ស.ស.យ.ក ចាប់ផ្តើមរាប់បេះដូងដែលបានរៀបចំជា «សួនបេះដូង» នៅបរិវេណប្រាសាទអង្គរវត្ត ដើម្បីបំបែកកំណត់ត្រាពិភពលោក បេះដូងច្រើនជាងគេលើពិភពលោក
(សៀមរាប)៖ បន្ទាប់ពីរៀបចំជា «សួនបេះដូង» ប៉ុន្មានថ្ងៃកន្លងមក នៅថ្ងៃទី១០ ខែមេសា ឆ្នាំ២០២៣ ក្រុមការងាររបស់សហភាពសហព័ន្ធយុវជនកម្ពុជា បានចាប់ផ្តើមរាប់បេះដូង ដើម្បីឈានទៅបំបែកកំណត់ត្រាពិភពលោក «បេះដូងច្រើនជាងគេលើពិភពលោក» ដែលប្រព្រឹត្តទៅនៅថ្ងៃទី១១ ខែមេសា ឆ្នាំ២០២៣ វេលាម៉ោង ១៦:០០ នៅខាងក្នុងបរិវេណប្រាសាទអង្គវត្ត។
សូមបជ្រាបថា បេះដូងដែលបានរៀបចំជា «សួនបេះដូង» គឺបានមកពីការចូលរួមបត់បេះដូងពីពុកម៉ែ បងប្អូនប្រជាពលរដ្ឋ សិស្សានុសិស្ស និងយុវជនគ្រប់ទិសទីរួចមក ពេលនេះបេះដូងត្រូវបានរៀបចំជា «សួនបេះដូង» លើទឹកដីអង្គរដ៏ពិសិដ្ឋនៃយើងទាំងអស់គ្នា ត្រៀមបង្ហាញភ្ញៀវជាតិ និងអន្តរជាតិ ជាពិសេសបង្ហាញពីកិត្យានុភាព នៃការរួបរួមសាមគ្គីភាពរបស់ប្រជាជនកម្ពុជា និងត្រៀមបំបែកកំណត់ត្រាពិភពលោក «បេះដូងច្រើនជាងគេលើពិភពលោក» ហេីយការប្រកាសលទ្ធផលនៃការរាប់បេះដូងនេះ ក៏បង្ហាញនូវវប្បធម៌អរូបិយ ដែលបានចុះក្នុងបញ្ជីបេតិកភណ្ឌពិភពលោកផងដែរ។
ជាមួយនេះដែរ សហភាពសហព័ន្ធយុវជនកម្ពុជា ក៏បានអំពាវនាវដល់ពុកម៉ែ បងប្អូនប្រជាពលរដ្ឋ យុវជនចូលរួមក្នុងដោតបេះដូង និងរាប់បេះដូង ព្រមទាំងការប្រកាសលទ្ធផលនៃការបំបែកឯកគត្តកម្មពិភពលោក ឱ្យបានច្រើនកុះករផងដែរ៕ ផ្តល់សិទ្ធិដោយ៖ freshnews
