះថា «ខ្ញុំបានអញ្ជើញ​លោក ពូទីន ឱ្យបំពេញទស្សនកិច្ចមកកាន់ប្រទេសថៃ នៅឆ្នាំ២០២៤»។ យោងតាមសេចក្តីថ្លែងការណ៍របស់រដ្ឋាភិបាលថៃ លោក ពូទីន បានទទួលយកការអញ្ជើញនោះ ប៉ុន្តែពុំទាន់មានការកំណត់កាលបរិច្ឆេទច្បាស់លាស់នៅឡើយទេ។

គួរបញ្ជាក់ថា កាលពីខែមីនា ឆ្នាំនេះ តុលាការព្រហ្មទណ្ឌអន្តរជាតិ ICC បានចេញដីកាបង្គាប់ឱ្យចាប់ខ្លួនលោក ពូទីន ជុំវិញការចោទប្រកាន់ ​អំពីឧក្រិដ្ឋកម្មសង្រ្គាមនៅអ៊ុយក្រែន។ កាលពីឆ្នាំមុន ថៃបានចូលរួមជាមួយចិននិងឥណ្ឌា ផ្តល់សំឡេងអនុបវាទនៅក្នុងការបោះឆ្នោតមួយ របស់​មហាសន្និបាតនៃអង្គការសហប្រជាជាតិ ដែលថ្កោលទោសការដែលរុស្ស៉ីប្រកាសកាត់យកទឹកដីរបស់អ៊ុយក្រែន​ ដែលស្ថិតក្រោមការកាន់កាប់របស់កងទ័ពរុស្ស៉ី៕ ផ្តល់សិទ្ធិដោយ៖ freshnews