បន្ទាប់​ពី​ការ​កាត់​បន្ថយ​ការងារ​ជា​ច្រើន​ ក្រុមហ៊ុនAmazon ក៏កំពុង​ដាក់​លក់ដីទំហំ២៩ហិចតានៅ Milpitas រដ្ឋកាលីហ្វ័រញ៉ា ដែល​ខ្លួន​បាន​ទិញ​ជាង​មួយ​ឆ្នាំ​មុន។ គួរ​បញ្ជាក់​ផង​ដែរ​ថា ក្រុមហ៊ុន​ពាណិជ្ជកម្ម​អេឡិចត្រូនិក​យក្ស​នេះ​ទើបតែ​ទិញ​​កាលពី ១៦ខែ​មុន ក្នុងតម្លៃ១២៣លានដុល្លារ។

សាជីវកម្មរបស់មហាសេដ្ឋី Jeff Bezos កំពុងតែប្រឈមនឹងស្ថានភាពមិនល្អ បន្ទាប់ពីបានពង្រីកខ្លួនយ៉ាងច្រើនក្នុងអំឡុងពេលជំងឺរាតត្បាត ដោយជួលបុគ្គលិកថ្មីជាបន្តបន្ទាប់ និងឃ្លាំងថ្មីៗ។ នៅខែតុលា ឆ្នាំ២០២១ Amazon បានចំណាយ ប្រាក់១២៣លានដុល្លារ លើដីនៅតំបន់ Milpitas (California) ។ ក្រុមហ៊ុននេះចង់ទិញអចលនទ្រព្យនៅជិតទីក្រុងធំៗ ប្រែក្លាយវាទៅជាឃ្លាំង និងត្រួសត្រាយផ្លូវសម្រាប់កំណើននាពេលអនាគត។ ប្រភពរបស់ Bloomberg បានបង្ហាញថា Amazon ប្រហែលជាត្រូវលក់ដីនេះដោយខាត ដោយ​តម្លៃ​លក់​ចុង​ក្រោយ​គឺ​នៅ​តែ​ត្រូវ​បាន​ពិភាក្សា​។

សូមរំលឹកថានៅសហរដ្ឋអាមេរិក នាយកប្រតិបត្តិក្រុមហ៊ុន Amazon លោក Andy Jassy បានប្រកាសថា លោកនឹងបញ្ឈប់បុគ្គលិកចំនួន ១៨,០០០នាក់។ ការផ្លាស់ប្តូរនេះកើតឡើងបន្ទាប់ពីការបញ្ឈប់ការងារជាបន្តបន្ទាប់ និងការបញ្ឈប់ការជួលក្នុងវិស័យបច្ចេកវិទ្យា។ Meta ដែលជាក្រុមហ៊ុនមេរបស់ Facebook បានបញ្ឈប់បុគ្គលិករបស់ខ្លួនចំនួន ១៣% ឬច្រើនជាង ១១,០០០នាក់។

មូលហេតុចម្បងគឺការធ្លាក់ចុះនៃតម្រូវការក្រោយកូវីដ ដោយកាលពីមុនការបញ្ជាទិញទំនិញ​តាម​អ៊ីនធឺណិត​ច្រើន​ជាង​មុន ក្នុងអំឡុងពេលរាតត្បាត ។ ដើម្បី​បំពេញ​តម្រូវ​ការ​ដ៏​ខ្លាំង​ក្លា​នោះ ក្រុមហ៊ុន​បច្ចេក​វិទ្យា​បាន​ជ្រើសរើសបុគ្គលិក​យ៉ាង​ច្រើន​។ Amazon តែឯងបានជួលកម្មកររាប់រយពាន់នាក់បន្ថែមទៀតដើម្បីដោះស្រាយបន្ទុកការងារដែលកំពុងកើនឡើង។

ប៉ុន្តែនៅពេលដែលការរាតត្បាត Covid-19 ត្រូវបានបញ្ចប់ មនុស្សត្រឡប់ទៅការិយាល័យវិញ ហើយចំណាយពេលច្រើននៅខាងក្រៅ កម្រិតនៃអន្តរកម្មនៅលើវេទិកាបច្ចេកវិទ្យាថយចុះ និងកាត់បន្ថយប្រាក់ចំណូល។ ក្រុមហ៊ុនបច្ចេកវិទ្យាធ្លាប់គិតថា ជំងឺរាតត្បាតនឹងផ្លាស់ប្តូរអាកប្បកិរិយាអ្នកប្រើប្រាស់ជារៀងរហូត សូម្បីតែបន្ទាប់ពីការរាតត្បាត Covid-19 បានកន្លងផុតទៅហើយក៏ដោយ៕ ប្រភព៖ bloomberg