មហាសេដ្ឋី Elon Musk បាននិយាយកាលពីថ្ងៃអង្គារ ទី១០ ខែឧសភា ថា លោកនឹងលុបចោលការហាមឃាត់របស់ Twitter លើអតីតប្រធានាធិបតីអាមេរិក Donald Trump នៅពេលគាត់ទិញប្រព័ន្ធផ្សព្វផ្សាយសង្គមនេះរួចរាល់។ នេះ គឺជាសញ្ញាច្បាស់លាស់បំផុតមួយនៃចេតនារបស់ Musk ក្នុងការកាត់បន្ថយការសម្របសម្រួលនៃគេហទំព័រដ៏ល្បីល្បាញមួយនេះ។

Musk បាននិយាយទៅកាន់សន្និសីទ Financial Times ថា គាត់និងសហស្ថាបនិក Twitter លោក Jack Dorsey ជឿថាការហាមប្រាមជាអចិន្ត្រៃយ៍គួរតែជាករណី “កម្រ” ហើយត្រូវបានបម្រុងទុកសម្រាប់តែគណនីដែលដំណើរការ bots ឬផ្សព្វផ្សាយសារឥតបានការ។ ជាមួយគ្នានេះ លោកបានបន្ថែមថា “ខុស ឬ អាក្រក់” tweets គួរតែត្រូវបានលុប ឬធ្វើឱ្យមើលមិនឃើញ ហើយការផ្អាកគណនីបណ្តោះអាសន្នគឺល្អជាងការហាមឃាត់ជារៀងរហូត។

ទោះជាយ៉ាងនេះក្ដី លោក Donald Trump បានប្រាប់ Fox News ថា គាត់នឹងមិនត្រលប់ទៅប្រើ Twitter វិញទេ ប្រសិនបើត្រូវបានអនុញ្ញាតពិតមែន ខណៈកម្មវិធីប្រព័ន្ធផ្សព្វផ្សាយសង្គមផ្ទាល់ខ្លួនរបស់គាត់គឺ Truth Social បានបើកដំណើរការនៅលើកម្មវិធី Apple កាលពីចុងខែកុម្ភៈ។

គួរបញ្ជាក់ផងដែរថា ការផ្អាកគណនីរបស់លោក Trump ដែលមានអ្នកតាមដានជាង ៨៨លាននាក់ ត្រូវបានបិទថ្ងៃមុនការបញ្ចប់អាណត្តិរបស់គាត់។ Trump ត្រូវបានផ្អាកជាអចិន្ត្រៃយ៍ពី Twitter ភ្លាមៗបន្ទាប់ពីការវាយប្រហារនៅថ្ងៃទី០៦ ខែមករា ឆ្នាំ២០២១ លើវិមាន Capitol របស់សហរដ្ឋអាមេរិក៕ ផ្តល់សិទ្ធិដោយ៖ ខ្មែរណូត