ខេត្តសៀមរាប ទទួលបានផលិតផលទេសចរណ៍ថ្មីមួយទៀត សួនផ្កា អង្គរ វ៉ូនឌើរ ហ្គាឌិន
ខេត្តសៀមរាប៖ នៅថ្ងៃទី២៦ ខែធ្នូ ឆ្នាំ២០២៣ យោងតាមការចុះផ្សាយរបស់ ទីភ្នាក់ងារសារព័ត៌មានកម្ពុជា បានឱ្យដឹងថា ភ្ញៀវទេសចរដែលបានមកកម្សាន្តនៅខេត្តសៀមរាប នឹងបានទស្សនានូវផលិតផលទេសចរណ៍ថ្មីៗបន្ថែមទៀត បន្ទាប់ពីបានទស្សនាប្រាសាទបុរាណនៅតំបន់អង្គរ និងរមណីយដ្ឋានធម្មជាតិ ដែលមានស្រាប់នោះគឺសួនផ្កាដ៏ធំ អង្គរ វ៉ូនឌើរ ហ្គាឌិន ដែលផ្កាកំពុងតែរីកស្គុសស្គាយរងចាំស្វាគមន៍ភ្ញៀវទេសចរគ្រប់ជាតិសាសន៍។
រមណីយដ្ឋានធម្មជាតិ សួនផ្កា អង្គរ វ៉ូនឌើរ ហ្គាឌិននេះ ស្ថិតនៅភូមិគោកចាន់ ឃុំដានរុន ស្រុកសូទ្រនិគម ខេត្តសៀមរាប ដែលមានចម្ងាយពីក្រុងសៀមរាប ប្រមាណជា២៧គីឡូម៉ែត្រ។ លោក ប្រាក់ ចាន់ធី អ្នកគ្រប់គ្រងសួនផ្កា អង្គរ វ៉ូនឌើរ ហ្គាឌិន បានឱ្យដឹងថា សួនផ្កានេះ ចំណាយពេលសាងសង់រយៈពេល១ឆ្នាំ លើផ្ទៃដី៧ហិកតា វិនិយោគដោយកូនខ្មែរនៅខេត្តសៀមរាប សហការជួយបរទេស។ លោកបានបញ្ជាក់ថា សួនផ្កានេះ មានរាងជាផ្ការំដួល មានផ្កាចម្រុះពណ៌ប្រមាណជា ៨ប្រភេទ និងគ្រោងដាក់ថែមជាច្រើនប្រភេទទៀត។
លោកបន្តថា មូលហេតុដែលសាងសង់សួនផ្កានេះ គឺដោយសារតែឃើញពីសក្តានុពលខេត្តសៀមរាប មានភ្ញៀវទេសចរជាតិ និងអន្តរជាតិមកកម្សាន្តច្រើន ប៉ុន្តែពួកគាត់មកទស្សនា តែប្រាសាទបុរាណ និងរមណីយដ្ឋានធម្មជាតិ ដែលមានស្រាប់តែរយៈពេលខ្លី ហើយត្រឡប់ទៅវិញ។ ដូចនេះហើយបានជាលោករួមគ្នាសាងសង់សួនផ្កានេះឡើង ឱ្យមានផលិតផលទេសចរណ៍ថ្មី និងប្លែក ដើម្បីឱ្យភ្ញៀវទេសចរដែលមកខេត្តសៀមរាប បន្ទាប់ពីបានទស្សនាប្រាសាទបុរាណនៅតំបន់អង្គរ និងរមណីយដ្ឋានធម្មជាតិដែលមានស្រាប់ហើយ ពួកគាត់បានមកកម្សាន្តសួនផ្កានេះ ជាការពន្យារពេលឱ្យពួកគាត់ស្នាក់នៅសៀមរាបបានយូរ និងបានប្រាក់ចំណូលដល់ប្រជាជនកម្ពុជា។
ជាមួយគ្នានេះ អ្នកគ្រប់គ្រងរូបនោះបានបន្ថែមថា សួនផ្កានេះ ក៏បានផ្តល់ការងារឱ្យប្រជាពលរដ្ឋនៅជុំវិញនេះធ្វើប្រមាណជាង១០០នាក់ផងដែរ ជាពិសេសនោះ គឺចង់លើស្ទួយវិស័យទេសចរណ៍កម្ពុជា ឱ្យមានផលិតផលទេសចរណ៍សម្បូរបែបសម្រាប់បម្រើនឱ្យភ្ញៀវទេសចរ ដែលគេបានមកកម្សាន្តនៅខេត្តរបស់យើង។ លោកអះអាងថា នៅពេលខាងមុខនេះ ក៏មានគម្រោងរៀបចំផ្ការាងប្រាសាទអង្គរវត្តផងដែរ។
លោក ប្រាក់ ចាន់ធី បានឱ្យដឹងថា នៅថ្ងៃទី២៧ ខែធ្នូ ឆ្នាំ២០២៣នេះ សួនផ្កា អង្គរ វ៉ូនឌើរ ហ្គាឌិន និងបើកស្វាគមន៍ភ្ញៀវទេសចរ ជាពិសេសនៅក្នុងឱកាសឆ្លងឆ្នាំសកលនេះ ហើយសម្រាប់ភ្ញៀវទេសចរចូលទស្សនាក្នុងអំឡុងពេលបើកសាកល្បងនេះ គឺមនុស្សធំម្នាក់ ៧ដុល្លារ និងកូនក្មេងចំនួន៤ដុល្លារ ។ លោកបានអំពាវនាវដល់ភ្ញៀវទេសចរដែលបានមកកម្សាន្តនូវខេត្តសៀមរាប កុំភ្លេចមកទស្សនាសួនផ្កានេះ នឹងបានឃើញនូវភាពស្រស់ស្អាត និងប្លែកភ្នែក ធ្វើឱ្យអារម្មណ៍របស់លោកអ្នកស្រស់ស្រាយជាមិនខាន។
លោក គិម វណ្ណៈ អភិបាលស្រុកសូទ្រនិគម ខេត្តសៀមរាបបានមានប្រសាសន៍ថា នៅប៉ុន្មានឆ្នាំចុងក្រោយនេះ នៅភូមិសាស្រ្តស្រុកសូទ្រនិគមមានការអភិវឌ្ឍន៍រីកចម្រើន គួរឱ្យកត់សម្គាល់ មានដូចជាព្រលានយន្តហោះអន្តរជាតិសៀមរាបអង្គរ សួនត្រីក្រោមទឹក និងសួនផ្កា អង្គរ វ៉ូនឌើរ ហ្គាឌិននេះ ដែលនេះ គឺជាផលិតផលថ្មីៗសម្រាប់បម្រើឱ្យវិស័យទេសចរណ៍កម្ពុជា។ លោកបន្តថា សួនផ្កានេះ នឹងផ្តល់ប្រយោជន៍ជាច្រើនដល់សេដ្ឋកិច្ចប្រជាពលរដ្ឋនៅតំបន់នេះ ហើយលោកក៏អំពាវនាវឱ្យភ្ញៀវទេសចរមកកម្សាន្តនៅសួនផ្កានេះ ដើម្បីបានដឹងថា ផលិតផលទេសចរណ៍ថ្មីរបស់យើងស្រស់ស្អាត និងមានភាពទាក់ទាញប៉ុណ្ណា។ លោកបានអះអាងថា ការអភិវឌ្ឍទាំងនេះ ធ្វើទៅបាន គឺដោយសារតែប្រទេសមានសន្តិភាព។
ក្នុងឱកាសនោះដែរ ភ្ញៀវទេសចរជាតិដែលបានមកទស្សនាសួនផ្កានេះ បានលើកឡើងស្រដៀងគ្នាថា សួនផ្កានេះ ពិតជាស្អាត និងមានផ្កាច្រើនប្រភេទ ជាពិសេសការរៀបចំតុបតែង គឺមិនចាញ់សួនផ្កានៅបរទេសឡើយ។ សម្រាប់ភ្ញៀវទេសចរដែលមកលេងខេត្តសៀមរាប គួរតែបន្តមកទស្សនាសួនផ្កានេះ លោកអ្នកបានសប្បាយប្លែកអារម្មណ៍ មិនខកបំណងនោះឡើយ៕ ប្រភព៖ ទីភ្នាក់ងារសារព័ត៌មានកម្ពុជា
