អ្នកដឹកនាំរឿង «Titanic» James Cameron ធ្លាប់មុជទៅទីតាំងខ្មោចកប៉ាល់ Titanic ៣៣ដង បញ្ជាក់ថាការផ្ទុះនាវាមុជទឹក Titan មិនមែនជារឿងគួរឱ្យភ្ញាក់ផ្អើល
- BY
- Khmerpress
- June 24, 2023
(បរទេស)៖ ផលិតករភាពយន្តហូលីវូដដ៏ល្បីឈ្មោះលោក James Cameron ដែលធ្លាប់បានជ្រមុជទៅមើលខ្មោចកប៉ាល់ Titanic ចំនួន៣៣ដង ដើម្បីសិក្សាស្រាវជ្រាវមុនផលិតភាពយន្ត «Titanic» បានប្រាប់សារព័ត៌មានជាច្រើនពីបទពិសោធន៍ផ្ទាល់ខ្លួនរបស់លោក ស្របពេលកូននាវាមុជទឹក Titan ត្រូវបានគេជឿជាក់ថា បានផ្ទុះក្នុងកំលុងពេលចុះស្រាវជ្រាវខ្មោចកប៉ាល់ Titanic។
ផលិតករភាពយន្តរូបនេះ បានសង្កត់ធ្ងន់ថា នៅពេលដែលលោកទទួលព័ត៌មានថា នាវា Titan បានបាត់ការទំនាក់ទំនង គឺលោកបានសង្ស័យភ្លាមៗថាមានគ្រោះមហន្តរាយទៅហើយ។ នេះបើតាមការចេញផ្សាយរបស់សារព័ត៌មាន BBC នៅថ្ងៃទី២៣ ខែមិថុនា ឆ្នាំ២០២៣។
អ្នកដឹកនាំរឿងហូលីវូដ លោក James Cameron ដែលដឹកនាំរឿង «Titanic» ឆ្នាំ១៩៩៧ បានប្រាប់ BBC ថាលោកពិតជាសោកស្ដាយខ្លាំង ដែលមិនបានផ្ដល់ការព្រមានអាសន្នឱ្យបានលឿនជាងនេះ ព្រោះលោកមើលឃើញថាការបង្កើតនាវាមុជទឹកនេះឡើង គឺប្រកបដោយគ្រោះថ្នាក់ មិនស័ក្ដិសមនឹងប្រើប្រាស់ដើម្បីទៅទស្សនាខ្មោចកប៉ាល់ដែលស្ថិតនៅជម្រៅជិត ៤គីឡូម៉ែត្រក្នុងបាតសមុទ្រនោះឡើយ។ Cameron បានបញ្ចប់ការជ្រមុជទឹកចំនួន៣៣លើក ទៅទីតាំងកប៉ាល់ Titanic បាននិយាយថា នៅពេលដែលលោកបានដឹងថា ក៏ដូចជាទទួលព័ត៌មានថា នាវា Titan បាត់ការទំនាក់ទំនង គឺលោកបានសង្ស័យភ្លាមៗ ថាមានគ្រោះមហន្តរាយទៅហើយ។ លោក James Cameron បានសន្និដ្ឋានថា សោកនាដកម្មកប៉ាល់ Titanic និងនាវាមុជទឹក Titan គឺសុទ្ធតែកើតឡើង ដោយសារការមិនយកចិត្តទុកដាក់ចំពោះការព្រមានពីគ្រោះថ្នាក់មុនកើតហេតុ។
លោកបានសង្កត់ធ្ងន់ថា អ្នកណាម្នាក់ដែលធ្វើដំណើរទៅកាន់ខ្មោចកប៉ាល់ Titanic គួរតែដឹងច្បាស់ពីហានិភ័យ ព្រោះថា វាជាកន្លែងគ្រោះថ្នាក់ខ្លាំងណាស់។ លោកថា «យល់ព្រមចំពោះហានិភ័យទាំងនោះ ប៉ុន្តែកុំស្ថិតក្នុងស្ថានភាព ដែលអ្នកមិនត្រូវបានគេប្រាប់អំពីហានិភ័យ…»។
ជាចុងក្រោយ លោកបានចូលរួមរំលែក ទុក្ខយ៉ាងក្រៀមក្រំ ចំពោះក្រុមគ្រួសាររបស់អ្នកបាត់បង់ជីវិតទាំង ៥រូប ដែលបានជិះនៅក្នុងកូននាវា Titan៕ ផ្តល់សិទ្ធិដោយ៖ freshnews
- Share This Post: