កូរ៉េខាងត្បូងព្រមាន Google និង Apple ជុំវិញការធ្វើខុសគោលការណ៍ និងត្រៀមផាកពិន័យរហូតដល់ជាង ៥០លានដុល្លារ

(បរទេស)៖ និយតករទូរគមនាគមន៍កូរ៉េខាងត្បូងបាននិយាយថា ក្រុមហ៊ុន Alphabet ដែលជាមេធំរបស់ Google និង Apple បានបំពានលើទីតាំងទីផ្សារកម្មវិធីដ៏លេចធ្លោរបស់ពួកគេទាំងនៅលើ App Store និង Play Store ដែលបង្ខំឱ្យអ្នកបង្កើតកម្មវិធីក្នុងស្រុករបស់ខ្លួនបង់ប្រាក់។ នេះបើយោងតាមការចេញផ្សាយរបស់សារព័ត៌មាន Reuters នៅថ្ងៃទី០៧ ខែតុលា ឆ្នាំ២០២៣។

យោងតាមសេចក្តីថ្លែងការពីគណៈកម្មការទំនាក់ទំនងកូរ៉េ (KCC) បានលើកឡើងថា ក្រុមហ៊ុនបច្ចេកវិទ្យាយក្សអាមេរិកទាំងពីរនេះបានបង្ខំឱ្យ Developer ដែលបង្កើតកម្មវិធី នឹងដាក់ដំណើរការទៅក្នុង AppStore និង Play Store ត្រូវតែបង់ប្រាក់ជាមុន ខណៈអ្នកមិនបង់ប្រាក់ត្រូវបានពន្យាពេលចេញផ្សាយកម្មវិធីទាំងនោះ។ KCC ក៏បានបញ្ជាក់ដែរថា និយតករកូរ៉េកំពុងជូនដំណឹងដល់ក្រុមហ៊ុនយក្សទាំងពីរនេះ អំពីការត្រួតពិនិត្យរកការពិត ប្រសិនបើទាំង Google និង Apple ធ្វើបែបនេះពិតមែន នឹងត្រូវបានផាកពិន័យជាប្រាក់សរុបប្រហែល ៥០.៤៧លានដុល្លារជុំវិញការបំពានគោលការណ៍របស់ពួកគេដោយក្នុងនោះ Google នឹងត្រូវផាកពិន័យប្រហែល ៣៥លានដុល្លារ និងង Apple ប្រហែល ១៥លានដុល្លារ។

គួរជម្រាបដែរថា បញ្ហានេះភាគីខាង Apple បានធ្វើការឆ្លើយតបភ្លាមៗថា ពួកគេមិនយល់ស្របនឹងការសន្និដ្ឋានដែលធ្វើឡើងដោយ KCC នោះខណៈដែលពួកគេមានគោលការណ៍ត្រឹមត្រូវ នឹងមិនបានបង្ខំ Developer ឱ្យប្រើប្រាស់ប្រព័ន្ធទូទាត់ប្រាក់ «payments systems» តាមការចោទប្រកាន់នោះឡើយ៕ ផ្តល់សិទ្ធិដោយ៖ freshnews