BREAKING: រដ្ឋបាលខេត្តព្រះសីហនុ សម្រេចដាក់ភូមិ១,២,៣, ៤, ៥ នៃសង្កាត់លេខ៤ ជាតំបន់ក្រហម

(ព្រះសីហនុ)៖ រដ្ឋបាលខេត្តព្រះសីហនុ បានសម្រេចដាក់ភូមិចំនួន៥ រួមមាន៖ ភូមិលេខ១ លេខ២ លេខ៣ លេខ៤ និងលេខ៥ នៃសង្កាត់លេខ៤ ជាតំបន់ក្រហម ដោយហាមផ្តាច់មិនឱ្យមានការចេញពីផ្ទះ បន្ទាប់ពីទាំងនេះផ្ទុះការឆ្លងខ្លាំងនៃជំងឺកូវីដ១៩។

ក្នុងសេចក្តីសម្រេចដែល Fresh News ទទួលបាន រដ្ឋបាលខេត្តបានបញ្ជាក់ថា ក្នុងកំលុងពេលដាក់ជាតំបន់ក្រហមនេះ បុគ្គលគ្រប់រូបត្រូវបានហាមឃាត់មិនឱ្យធ្វើដំណើរចេញពីលំនៅឋាន ឬទីសំណាក់បច្ចុប្បន្នរបស់ខ្លួនដោយរួមទាំងការ មិនអនុញ្ញាតឱ្យធ្វើសកម្មភាពកីឡានៅខាងក្រៅលំនៅឋាន ឬទីសំណាក់របស់ខ្លួននោះឡើយ លើកលែងតែការធ្វើដំណើរក្នុងមូលហេតុសុខភាពបន្ទាន់ និងការធ្វើដំណើរទៅជួបមន្ត្រីសុខាភិបាល ដើម្បីយកសំណាកទៅវិភាគរកមេរោគកូវីដ- ១៩ ឬចាក់វ៉ាក់សាំងការពារជំងឺកូវីដ-១៩ ដួសទី២ នៅទីតាំងជិតបំផុតក្នុង «តំបន់ក្រហម» តាមការកំណត់ និង ដោយមានការអនុញ្ញាតពីអាជ្ញាធរមានសមត្ថកិច្ច។

ជាមួយគ្នានេះ ផ្សារ និងទីកន្លែងលក់ម្ហូបអាហារ និងគ្រឿងឧបភោគបរិភោគ ព្រមទាំងសកម្មភាពការងារ មុខរបរ និងអាជីវកម្មទាំងអស់នៅក្នុង «តំបន់ក្រហម» ត្រូវផ្អាកជាបណ្តោះអាសន្នផងដែរ។ លើកលែងតែសកម្មភាពការងារមួយចំនួនដូចជា៖ សេវាពន្លត់អគ្គីភ័យ, សេវាផ្គត់ផ្គង់អគ្គិសនី, សេវាផ្គត់ផ្គង់ទឹកស្អាត, សេវាសង្គ្រោះបន្ទាន់ និងសេវាសុខាភិបាលទាំងរដ្ឋនិងឯកជន ដោយរួមទាំងឱសថស្ថានផង, ទីតាំងផលិត និងផ្គត់ផ្គង់អាល័កុល និងអុកស៊ីហ្សែន, ទីតាំងផលិតនិងផ្គត់ផ្គង់មី, ទីតាំងលក់ហ្គាសសម្រាប់ចម្អិនអាហារ, សេវាផ្គត់ផ្គង់ស្បៀងរបស់រដ្ឋ និងជំនួយសង្គ្រោះបន្ទាន់, សេវាផ្គត់ផ្គង់ឱសថ និងសម្ភារៈបរិក្ខារពេទ្យ និងសេវាប្រមូល និងដឹកជញ្ជូនសំរាម-សំណល់រឹង។

រដ្ឋបាលខេត្ត ក៏បានហាមឃាត់ដាច់ខាតរាល់ការធ្វើដំណើរចេញ់-ចូល ឬឆ្លងកាត់តំបន់ក្រហមនេះ លើកលែងតែការធ្វើដំណើរចាំបាច់មួយចំនួនប៉ុណ្ណោះ។

រដ្ឋបាលខេត្តបានព្រមានថា បុគ្គលដែលមិនអនុវត្តតាមសេចក្តីសម្រេចនេះ នឹងត្រូវទទួលទោស ដូចមានកំណត់ក្នុងច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ ធ្ងន់ធ្ងរផ្សេងទៀត និងលិខិតបទដ្ឋានគតិយុត្តពាក់ព័ន្ធជាធរមាន។

បន្ថែមលើវិធានការខាងលើ បុគ្គលល្មើសនឹងត្រូវកសាងសំណុំរឿងបញ្ជូនទៅស្ថាប័នតុលាការ ដើម្បីផ្តន្ទាទោសដាក់ ពន្ធនាគារ និងទោសពិន័យជាប្រាក់ ស្របតាមមាត្រា១០ នៃច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀត និងលិខិតបទដ្ឋានគតិយុត្តពាក់ព័ន្ធជាធរមាន៕ ផ្តល់សិទ្ធិដោយ៖ freshnews