មន្ទីរអប់រំខេត្តបន្ទាយមានជ័យ បកស្រាយការលើកឡើងរបស់ស្រ្តីម្នាក់ ដែលមិនពេញចិត្តដោយមិនបានធ្វើជាគ្រូជាប់កិច្ចសន្យា

(បន្ទាយមានជ័យ)៖ មន្ទីរអប់រំ យុវជន និងកីឡាខេត្តបន្ទាយមានជ័យ នៅថ្ងៃទី២៥ ខែធ្នូ ឆ្នាំ២០២៣នេះ បានចេញប្រកាសព័ត៌មានថា នាពេលថ្មីៗកន្លងមកនេះមានគេហទំព័រទំនាក់ទំនងសង្គមគណនីហ្វេសបុក ឈ្មោះ អឿ មុន្នី បានចុះផ្សាយ អំពីការមិនពេញចិត្តករណីមិនបានធ្វើជាគ្រូបង្រៀនជាប់កិច្ចសន្យា នៅសាលាបឋមសិក្សាសុខសាន្ត សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។

ពាក់ព័ន្ធនឹងការចុះផ្សាយខាងលើនេះ មន្ទីរអប់រំ យុវជន និងកីឡាខេត្ត សូមធ្វើការបំភ្លឺជូនថា ជាគោលការណ៍ដែលបានកំណត់ដោយក្រសួង និងមន្ទីរអប់រំ យុវជន និងកីឡា គឺជាបេក្ខជន ឬជាប្រជាពលរដ្ឋ ដែលត្រូវមានអាយុចាប់ពី ១៨ ឆ្នាំដល់៤០ឆ្នាំ។

ករណីជាក់ស្ដែងចំពោះអ្នកគ្រូ អឿ មុន្នី ដែលមានអាយុលើសច្រើន រហូតទៅដល់ ៥៧ឆ្នាំ ជាហេតុធ្វើឱ្យការិយាល័យអប់រំ យុវជន និងកីឡា នៃរដ្ឋបាលក្រុង ពុំបានទទួលពាក្យសុំធ្វើជាគូ បង្រៀនជាប់កិច្ចសន្យារបស់គាត់ឡើយ។ សម្រាប់ឆ្នាំ២០២២កន្លងមក អ្នកគ្រូ អឿ មុន្នី បានទទូចស្នើសុំ ប្រធានការិយាល័យអប់រំ យុវជន និងកីឡា នៃរដ្ឋបាលក្រុងប៉ោយប៉ែត ដោយបានធ្វើជាគ្រូកិច្ចសន្យា ស្នើសុំជួយសម្របសម្រួល ឱ្យបានធ្វើជាគ្រូបង្រៀនជាប់កិច្ចសន្យា រយៈពេលមួយឆ្នាំគត់ ដោយមិនសុំបន្តឆ្នាំក្រោយទៀតទេ៕ ផ្តល់សិទ្ធិដោយ៖ freshnews