អភិបាលរាជធានីភ្នំពេញ ណែនាំឱ្យអាជ្ញាធរបន្ថែមកម្លាំងទប់ទឹកតាមសណ្តរស្ទឹងព្រែកត្នោត និងតម្រូវឱ្យផ្អាកការធ្វើចរាចរណ៍សម្រាប់រថយន្តធំៗលើផ្លូវលេខ២០អា
- BY
- Khmerpress
- January 16, 2023
រាជធានីភ្នំពេញ៖ យោងតាមការចុះផ្សាយរបស់ ក្រសួងព័ត៌មាន នៅថ្ងៃទី១៦ ខែមករា ឆ្នាំ២០២៣ បានឱ្យដឹងថា កំណាត់ផ្លូវលេខ២០អា ត្រូវបានអាជ្ញាធររាជធានីភ្នំពេញសម្រេចបិតជាបណ្តោះអាសន្ន មិនឱ្យរថយន្តធំៗធ្វើចរាចរណ៍ឆ្លងកាត់នោះទេ ខណៈកម្រិតទឹកស្ទឹងព្រែកត្នោបានហក់ឡើងបណ្ដាលឱ្យជន់លិចលំនៅឋានប្រជាពលរដ្ឋ ដែលចំនួនធំបានទទួលរងលិចលង់ រហូតត្រូវចាកចេញមករកទីទួលសុវត្ថិភាព និងប្រក់តង់ស្នាក់នៅជាបណ្ដោះអាសន្ន។
ឯកឧត្ដម ឃួង ស្រេង អភិបាលរាជធានីភ្នំពេញ កាលពីរសៀលថ្ងៃទី១៥ ខែមករា ឆ្នាំ២០២៣ បានបានដឹកនាំមន្ត្រីជំនាញចុះពិនិត្យស្ថានភាពជាក់ស្ដែងនៅតាមទីតាំងដែលទឹកជំនន់ទឹកភ្លៀងបានហូរចូលលំនៅឋានបងប្អូនប្រជាពលរដ្ឋក្នុងខណ្ឌដង្កោ។
ឯកឧត្ដម ឃួង ស្រេង បានណែនាំឱ្យបន្ថែមកម្លាំងទប់ទឹកនៅតាមសណ្តរស្ទឹងព្រែកត្នោតនិងតម្រូវឱ្យផ្អាកការធ្វើចរាចរណ៍បណ្តោះអាសន្តរថយន្តធំៗផ្លូវខាងមុខសាលាសង្កាត់គងនយ។ ជាមួយគ្នានេះ ឯកឧត្ដមអភិបាលរាជធានីភ្នំពេញក៏បានណែនាំឱ្យមន្រ្តីក្រសួងធនធានទឹកនិងឧតុនិយម ព្រមទាំងអាជ្ញាធរខណ្ឌដង្កោ កងកម្លាំនគរបាលខណ្ឌ កងរាជអាវុធហត្ថខណ្ឌ ព្រមទាំងកងកម្លាំងប្រដាប់អាវុធនានាបានប្រចាំការតាមដានស្ថានភាពទឹកជាប់ជាប្រចាំ។ ទន្ទឹមនេះ អាជ្ញាធរ និងប្រជាពលរដ្ឋបានច្រកដីខ្សាច់ទប់ទឹកដែលកំពុងហៀរចេញពីស្ទឹងមកលើផ្លូវប្របមាត់ស្ទឹង ហើយការទប់ទឹកនេះ ដើម្បីកុំឱ្យទឹកហូរ កាត់ផ្ដាច់ផ្លូវនៅតំបន់សណ្ដរស្ទឹង និងគំរាមកំហែងដល់ផ្លូវទំនប់សណ្ដរស្ទឹងផងដែរ។
លោក ម៉ៅ ប៊ុនធឿន ប្រធានមន្ទីរធនធានទឹក និងឧតុនិយមរាជធានីភ្នំពេញបានឱ្យដឹងថា ស្ថានភាពជំនន់នៅខេត្ដកំពង់ស្ពឺបានស្រកហើយ ដូច្នេះ រាជធានីភ្នំពេញ អាចស្រកនៅល្ងាចនេះ ឬស្អែក ដែលទឹកមិនអាចគម្រាមកំហែងរាជធានីភ្នំពេញបានឡើយ។
ឯកឧត្ដម ឃួង ស្រេង បានណែនាំឱ្យមន្ត្រីជំនាញ ខិតខំយកចិត្តទុកដាក់ និងតាមដានឱ្យបានជាប់ជាប្រចាំ ជាពិសេសត្រូវបន្ថែមកម្លាំង រួមជាមួយបាវ និងខ្សាច់ សម្រុកទប់ដើម្បីកុំឱ្យមានទឹកហូរចេញ ព្រោះថា បើទប់យប់នេះបាន នឹងមិនមានការលិចលង់ឡើយ ដោយហេតុថា ជំនន់ទឹកភ្លៀងនៅខេត្ដកំពង់ស្ពឺបានចាប់ផ្តើមស្រកហើយ។ ឯកឧត្ដមក៏បានជំរុញឱ្យអាជ្ញាធរ និងសមត្ថកិច្ចជំនាញ សហការជាមួយអាជ្ញាធរខេត្តកណ្ដាល ឱ្យផ្អាកការធ្វើចរាចរណ៍ឡានធំនៅផ្លូវលេខ២០អា ឬផ្លូវមុខសាលាសង្កាត់គងនយជាបណ្តោះអាសន្ន។
សូមជម្រាបជូនថា ទឹកបានចាប់ផ្ដើមឡើងខ្លាំងនៅថ្ងៃទី១២ ខែមករា ឆ្នាំ២០២៣ ប៉ុន្តែមិនបានឡើងពេញប្រៀបស្ទឹងភ្លាមៗនោះឡើយ ប៉ុន្ដែរហូតមកដល់វេលាយប់រំលងអធ្រាត្រឈានចូលថ្ងៃទី១៤ ខែមករា ស្រាប់តែឡើងយ៉ាងគំហុកពេញច្រាំងនិងហៀរចូលលិចលំនៅឋានប្រជាពលរដ្ឋយ៉ាងឆាប់រហ័ស។ គ្រោះធម្មជាតិនេះបានធ្វើឱ្យផ្ទះប្រជាពលរដ្ឋ ជាង១ពាន់ខ្នង ដែលមាន២៥ ភូមិ ស្មើនឹង១០សង្កាត់ នៅក្នុងខណ្ឌដង្កោ រាជធានីភ្នំពេញ ត្រូវចាកចេញឡើងគោករកកន្លែងសុវត្ថិភាព៕ ប្រភព៖ ក្រសួងព័ត៌មាន
- Share This Post: