(អាមេរិក)៖ រឿងរ៉ាវផ្អើលពិភពលោក ដែលតារាសម្តែងល្បីឈ្មោះ Will Smith បានឡើងទៅដល់លើឆាកនៃកម្មវិធី Oscars ទះកំផ្លៀង Chris Rock នោះ គឺបានកើតឡើងតាំងពីដើមឆ្នាំមកម្ល៉េះ ហើយរហូតមកទល់ពេលនេះ ហាក់បីដូចជាចប់សព្វគ្រប់អស់ហើយ។ តែយ៉ាងណានៅពេលនេះ តារាសម្ដែង Will Smith ស្រាប់តែបង្ហោះវីដេអូសុំទោសថ្មីដ៏រំជួលចិត្ត ចំពោះការទះកំផ្លៀង Chris Rock ដោយបង្ហាញក្នុងឃ្លីបវីដេអូដ៏វែងមួយនៅលើបណ្តាញសង្គម។ នេះបើតាមការចេញផ្សាយរបស់សារព័ត៌មាន Straits Times នៅថ្ងៃទី៣០ ខែកក្កដា ឆ្នាំ២០២២។

នៅក្នុងវីដេអូដែលបានបង្ហោះក្នុងបណ្តាញសង្គមកាលពីថ្ងៃសុក្រ ទី២៩ ខែកក្កដា ម្សិលមិញនេះ Smith បាននិយាយថាភរិយារបស់លោក គឺតារាសម្តែង Jada Pinkett Smith ដែលអង្គុយក្បែរលោក ហើយត្រូវបាន Rock យកទៅនិយាយលេងសើចចំអកអំពីនាង បានជំរុញឲ្យលោកក្នុងនាមជាប្តី ឡើងវាយប្រហារ Chrisk Rock តែម្តង។ Will Smith បានអះអាងថា ទង្វើបែបនេះ គឺជាការសម្រេចចិត្តរបស់លោកផ្ទាល់ ខណៈទង្វើនេះ គឺលោកសុំទោសផងដែរចំពោះ Pinkett-Smith និងកូនៗ។

ក្នុងវីដេអូនោះ លោកបានបន្តថា គ្មានផ្នែកណាមួយដែលលោកគិតថា ទង្វើនោះជាវិធីល្អបំផុត ដើម្បីដោះស្រាយអារម្មណ៍ទេព្រោះជាការដែលមិនគោរព ឬការប្រមាថ។ យ៉ាងណាមិញ គេសង្កេតឃើញថា ការចេញវីដេអូរបស់ Will Smith នៅពេលនេះ គឺបន្ទាប់ពី Rock នៅដើមខែនេះ អំឡុងពេលចូលរួមកម្មវិធីមួយ លោកបានបន្តនិយាយលេងសើច ពាក់ព័ន្ធនឹងការទះកំផ្លៀងថា «នរណាដែលនិយាយពាក្យឈឺចាប់ គឺមិនដែលត្រូវគេវាយចំមុខទេ…ខ្ញុំមិនមែនជាជនរងគ្រោះទេ…ខ្ញុំមិនទៅមន្ទីរពេទ្យទេ…»។

គួរជម្រាបថា បើគេនៅចាំមិនភ្លេច Smith បានធ្វើការសុំទោសជាសាធារណៈភ្លាមៗ បន្ទាប់ពីមានហេតុការណ៍ខាងលើកើតឡើង ហើយលោកត្រូវបានហាមឃាត់មិនឱ្យចូលរួមក្នុងកម្មវិធី Oscars រយៈពេល ១០ឆ្នាំ បន្ទាប់ពីការទះកំផ្លៀង Chris Rock។ បុរសវ័យ ៥៣ឆ្នាំរូបនេះ ក៏បានលាលែងពីសមាជិកភាពរបស់លោកពីកម្មវិធី Oscar ប៉ុន្តែមិនបានសម្រេច ខណៈឆ្នាំនេះ លោកទទួលបានពានរង្វាន់តារាសម្តែងល្អបំផុត សម្រាប់ការដើរជាតួអង្គ King Richard៕ ផ្តល់សិទ្ធិដោយ៖ freshnews