ថ្មីៗនេះអ្នកវិទ្យាសាស្ត្របានបញ្ជាក់ពីវត្តមានដំបូងនៃជំងឺ COVID-19 វ៉ារ្យ៉ង់ក្រៅផ្លូវការ Deltacron ដែលជាការបំប្លែងខ្លួនថ្មីមួយទៀត នៃការរួមបញ្ចូលគ្នារវាង អូមីក្រុង និង ដែលតា ហើយវាក៏កំពុងចម្លងរាលដាលនៅតំបន់អឺរ៉ុប និងសហរដ្ឋអាមេរិកផងដែរ។ វ៉ារ្យ៉ង់កូនកាត់ថ្មីនេះ ត្រូវបានបញ្ជាក់តាមរយៈលំដាប់ហ្សែន (genome) ដែលធ្វើឡើងដោយអ្នកវិទ្យាសាស្ត្រនៅវិទ្យាស្ថាន IHU Méditerranée Infection ក្នុងទីក្រុង Marseille របស់ប្រទេសបារាំង ខណៈកំពុងមានការរីករាលដាល នៅតាមតំបន់មួយចំនួននៅក្នុងប្រទេសបារាំងផងដែរ នេះបើយោងតាមទិន្នន័យព្រាង ដែលបង្ហោះលើវេបសាយវិទ្យាសាស្ត្រសុខាភិបាល medRxiv កាលពីថ្ងៃអង្គារ ទី០៨ ខែមីនា ឆ្នាំ២០២២។ វ៉ារ្យ៉ង់ Deltacron ក៏ត្រូវបានរកឃើញផងដែរ នៅក្នុងប្រទេសដាណឺម៉ាក និងហូឡង់ និងចក្រភពអង់គ្លេស។

វ៉ារ្យ៉ង់​កូនកាត់ ​Deltacron គឺកើត​ឡើង​តាម​រយៈ​ដំណើរការ​​ផ្សំ​ឡើង​វិញ​ នៅ​ពេល​ដែល​វ៉ារ្យ៉ង់ ២ ​នៃ​មេរោគ​តែមួយ ​ចម្លងទៅ​អ្នក​ជំងឺ​ក្នុង​ពេល​ដំណាល​គ្នា​ ដោយ​មានការ​ផ្លាស់​ប្តូរ​ហ្សែន​ ដើម្បី​ប្រែក្លាយជាប្រភេទថ្មីមួយទៀត។ អ្នកវិទ្យាសាស្ត្របាននិយាយថា គ្រឹះរបស់ Deltacron គឺវ៉ារ្យ៉ង់ដែលតា ខណៈដែល spike protein របស់វាបានមកពីវ៉ារ្យ៉ង់អូមីក្រុង។ ជាមួយគ្នានេះដែរ អង្គការ​សុខភាព​ពិភព​លោក បានបញ្ជាក់ដែរថា ការបំប្លែងចូលគ្នាបែបនេះ អាចកើតមានទៅបានទាំងនៅក្នុងខ្លួនមនុស្ស និងសត្វ ខណៈដែលជំងឺ COVID-19 នឹងប្រែប្រួលទៅតាមពេលវេលា ហើយការសិក្សាបន្ថែមទៀត គឺជារឿងចាំបាច់ដើម្បីកំណត់អត្តសញ្ញាណនៃមេរោគ។ ជម្រាបដែរថា វ៉ារ្យ៉ង់ Deltacron ត្រូវបានគេជឿថា បានចរាចរចាប់តាំងពីខែមករា ដើមឆ្នាំ២០២២ នេះបើយោងតាមការចុះផ្សាយរបស់ ​​GISAID ៕ ដោយ៖ ខ្មែរណូត