នាយកដ្ឋានឧតុនិយមថៃ ចេញសារព្រមានថា ពីថ្ងៃទី១៥-១៦ ខែធ្នូ ប្រទេសថៃអាចជួបព្យុះភ្លៀង ទឹកជំនន់ អាកាសធាតុត្រជាក់ និងខ្យល់ខ្លាំង

(បាងកក)៖ នាយកដ្ឋានឧតុនិយមថៃ បានព្រមានថា នឹងមានភ្លៀងធ្លាក់កម្រិតច្រើនទៅធ្ងន់ធ្ងរ ទឹកជំនន់ភ្លាមៗ ហើយផ្នែកខាងលើនៃប្រទេសថៃ នឹងមានអាកាសធាតុត្រជាក់ខ្លាំង ខ្យល់បោកបក់ និងចុះត្រជាក់។ នេះបើយោងតាមការចេញផ្សាយកាសែត Khaosod នៅថ្ងៃចន្ទ ទី១៥ ខែធ្នូ ឆ្នាំ ២០២៥។

ចាប់ពីថ្ងៃទី ១៥ ដល់ថ្ងៃទី១៦ ខែធ្នូ ឆ្នាំ ២០២៥ តំបន់ភាគខាងត្បូងប្រទេសថៃ នឹងបន្តមានភ្លៀងធ្លាក់ខ្លាំង តាមតំបន់មួយចំនួន ពិសេសខេត្ត Phatthalung, Songkhla, Pattani, Yala, Narathiwat, Trang, និង Satun។ នេះ​ដោយសារ​ខ្យល់មូសុង​ឦសាន​មាន​កម្លាំង​ខ្លាំង​គួរសម ​ដែល​គ្របដណ្តប់​ឈូង​សមុទ្រ​ថៃ និង​ភាគខាងត្បូង​ប្រទេស​ថៃ​។

ចំពោះ​ស្ថានភាព​សមុទ្រ​នៅ​ឈូង​សមុទ្រ​ភាគ​ខាងក្រោម​នៃ​ប្រទេស​ថៃ ខ្យល់​នឹង​មាន​កម្លាំង​ខ្លាំង ដោយ​មាន​រលក​កម្ពស់​២ម៉ែត្រ ទៅ៣​ម៉ែត្រ។ នៅតំបន់ដែលមានព្យុះផ្គររន្ទះ រលកអាចលើសពី ៣ម៉ែត្រ។ ចំណែក​នៅ​សមុទ្រ​ Andaman ​ឆ្នេរ និង​តំបន់​ដែលមាន​ផ្គរ​រន្ទះ នឹង​មាន​រលក​ខ្ពស់​ជាង​២​ម៉ែត្រ​ ជាមួយខ្យល់បោកបក់ខ្លាំង។ នាយកដ្ឋានឧតុនិយម ក៏ព្រមានពីអាកាសធាតុចុះត្រជាក់ ខ្យល់បក់ខ្លាំង ភ្លៀងធ្លាក់ខ្លាំងនៅតំបន់ជាច្រើនផងដែរ៕ផ្ដល់សិទ្ធិដោយ៖ Fresh News