ឱក សុគន្ធកញ្ញា, សុគន្ធ នីសា, វណ្ណដា… នឹងរួមគ្នាអង្រួនឆាកតន្ត្រីអបអរសាទរខួប៣ឆ្នាំនៃវត្តមានផ្លាកលេខពិសេស
- BY
- Naren
- March 2, 2023
(ភ្នំពេញ)៖ តារាចម្រៀងជួរមុខដ៏ល្បាញល្បីនៅកម្ពុជា អ្នកនាង ឱក សុគន្ធកញ្ញា, អ្នកនាង សុគន្ធ នីសា, តារាចម្រៀងរ៉េប លោក ម៉ាន់ វណ្ណដា ហៅវណ្ណដា រួមជាមួយតារាចម្រៀងល្បីៗជាច្រើនរូបទៀត នឹងរួមគ្នាអង្រួនឆាកតន្ត្រីនាថ្ងៃទី៧ និងទី៨ ខែមីនា នេះ លើសួនច្បារមុខវត្តបទុមវតី។
ការប្រគំតន្ត្រីនេះរៀបចំឡើងដោយក្រសួងសាធារណការ និងដឹកជញ្ជូន ដើម្បីអបអរសាទរខួប៣ឆ្នាំនៃការដាក់លក់ផ្លាក់លេខពិសេស (ផ្លាកលេខ «កម្ពុជា») នៅក្នុងប្រទេសកម្ពុជា។
ព្រឹត្តិការណ៍នេះ ប្រារព្ធឡើងក៏ដើម្បីផ្សព្វផ្សាយសុវត្ថិភាពចរាចរណ៍ និងកៀរគរថវិកាសប្បុរសធម៌ជួយដល់មន្ទីរពេទ្យគន្ធបុប្ផា និងមន្ទីរពេទ្យកុមារជាតិផងដែរ។
ក្រៅតែពីការប្រគំតន្ត្រីកម្សាន្តហើយនោះ ក្នុងព្រឹត្តិការណ៍ខាងលើនេះ ក៏មានការតាំងពិព័រណ៍ផ្លាកលេខ និងរថយន្ត ព្រមទាំងការលក់ និងដេញថ្លៃលេខចុះបញ្ជីពិសេសផ្ទាល់ខ្លួនផងដែរ។
កម្មវិធីនេះនឹងរៀបចំចាប់ពីវេលាម៉ោង ៨ព្រឹក ដល់ម៉ោង ៩យប់៕ ផ្តល់សិទ្ធិដោយ៖ FRESH NEWS
- Share This Post: