(អាមេរិក)៖ នៅអំឡុងខែកក្កដាកន្លងទៅនេះ នាយករដ្ឋមន្ត្រីកាណាដា Justin Trudeau បានបង្ហោះសារមួយចំនួននៅលើបណ្តាញសង្គម Twitter ដើម្បីទាក់ទងទៅតារាចម្រៀងល្បី Taylor Swift ក្នុងគោលបំណងលើកទឹកចិត្តនាងឱ្យបន្ថែមកាលបរិច្ឆេទ សម្រាប់ការប្រគំតន្រ្តីទេសចរណ៍ពិភពលោក Eras Tour របស់នាង ទៅប្រទេសកាណាដា។ តែយ៉ាងណា នៅពេលនេះបំណងរបស់លោក គឺបានសម្រេចហើយ បន្ទាប់ពីមានសេចក្តីរាយការណ៍ថា Taylor Swift នឹងបន្ថែមចំនួនថ្ងៃនៃការប្រគំតន្ត្រីរបស់ខ្លួននៅកាណាដា។ នេះបើតាមការចេញផ្សាយដោយសារព័ត៌មាន Straits Times នៅថ្ងៃទី០៤ ខែសីហា ឆ្នាំ២០២៣។

ម្ចាស់ឧបត្ថម្ភការប្រគំតន្ត្រី Rogers Communications បាននិយាយនៅក្នុងសេចក្តីថ្លែងការណ៍មួយថា Swift នឹងសម្តែងចំនួន៦ Show ជាផ្នែកមួយនៃការប្រគំតន្ត្រីទេសចរណ៍ «Eras Tour» របស់នាងនៅក្នុងទីក្រុងធំបំផុតរបស់ប្រទេសកាណាដា ហើយសំបុត្រនឹងដាក់លក់ក្នុងពេលឆាប់ៗនេះសម្រាប់កាលបរិច្ឆេទខែវិច្ឆិកា ឆ្នាំ២០២៤។ តារា ចម្រៀងប៉ុបអាមេរិកវ័យ ៣៣ឆ្នាំ រូបនាងផ្ទាល់ក៏បានបង្ហោះលើ Instagram ថា៖ «វាមិនមែនជាទីបញ្ចប់នៃការប្រគំតន្រ្តីនោះទេ។ Miami, New Orleans, Indy និង Toronto: The Eras Tour នឹងមករកអ្នកនៅឆ្នាំ ២០២៤។ Swift បានបញ្ចេញសារបែបនេះ ដោយភ្ជាប់ជាមួយរូបថតមានរាយបញ្ជីប្រទេសកាណាដាចាប់ពីថ្ងៃទី១៤ ដល់ថ្ងៃទី១៦ ខែវិច្ឆិកា និងថ្ងៃទី២១ ដល់ថ្ងៃទី២៣ ខែវិច្ឆិកា។

គួរបញ្ជាក់ថា ការប្រគំតន្ត្រី «The Eras Tour» របស់ Taylor Swift ដែលមានសរុប១៣១ឆាក និង៥ទ្វីប ត្រូវបានគេរាយការណ៍ថា អាចរកចំណូលបានខ្ទង់ ១ពាន់លានដុល្លារហើយ និងអាចនឹងក្លាយជាការប្រគំតន្ត្រីទេសចរណ៍ដែលទទួលជោគជ័យបំផុតក្នុងប្រវត្តិសាស្ត្រ ដោយសម្ដែងមួយលើកៗអាចទាក់ទាញទស្សនិកជនជាមធ្យម ៧ម៉ឺននាក់ និងចំណូលជាមធ្យម ១៣លានដុល្លារ៕ ផ្តល់សិទ្ធិដោយ៖ freshnews