(ភ្នំពេញ)៖ កីឡាករប្រដាល់ Thiago Teixeira ដែលមានដើមកំណើតជាជនជាតិប្រេស៊ីល បានប្រកាសថារូបគាត់នឹងប្រកួតនៅកម្មវិធី Apex Fight Series នាថ្ងៃទី០១ មេសា ខាងមុខនេះនៅប្រទេសអាល្លឺម៉ង់ នឹងតំណាងឱ្យទង់ជាតិប្រេស៊ីល និងទង់ជាតិកម្ពុជា ជាមួយគ្នា។

ជាមួយគ្នានេះលោកឧកញ៉ា ស្រី ចាន់ថន បានឱ្យដឹងថាលោក Thiago នឹងចាកចេញទៅអាឡឺម៉ង់ នៅថ្ងៃទី២២ ខែមីនានេះ ដោយលោកបានជូន ក្លុក​តេជ និង ប្រថាប់ដៃ ទៅកាន់កីឡាករ Thiago ដើម្បីឱ្យគាត់មានស្មារតីខ្លាំងក្លា មោះមុត និងក្លាហាន។

លោកឧកញ៉ា ស្រី ចាន់ថន បានសរសេររៀបរាប់ថា៖ «ខ្ញុំសូមជម្រាបបងប្អូនជនរួមជាតិថា Thiago នឹងចេញដំណើរទៅប្រទេសអាឡឺម៉ង់នៅថ្ងៃទី២២ ខែមីនា ឆ្នាំ២០២៣នេះ។ ថ្ងៃនេះផងដែរ ខ្ញុំបានជូន ក្លុក​តេជ និង ប្រថាប់ដៃ ទៅកាន់កីឡាករ Thiago ដើម្បីឲ្យគាត់មានស្មារតីខ្លាំងក្លា មោះមុត និងក្លាហាន។ ដោយគាត់ឡើងវ៉ៃលើកនេះគឺតំណាងឲ្យប្រទេសកម្ពុជា តំណាងឲ្យគុនខ្មែរ។

កីឡាករ Thiago នឹងវ៉ៃជាមួយកីឡាករអង់គ្លេសនៅសង្វ្រៀនប្រទេសអាឡឺម៉ង់។ ដូច្នេះក្នុងនាមខ្ញុំជាអនុប្រធានសហព័ន្ធកីឡាប្រដាល់គុនខ្មែរ និងជាប្រធានក្លឹបគុនខ្មែរជើងឯកពិភពលោក ខ្ញុំនឹងរៀបចំការជូនដំណើរមួយសម្រាប់កីឡាករ Thiago ដល់ប្រលានយន្តហោះដើម្បីជាកម្លាំងចិត្តឲ្យគាត់អាចដណ្តើមយកជ័យជំនៈមកជូនប្រទេសកម្ពុជាយើងវិញ។ មិនយូរមិនឆាប់នៅពេលដែលកីឡាករ Thiago ត្រលប់មកប្រទេសកម្ពុជាវិញនឹងមានដំណឹងល្អមួយសម្រាប់បងប្អូនប្រជាជនកម្ពុជាទាំងមូលផងដែរ។ អាស្រ័យហេតុនេះខ្ញុំសូមជម្រាបបងប្អូនផងដែរថា បងប្អូនក៏អាចចូលរួមក្នុងការជូនដំណើរកីឡាករ Thiago បានផងដែរនៅព្រលានយន្តហោះអន្តរជាតិភ្នំពេញនៅវេលាម៉ោង ៩:៣០នាទីព្រឹក ថ្ងៃទី២២ ខែមីនា ឆ្នាំ២០២៣ខាងមុខនេះ»៕