ឯកឧត្តមរដ្ឋមន្ត្រី ហួត ហាក់ ជំរុញការដោះស្រាយភាពមិនប្រក្រតីក្នុងវិស័យទេសចរណ៍ ដើម្បីលើកកម្ពស់ប្រសិទ្ធភាពការងារ និងការអនុវត្តច្បាប់

យោងតាមការចុះផ្សាយរបស់ ក្រសួងព័ត៌មាន បាន​ឱ្យដឹងថា នាថ្ងៃទី៣ ខែសីហា ឆ្នាំ២០២៦ នៅទីស្តីការក្រសួងទេសចរណ៍ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានដឹកនាំកិច្ចប្រជុំយ៉ាងសំខាន់ជាមួយក្រុមការងារចំពោះកិច្ច ដើម្បីពិនិត្យ និងតាមដានវឌ្ឍនភាពការងារ ព្រមទាំងស្វែងរកដំណោះស្រាយចំពោះភាពមិនប្រក្រតីនានាដែលកើតមានឡើងក្នុងវិស័យទេសចរណ៍។ កិច្ចប្រជុំនេះមានគោលបំណងពង្រឹងយន្តការគ្រប់គ្រងឱ្យកាន់តែមានប្រសិទ្ធភាព និងធានាឱ្យបាននូវការអនុវត្តច្បាប់ និងបទដ្ឋានគតិយុត្តពាក់ព័ន្ធឱ្យបានខ្ជាប់ខ្ជួនបំផុត។

ក្នុងកិច្ចប្រជុំនេះដែរ ក៏មានការចូលរួមពីសំណាក់ឯកឧត្តមរដ្ឋលេខាធិការប្រចាំការ រួមជាមួយឯកឧត្តម លោកជំទាវ ជាថ្នាក់ដឹកនាំក្រសួង អគ្គនាយក និងមន្ត្រីជំនាញមកពីអង្គភាពក្រោមឱវាទសរុបប្រមាណ ៤០រូប។ វត្តមានរបស់ថ្នាក់ដឹកនាំ និងមន្ត្រីជំនាញទាំងអស់នេះ គឺដើម្បីរួមគ្នាពិភាក្សា និងផ្ទៀងផ្ទាត់រាល់បញ្ហាដែលបានកើតឡើងក្នុងវិស័យទេសចរណ៍នាពេលកន្លងមក។

ក្រុមការងារចំពោះកិច្ចនេះ ត្រូវបានបង្កើតឡើងដោយមានតួនាទីស្នូលក្នុងការប្រមូលព័ត៌មាន លម្អិត សិក្សាស្រាវជ្រាវ និងផ្ទៀងផ្ទាត់អង្គហេតុឱ្យបានច្បាស់លាស់ពាក់ព័ន្ធនឹងភាពមិនប្រក្រតីនានា។ លើសពីនេះ ក្រុមការងារមានភារកិច្ចទទួលពិនិត្យ អង្កេត និងសម្របសម្រួលដោះស្រាយរាល់បណ្ដឹងតវ៉ា ឬបណ្ដឹងបរិហារផ្សេងៗពីសំណាក់រូបវន្តបុគ្គល និងនីតិបុគ្គល ដែលសកម្មភាពទាំងនោះអាចបង្កផលប៉ះពាល់អវិជ្ជមានដល់កិត្តិនាម និងការរីកចម្រើននៃវិស័យទេសចរណ៍ជាតិទាំងមូល៕

ប្រភព៖ ក្រសួងព័ត៌មាន