ការកើនឡើងនៃតម្លៃស៊ុតនៅក្នុងប្រទេសថៃ បានធ្វើឱ្យពាណិជ្ជករ និងអ្នកប្រើប្រាស់មានការព្រួយបារម្ភយ៉ាងខ្លាំង នៅពេលដែលការឡើងថ្លៃមួយចំនួន បានបណ្ដាលមកពីកត្តាដូចជា៖ ការខ្វះខាតការផ្គត់ផ្គង់នៅកសិដ្ឋាន និងការកើនឡើងនៃតម្រូវការនាំចេញ នេះបើតាមការឱ្យដឹងពីសារព័ត៌មាន បាងកកប៉ុស្ដិ៍។ លោក Wanchai Rungmitcharatsaeng ម្ចាស់ហាងស៊ុតអាយុ ៦៥ឆ្នាំ មកពីស្រុកមឿង ខេត្តខនកែន ដែលបានបើកអាជីវកម្មរយៈពេលជាង ២០ឆ្នាំ បានអះអាងថា បច្ចុប្បន្នតម្លៃស៊ុតបានឡើងថ្លៃខ្ពស់បំផុត ជាងពេលណាទាំងអស់។

ហេតុដូច្នេះហើយ អ្នកលក់ជាច្រើនបានឈប់លក់ស៊ុតប្រភេទគ្រាប់ធំ ដែលគេស្គាល់ថាជាស៊ុត ០ ដោយបារម្ភថា វាប្រហែលជាមិនអាចលក់បានដូចជា ប្រភេទគ្រាប់តូចៗ និងថោកជាងនេះទេ។ ឥឡូវនេះ តម្លៃស៊ុត ០ គឺ ១៤៥ បាត ក្នុងមួយប្រអប់ដែលមានចំនួន ៣០ គ្រាប់ (បោះដុំ) ហើយស៊ុតនីមួយៗមានតម្លៃ ៦បាត ខណៈដែលស៊ុតលេខ ១ តូចជាងប្រភេទ ០ មានតម្លៃលក់ដុំ ១៣៥ បាត ក្នុងមួយប្រអប់ ហើយស៊ុតនីមួយៗមានតម្លៃ ៤.៥ បាត។ លោក Wanchai Rungmitcharatsaeng បានបន្ថែមថា តម្លៃស៊ុតបានកើនឡើងពី ២ ទៅ ៦ បាត ក្នុងមួយប្រអប់ ក្នុងរយៈពេលប៉ុន្មានខែចុងក្រោយនេះ។

ទន្ទឹមនឹងនេះដែរ វាមិនមែនតែប្រភេទស៊ុតគ្រាប់ធំៗដែលកំពុងឡើងថ្លៃខ្លាំងនោះទេ សូម្បីតែប្រភេទគ្រាប់តូចៗដូចជាប្រភេទលេខ ៣, ៤, និង ៥ ក៏បានឡើងថ្លៃដូចគ្នា ក្នុងរយៈពេល ២ ទៅ ៣ ខែកន្លងមកនេះ ទាំងដែលស៊ុតមានទំហំតូចៗទាំងនេះ មិនត្រូវបានទាមទារសម្រាប់ការនាំចេញក៏ដោយ៕ ផ្តល់សិទ្ធិដោយ៖ ខ្មែរណូត