ជនសង្ស័យយកដុំថ្មគប់កញ្ចក់រថយន្តគិលានសង្រ្គោះបន្ទាន់ បណ្ដាលឱ្យបែកកញ្ចក់ផ្នែកចំហៀងខាងឆ្វេងត្រូវបានសមត្ថកិច្ចឃាត់ខ្លួនភ្លាមៗ
ខេត្តកំពង់ស្ពឺ៖ យោងតាមការចុះផ្សាយរបស់ អធិការនគរបាលស្រុកគងពិសី បានឲ្យដឹងថា ជនសង្ស័យម្នាក់បានធ្វេីសកម្មភាពយកថ្មគប់ទៅលេីរថយន្ដគិលានសង្រ្គោះបន្ទាន់ AMBULANCE របស់មន្ទីរពេទ្យបង្អែកស្រុកគងពិសី ដែលកំពុងធ្វើដំណើរពីទិសត្បូងទៅជើង ដេីម្បីទៅយកសំណាកធ្វើតេស្តអ្នកសង្ស័យវិជ្ជមានកូវីដ-១៩ នៅក្នុងឃុំព្រះនិព្វាន កាលពីថ្ងៃទី១៩ ខែឧសភា ឆ្នាំ២០២១ លុះមកដល់ចំណុចខាងជើងបង្គោលគីឡូម៉ែត្រលេខ១៣ ប្រហែល ២០ម៉ែត្រ ស្ថិតលើផ្លូវជាតិលេខ៤១ ស្ថិតក្នុងភូមិសម្តេចឪ ឃុំព្រៃញាតិ ស្រាប់តែបុរសម្នាក់មិនដឹងអំពីមូលហេតុច្បាស់លាស់ធ្វើសកម្មភាពគប់កញ្ចក់រថយន្តរួចគេចខ្លួន។
ភ្លាមៗនោះកំលាំងមានសមត្ថកិច្ចបានបន្ដស្រាវជ្រាវរហូតឃាត់ខ្លួនមុខសញ្ញាសង្ស័យម្នាក់ឈ្មោះ វ៉ិត សត់ ភេទប្រុស អាយុ ២៩ឆ្នាំ រស់នៅភូមិ-ឃុំខាងលើ តាមការសាក្សីនៅកន្លែងកេីតហេតុនិងចម្លេីយបឋមបុរសខាងលេីទទួលស្គាល់ថាខ្លួនពិតជាបានយកដុំថ្មគប់កញ្ចក់រថយន្ត គិលានសង្រ្គោះបន្ទាន់ AMBULANCE មូលហេតុពិតប្រាកដមែន។ ចំពោះករណីខាងលើ សមត្ថកិច្ចនគរបាលស្រុកគងពិសីបានយកមកសាកសួរនៅអធិការដ្ឋាននគរបាលស្រុក រួចកសាងសំណុំរឿងបញ្ជូនទៅការិយាល័យជំនាញខេត្ដ ចំណាត់ការនីតិវិធីបន្ដ ៕ ប្រភព៖ ស្នងការដ្ឋាននគរបាលខេត្តកំពង់ស្ពឺ
អត្ថបទទាក់ទង
