អាជ្ញាធរស្រុកអង្គស្នួល ហៅអ្នកបង្ហោះព័ត៌មានខូចផ្លូវនៅលើបណ្តាញសង្គម មកអប់រំ និងធ្វើកិច្ចសន្យា, អ្នកបង្ហោះមានឡានបែនធំៗ បើកចេញចូលរាល់ថ្ងៃបណ្តាលឲ្យខូច

(កណ្ដាល)៖ ក្រោយមានការបង្ហោះព័ត៌មានលើបណ្ដាញសង្គមរបស់ឈ្មោះ សុខនី មហាគ្រួសារីករាយ ធំធំ ករណីខូចផ្លូវ នាពេលកន្លងទៅ នៅភូមិត្នោតម្តើម ឃុំបែកចាន ស្រុកអង្គស្នួល ខេត្តកណ្តាល រួចមក, អាជ្ញាធរបានកោះហៅអ្នកបង្ហោះមកអប់រំ និងធ្វើកិច្ចសន្យា ព្រមទាំងឲ្យចូលរួមបដិភាគជួសជុលផ្លូវ និងថែទាំផ្លូវ ដោយសារតែបុគ្គលរូបនេះ មានឡានបែនធំៗបើកលើផ្លូវនេះបណ្តាលឲ្យខូច។

លោក ខុន សេរីរដ្ឋា អភិបាលស្រុកអង្គស្នួល បានអះអាងថា មេឃុំបែកចានបានធ្វើរបាយការណ៍ថា ផ្លូវនេះរងការខូចខាតប្រវែងជាង ២០០ម៉ែត្រ ហើយអ្នកបង្ហោះនេះ មានឡានបែនធំៗ និងឡានដឹកមាន់ផ្សេងទៀត បើកចេញ-ចូលផ្លូវនេះ ដែលបណ្ដាលឲ្យផ្លូវរងការខូចខាត។

លោកអភិបាលស្រុក បានថ្លែងថា អាជ្ញាធរតែងតែគិតគូរយកចិត្តទុកដាក់ពីសុខទុក្ខរបស់ពលរដ្ឋ ពិសេសតែងតែដោះស្រាយរាល់បញ្ហាដែលពលរដ្ឋស្នើរមកកាន់អាជ្ញាធរ៕ ផ្តល់សិទ្ធិដោយ៖ freshnews