(ព្រះសីហនុ)៖ រដ្ឋបាលខេត្តព្រះសីហនុ បានជូនដំណឹងដល់ម្ចាស់អាជីវកម្ម មណ្ឌលកម្សាន្តទេសចរណ៍មនុស្សពេញវ័យទាំងអស់ ដែលមានការបំពងសម្លេងលឺៗ លើសកម្រិតធ្វើឲ្យរំខាន ដល់ការរស់នៅរបស់ប្រជាពលរដ្ឋ និងភ្ញៀវទេសចរ។ នេះបើតាមសេចក្ដីជូនដំណឹង ដែលបណ្ដាញព័ត៌មាន Fresh News ទទួលបាននៅថ្ងៃទី១៥ ខែកុម្ភៈ ឆ្នាំ២០២៤។

បើតាមសេចក្ដីជូនដំណឹង, រដ្ឋបាលខេត្ត បានចាត់តាំងមន្ត្រីជំនាញ នៃមន្ទីរបរិស្ថានខេត្ត ចុះវាស់សម្លេងជាក់ស្ដែងឃើញថា អាជីវកម្មមណ្ឌលកម្សាន្តទេសចរណ៍មនុស្សពេញវ័យមួយចំនួន មានការបំពងសម្លេង លឺៗ ​លើសកម្រិតស្តង់ដារ កំណត់មានចាប់ពី ៧៩.៦ដេស៊ីបែល (dB(A)) ដល់ ៩០.២ដេស៊ីបែល (dB(A)) ធ្វើឲ្យរំខានដល់ការរស់នៅរបស់ប្រជាពលរដ្ឋ ភ្ញៀវទេសចរជាតិ អន្តរជាតិ និងសាធារណៈជន។

ដូចបានជម្រាបជូនខាងលើ ដើម្បីគ្រប់គ្រងសណ្តាប់ធ្នាប់ និងរបៀបរៀបរយសាធារណៈ រដ្ឋបាលខេត្តព្រះសីហនុ សូមធ្វើការណែនាំលោក លោកស្រី ម្ចាស់អាជីវកម្មមណ្ឌលកម្សាន្តទេសចរណ៍មនុស្ស ពេញវ័យទាំងអស់ ពិសេសនៅតាមឆ្នេរអូរឈើទាលទាំងអស់ ត្រូវអនុវត្តតាមកម្រិតកំណត់ស្តង់ដារសម្លេងអតិបរមា ដូចខាងក្រោម៖

*ទី១៖ ចាប់ពីម៉ោង ៦៖០០នាទីព្រឹក ដល់ម៉ោង ១៨៖០០នាទីល្ងាច ស្តង់ដារសម្លេងអតិបរមា ៧៥ដេស៊ីបែល (dB(A))
*ទី២៖ ចាប់ពីម៉ោង ១៨៖០០នាទី ល្ងាចដល់ម៉ោង ២២៖០០នាទីយប់ ស្តង់ដារសម្លេងអតិបរមា ៧០ដេស៊ីបែល (dB(A))
*ទី៣៖ ចាប់ពីម៉ោង ២២៖០០នាទី យប់ដល់ម៉ោង ៦៖០០នាទីព្រឹក ស្តង់ដារសម្លេងអតិបរមា ៥០ដេស៊ីបែល (dB(A))

រដ្ឋបាលខេត្តព្រះសីហនុ បានគូសបញ្ជាក់ថា បើម្ចាស់អាជីវកម្មទាំងអស់ មិនអនុវត្តតាមការកំណត់ខាងលើ រដ្ឋបាលខេត្ត នឹងអនុវត្តវិធានការរដ្ឋបាល ឬវិធានការច្បាប់ដោយត្រូវទទួលពិន័យអន្តរការណ៍ ឬផ្តន្ទាទោសដោយយោង ទៅតាមមាត្រា២០ មាត្រា២១ មាត្រា២២ មាត្រា២៣ និងមាត្រា២៥ ជំពូកទី៩ នៃច្បាប់ស្តីពីកិច្ចការពារបរិស្ថាន និងការគ្រប់គ្រងធនធានធម្មជាតិ។

អាស្រ័យហេតុនេះ សូមលោក លោកស្រី ម្ចាស់អាជីវកម្មមណ្ឌលកម្សាន្តទេសចរណ៍មនុស្សពេញវ័យទាំងអស់ ពិសេសនៅតាមឆ្នេរអូរឈើទាលទាំងអស់ជ្រាប និងចាត់ចែងអនុវត្តតាមសេចក្តីជូនដំណឹងនេះ ឲ្យមានប្រសិទ្ធភាពខ្ពស់ និងទទួលបានលទ្ធផលល្អ៕ ផ្តល់សិទ្ធិដោយ៖ Fresh News