(បរទេស)៖ នាយកប្រតិបត្តិក្រុមហ៊ុនផលិតរថយន្តអគ្គិសនីអាមេរិក Telsa លោក Elon Musk បង្ហាញពីការយល់ឃើញរបស់លោកថា ក្រុមហ៊ុនផលិតរថយន្តអគ្គិសនីចិន ច្បាស់ណាស់នឹងទទួលបានភាពជោគជ័យខ្លាំង ក្នុងទីផ្សារនៃបណ្តាប្រទេសនានាក្រៅពីចិន ខណៈក្រុមហ៊ុន Telsa របស់លោកកំពុងតែមានគូប្រជែងកាន់តែច្រើន។ នេះបើតាមការចេញផ្សាយដោយសារព័ត៌មាន CNBC នៅថ្ងៃទី២៦ ខែមករា ឆ្នាំ២០២៤។

និយាយនៅថ្ងៃពុធកន្លងទៅនេះ ដែលជាថ្ងៃប្រកាសប្រាក់ចំណូលក្រុមហ៊ុន លោក Elon Musk បានឲ្យដឹងថា «ក្រុមហ៊ុន​រថយន្ត​ចិន ​ជា​ក្រុមហ៊ុន​រថយន្ត​ដែល​មាន​ការ​ប្រកួត​ប្រជែង​បំផុត​ក្នុង​ពិភពលោក។ ដូច្នេះ ខ្ញុំ​គិត​ថា ពួកគេ​នឹង​ទទួល​បាន​ជោគជ័យ​យ៉ាងខ្លាំង​នៅតាមទីផ្សារនានា ​ក្រៅ​ពីប្រទេស​ចិន បើទោះបីជាត្រូវបង់ពន្ធ​ឬមាន​របាំង​ពាណិជ្ជកម្មផ្សេងៗក្តី»។ មហាសេដ្ឋីរូបនេះបានសង្កត់ធ្ងន់ថា «និយាយដោយត្រង់ទៅ ខ្ញុំគិតថា ប្រសិនបើមិនមានរបាំងពាណិជ្ជកម្ម ត្រូវបានបង្កើតឡើងទេ ពួកគេនឹងបំផ្លាញក្រុមហ៊ុនគូប្រជែងភាគច្រើនផ្សេងទៀតនៅក្នុងពិភពលោក»។

របាំងពាណិជ្ជកម្ម ដែល Elon Musk និយាយនៅពេលនេះ ​គឺទំនងជាសំដៅដល់ការរឹតបន្តឹងផ្លូវច្បាប់លើការនាំចេញរថយន្តអគ្គីសនីចិន ទៅតាមបណ្តាប្រទេសនានា ជាក់ស្តែង គណៈកម្មការអឺរ៉ុប ដែលជាស្ថាប័នប្រតិបត្តិរបស់សហភាពអឺរ៉ុប បច្ចុប្បន្នកំពុងស៊ើបអង្កេត លើក្រុមហ៊ុនផលិតរថយន្តអគ្គិសនីនៅក្នុងប្រទេសចិន។ ការ​ស៊ើបអង្កេត​នេះ​ បាន​ចាប់​ផ្តើម​កាលពី​ឆ្នាំ​មុន ហើយ​មិន​ទាន់​ត្រូវ​បាន​គេ​សន្និដ្ឋាន​ថាយ៉ាងណាឲ្យពិតឡើយ​។ ប៉ុន្តែមានឱកាស ដែលសហភាពអឺរ៉ុបអាចពិចារណាការដំឡើងពន្ធខ្ពស់លើរថយន្តអគ្គិសនីរបស់ចិន ស្របពេលដែលផលិតផលរបស់ចិនកំពុងពង្រីកខ្លួនយ៉ាងខ្លាំងក្លាទៅកាន់ទីផ្សារអឺរ៉ុប។

គួរជម្រាបថា នេះមិនមែនជាលើកទីមួយទេ ដែលលោក Musk នាយកប្រតិបត្តិក្រុមហ៊ុន Tesla បង្ហាញការកោតសរសើរលើក្រុមហ៊ុនផលិតរថយន្តអគ្គិសនីរបស់ចិន។ កាលពីឆ្នាំមុន មហាសេដ្ឋីរូបនេះបានហៅក្រុមហ៊ុនផលិតរថយន្តអគ្គិសនីចិនថាជា «ការប្រកួតប្រជែងបំផុតនៅក្នុងពិភពលោក» ហើយបាននិយាយថា ក្រុមហ៊ុនចិនទំនងជាស្ថិតក្នុងចំណោមក្រុមហ៊ុនរថយន្តកំពូលរបស់ពិភពលោក៕ ផ្តល់សិទ្ធិដោយ៖ freshnews