ជប៉ុន បញ្ជាក់ពីការរកឃើញករណីដំបូង នៃជំងឺអុតស្វាក្នុងទីក្រុងតូក្យូ

(តូក្យូ)៖ អភិបាលក្រុងតូក្យូ លោកស្រី Yuriko Koike បានប្រកាសថា ប្រទេសជប៉ុននៅថ្ងៃចន្ទនេះបានបញ្ជាក់ពី ករណីដំបូងរបស់ខ្លួន នៃជំងឺអុតស្វា ដែលបានរកឃើញនៅលើបុរសម្នាក់អាយុ៣០ឆ្នាំ។ នេះបើយោងតាមការចេញផ្សាយ ដោយសារព័ត៌មាន AFP នៅថ្ងៃចន្ទ ទី២៥ ខែកក្កដា ឆ្នាំ២០២២។

លោកស្រី Koike បានប្រាប់អ្នកយកព័ត៌មានថា «វាជាករណីបុរសដែលមានអាយុ ៣០ឆ្នាំដែលមានប្រវត្តិធ្វើដំណើរទៅក្រៅប្រទេស ដោយបានត្រលប់មកពីអឺរ៉ុប។ នេះជាករណីជំងឺអុតស្វាលើកដំបូងនៅក្នុងប្រទេសជប៉ុន»។

លោកស្រី បាននិយាយថា បុរសនោះកំពុងទទួលការសម្រាកព្យាបាលនៅមន្ទីរពេទ្យក្នុងទីក្រុងតូក្យូ ប៉ុន្តមិនបានផ្តល់ព័ត៌មានលម្អិតបន្ថែមឡើយ។

គួរបញ្ជាក់ថា កាលពីថ្ងៃសៅរ៍កន្លងទៅអង្គការសុខភាពពិភពលោកបានប្រកាសពីស្ថានភាពអាសន្ន នៃការផ្ទុះឡើងនៃជំងឺអុតស្វា៕ ផ្តល់សិទ្ធិដោយ៖ freshnews