អភិបាលខេត្តកំពង់ចាម ណែនាំឱ្យប្រធានមន្ទីរធនធានទឹក រៀបចំផែនការផ្គត់ផ្គង់ទឹកដើម្បីស្រោចស្របដំណាំរបស់ប្រជាកសិករ ក្នុងស្រុកជើងព្រៃ

(កំពង់ចាម)៖ ក្នុងពេលចុះពិនិត្យស្ថានភាពទំនប់ទឹកឃុំព្រៃចារ និងការបង្កបង្កើនផល របស់ប្រជាកសិករ ស្ថិតក្នុងឃុំព្រៃចារ ស្រុកជើងព្រៃ នៅថ្ងៃទី៨ ខែកញ្ញា ឆ្នាំ២០២៣នេះ លោក អ៊ុន ចាន់ដា អភិបាលខេត្តកំពង់ចាម បានណែនាំដល់ប្រធានមន្ទីរធនធានទឹក និងឧតុនិយមខេត្ត រៀបចំផែនការផ្គត់ផ្គង់ទឹក ដើម្បីឱ្យប្រជាកសិករ រស់នៅក្នុងតំបន់នោះ មានទឹកប្រើប្រាស់ស្រោចស្របដំណាំគ្រប់គ្រាន់ ជាពិសេសនៅរដូវប្រាំងពេលខាងមុខ។

លោក អ៊ុន ចាន់ដា បានថ្លែងថា មន្ទីរធនធានទឹក និងឧតុនិយម ត្រូវសិក្សាមើលលទ្ធភាពរបស់សហគមន៍ ក្នុងការប្រើប្រាស់ប្រេង ដើម្បីបូមទឹកយកទៅប្រើប្រាស់ស្រោចស្រពដំណាំស្រូវ ហើយប្រសិនបើ ពិនិត្យឃើញថា ក្នុងសហគមន៍មានការខ្វះខាត អង្គភាពមន្ទីរធនធានទឹក និងឧតុនិយម ត្រូវរកមធ្យោបាយដើម្បីជួយដល់ពួកគាត់។

ប៉ុន្តែយ៉ាងណាក៏ដោយ ផ្អែកតាមការសាកសួររបស់លោក អភិបាលខេត្ត ទៅកាន់សហគមន៍ប្រជាកសិករ ក្នុងតំបន់នោះឱ្យដឹងថា ក្នុងរដូវវស្សានេះ ធ្វើឱ្យប្រជាកសិករ មានទឹកគ្រប់គ្រាន់សម្រាប់ធ្វើការដាំដុះដំណាំស្រូវ គ្រាន់តែមានការខូចខាតខ្លះៗ ដោយសារសត្វល្អិត។

ជាមួយគ្នានោះដែរ ក៏មានការស្នើសុំពីសហគមន៍កសិករសូមឱ្យអាជ្ញាធរខេត្តជួយដោះស្រាយធ្វើប្រឡាយទឹកប្រវែងប្រមាណជាង៥០០ម៉ែត្រ ចេញពីអាងទឹកទំនប់ព្រៃចារ ដើម្បីឱ្យប្រជាពលរដ្ឋចំនួន ៣ភូមិ ស្ថិតក្នុងឃុំព្រៃចា បានទឹកស្រោចស្របដំណាំស្រូវលើផ្ទៃដីប្រមាណជាង ៣០ហិកតាផងដែរ។

ជាមួយនឹងការស្នើសុំនេះ អភិបាលខេត្តកំពង់ចាម បានណែនាំឱ្យលោក អ៊ុម វិបុល ប្រធានមន្ទីរធនធានទឹក និងឧតុនិយម យកសំណើរនោះ ដាក់ក្នុងផែនការដើម្បីធ្វើការដោះស្រាយ។

សូមបញ្ជាក់ផងដែរថា បន្ទាប់ពីចុះពិនិត្យស្ថានភាពទំនប់ទឹកឃុំព្រែចារ ស្រុកជើងព្រៃ អភិបាលខេត្តកំពង់ចាម បានដឹកនាំក្រុមការងារប្រធានមន្ទីរអង្គភាពពាក់ព័ន្ធ និងអាជ្ញាធរមូលដ្ឋាន ចុះពិនិត្យដំណាំស្រូវរបស់ប្រជាកសិករ ស្ថិតក្នុងឃុំបារាយណ៍ ស្រុកព្រៃឈរផងដែរ៕ ផ្តល់សិទ្ធិដោយ៖ freshnews