អ្នកវិទ្យាសាស្ត្រចិនបានរកឃើញមេរោគប្រភេទថ្មីមួយទៀត ដែលមាន ៣៥ ករណីហើយបានឆ្លងមេរោគនេះនៅខេត្ត Shandong និង Henan
កាលពីថ្ងៃទី៩ ខែសីហា គេហទំព័រព័ត៌មានផ្លូវការរបស់ចិន Global Times បានរាយការណ៍ថា មហាវិទ្យាល័យវិទ្យាសាស្ត្រចិន នៃវិទ្យាស្ថានមីក្រូជីវវិទ្យា និងរោគរាតត្បាត នៅទីក្រុងប៉េកាំង ជាមួយអ្នកវិទ្យាសាស្ត្រនៅសិង្ហបុរី ផ្សព្វផ្សាយអត្ថបទវេជ្ជសាស្ត្រតាមរយៈ New England Journal of Medicine ពួកគេបាននិយាយថា ពួកគេបានរកឃើញមេរោគថ្មីមួយដែលមានឈ្មោះថា “Langya henipavirus” ឬ “LayV” ដែលស្ថិតនៅក្រុមមេរោគ Nipah ដោយរកឃើញអ្នកឆ្លងដំបូងនៅក្នុងខេត្ត Shandong នៅក្នុងអំឡុងពេលមុនខែមករា ឆ្នាំ ២០១៩ មុនពេលដែលក្រុមចំនួន ១៤ ត្រូវបានរកឃើញ ហើយការស្រាវជ្រាវត្រូវតែបញ្ឈប់ដោយសារតែការផ្ទុះឡើងនៃ COVID-19 ។
យោងតាមសេចក្តីរាយការណ៍ព័ត៌មានបានបញ្ជាក់ដូច្នេះថា៖ មកទល់ពេលនេះ មនុស្ស៣៥នាក់បានឆ្លងមេរោគនេះហើយដោយស្ថិតនៅខេត្ត Shandong ភាគខាងកើត និងខេត្តហឺណាន។ ទោះបីជាយ៉ាងណាក៏ដោយ គ្រូពេទ្យមិនអាចបញ្ជាក់ការឆ្លងពីមនុស្សទៅមនុស្សបានទេ ប៉ុន្តែបាននិយាយថា អ្នកជំងឺមានប្រវត្តិទាក់ទងជាមួយសត្វ ដោយមេរោគនេះត្រូវបានគេគិតថា មានប្រភពចេញពីសត្វកកេរតូចៗ(shrews) ដែលអ្នកជំងឺមានរោគសញ្ញាស្រាល ដូចជាគ្រុនក្តៅ អស់កម្លាំង បាត់បង់ចំណង់អាហារ ឈឺសាច់ដុំ ប៉ុន្តែមិនមានករណីស្លាប់ដែលត្រូវបានរកឃើញនោះទេ។
យោងតាមអង្គការសុខភាពពិភពលោក (WHO) សត្វដែលឆ្លងមេរោគ Nipah នឹងមានរោគសញ្ញាធ្ងន់ធ្ងរ ហើយចំពោះមនុស្ស មេរោគនេះមានកម្រិតសុវត្ថិភាពជីវសាស្ត្រ នៅកម្រិតទី ៤ អត្រាខ្ពស់បំផុតនៃការឆ្លង និងការស្លាប់គឺស្ថិតនៅចន្លោះពី ៤០-៧៥% ដែលខ្ពស់ជាងមេរោគឆ្លង។ បច្ចុប្បន្ននេះ មិនទាន់មានវ៉ាក់សាំងការពារ និងមិនមានការព្យាបាលជាក់លាក់ណាមួយឡើយ ហើយអ្នកឆ្លងត្រូវបានព្យាបាលតាមរោគសញ្ញា ចំណែកអង្គការសុខភាពពិភពលោកបានចាត់ថ្នាក់មេរោគ Nipah គឺជាក្រុមមួយក្នុងចំនោមក្រុមមេរោគដែលមានឱកាសខ្ពស់បំផុតក្នុងការក្លាយជាជំងឺរាតត្បាត។
លោក Wang Linfa សាស្ត្រាចារ្យនៃកម្មវិធីជំងឺឆ្លងដែលកំពុងកើតមាន នៃវិទ្យាស្ថានវេជ្ជសាស្ត្រ Duke-NUS បាននិយាយថា មិនមានហេតុផលសម្រាប់ការភ័យស្លន់ស្លោចំពោះមេរោគ LayVនោះទេ ប៉ុន្តែធម្មជាតិនៃមេរោគនៅពេលដែលវាបានរាលដាលដល់មនុស្សមានផលវិបាកមិនអាចទាយទុកជាមុនបាន ហើយជឿថាវីរុសកូរូណា វាប្រហែលជាមិនមែនជាមេរោគចុងក្រោយដែលបណ្តាលឱ្យមានការរាតត្បាតធ្ងន់ធ្ងរដល់មនុស្សជុំវិញពិភពលោក ក៏ដូចជាប៉ះពាល់ដល់របៀបរស់នៅរបស់មនុស្សនោះទេ៕ ផ្តល់សិទ្ធិដោយ៖ ខ្មែរណូត
