(ភ្នំពេញ )៖ ធឹ្នមបណ្តោយស្ពានទាំង ៩ប្រឡោះ (មួយប្រឡោះចំនួន ៤ធ្នឹម) នៃគម្រោងស្ពានលេខ២៨ តាមបណ្តោយផ្លូវជាតិលេខ១០ ដែលបច្ចុប្បន្នជាស្ពានខ្ពស់ជាងគេនៅកម្ពុជា បានដំឡើងរួចរាល់ហើយ។ នេះបើតាមបញ្ជាក់ពីលោក ផន រឹម អ្នកនាំពាក្យក្រសួងសាធារណការ និងដឹកជញ្ជូន ឱ្យដឹងនៅព្រឹកថ្ងៃទី៩ ខែមីនា ឆ្នាំ២០២៥នេះ។ លោក ផន រឹម បានបន្ថែមថា គម្រោងសមិទ្ធផលស្ពានគួរជាទីមោទកភាពនេះ មានកម្ពស់ ៩០ម៉ែត្រ ប្រវែងសរុប ៥៣៧ម៉ែត្រ ទទឹង ១០ម៉ែត្រ បានសណ្តូកខ្លួនឆ្លងកាត់ស្ទឹងឫស្សីជ្រុំ ស្ថិតនៅភូមិឆាយលូក ឃុំអូសោម ស្រុកវាលវែង ខេត្តពោធិ៍សាត់។ កិច្ចការបន្ទាប់គឺជាដំណើរការរុះរើរន្ទា ( Erection Marchine )រៀបចំចាក់បេតុងធ្នឹមកាត់ទទឹង, ចាក់បេតុងកម្រាល, រៀបចំបង្កាន់ដៃ និងចាក់AC(Asphalt concrete)បំពាក់ស្លាកសញ្ញាសុវត្ថភាព ជាកិច្ចបង្ហើយ។ សូមជម្រាបជូនថា ស្ពាននេះនឹងត្រូវដាក់ឱ្យប្រជាពលរដ្ឋប្រើប្រាស់សាកល្បង មុនពិធីបុណ្យចូលឆ្នាំថ្មី ប្រពៃណីជាតិខ្មែរខាងមុខនេះ និងគ្រោងបញ្ចប់ការសាងសង់ស្ថាពរ នាអំឡុងខែមិថុនា ឆ្នាំ២០២៥នេះ៕ ផ្ដល់សិទ្ធិដោយ៖ Freshnews

(តាកែវ)៖ ក្រសួងទេសចរណ៍ សហការជាមួយរដ្ឋបាលខេត្តតាកែវ នៅថ្ងៃទី៨ ខែមីនា ឆ្នាំ២០២៥នេះ បានរៀបចំព្រឹត្តិការណ៍ជិះកង់ចម្ងាយ ៧៥គីឡូម៉ែត្រ ដោយចេញពីទីស្ដីការក្រសួងទេសចរណ៍ ឆ្ពោះទៅទីរួមខេត្តតាកែវ។ លោក វ៉ី សំណាង អភិបាលខេត្តតាកែវ បានថ្លែងថា ការរៀបចំព្រឹត្តិការណ៍ជិះកង់នេះឡើង ដើម្បីអបអរសាទរទិវាសិទ្ធនារី៨មីនា និងព្រឹត្តិការណ៍បុណ្យទន្លេលើកទី៩ នៅខេត្តតាកែវ ក្រោមប្រធានបទ «គុណតម្លៃ នៃទន្លេ ផ្សារភ្ជាប់វប្បធម៌ និងទេសចរណ៍ធម្មជាតិ» ដែលនឹងរៀបចំចាប់ពីថ្ងៃទី២១ ដល់ថ្ងៃទី២៣ ខែមីនា ឆ្នាំ២០២៥។ លោកអភិបាលខេត្តតាកែវ បានបន្ដថា ដើម្បីចូលរួមស្វាគមន៍ក្បួនកង់ មកពីរាជធានីភ្នំពេញ មកដល់ទឹកដីនៃខេត្តតាកែវ រដ្ឋបាលខេត្ត ក៏នឹងរៀបចំទទួលបបរបង្កង និងពងទាកូន ដែលជាម្ហូបដ៏មានសក្ដានុពលបំផុត ក្នុងខេត្តតាកែវ នៅសួនច្បារមាត់បឹងតាកែវផងដែរ។ លោក វ៉ី សំណាង បានថ្លែងនូវការអរគុណ និងកោតសរសើរចំពោះប្រិយមិត្តដែលជាកីឡាករ កីឡាការិនីទាំងអស់ ដែលបានចំណាយពេលវេលា និងធនធានផ្ទាល់ខ្លួន សម្រាប់ការចូលរួមនៅក្នុងព្រិត្តិការជិះកង់នៅថ្ងៃនេះ៕ ផ្ដល់សិទ្ធិដោយ៖ Freshnews

(ព្រះសីហនុ)៖ ដោយមានការយកចិត្តទុកដាក់ខ្ពស់ និងជម្រុញការលើកទឹកចិត្តទៅលើវិស័យកសិកម្មនៅរសៀលថ្ងៃទី៧ ខែមីនា ឆ្នាំ២០២៥នេះ លោក វង្ស ផាណាត ប្រធានក្រុមប្រឹក្សាខេត្តព្រះសីហនុ និងលោក ម៉ាង ស៊ីណេត អភិបាលខេត្ត បានដឹកនាំមន្ត្រីជំនាញអាជ្ញាធរមូលដ្ឋានចុះទស្សនកិច្ចនៅមជ្ឈមណ្ឌលផ្គត់ផ្គង់បន្លែ និងផ្លែឈើ «ហ័រ ណុង ហ៊ុយ អេកូឡូជីខល ឯ.ក» ដែលមានផ្ទៃដីប្រមាណជាង៣ហិកតា នៅឃុំកំពង់សិលា ស្រុកកំពង់សិលា ខេត្តព្រះសីហនុ។ ក្រោយទស្សនកិច្ចមើលផលដំណាំជាច្រើនប្រភេទ ដែលកំពុងមានការលូតលាស់បានយ៉ាងល្អ ក្រោមការខិតខំប្រឹងប្រែងរបស់មជ្ឈមណ្ឌលផ្គត់ផ្គង់បន្លែ និងផ្លែឈើរួចមក លោក ម៉ាង ស៊ីណេត បានថ្លែងអំណរគុណដល់ម្ចាស់ ដែលបានជឿជាក់លើរាជរដ្ឋាភិបាលកម្ពុជា ក្នុងការបោះទុនវិនិយោគជាង៣លានដុល្លាលើដំណាំបន្លែផ្លែឈើធម្មជាតិមួយនេះ។ អភិបាលខេត្ត បានធ្វើការគាំទ្រឲ្យមជ្ឈមណ្ឌពង្រីកអាជីវកម្មរបស់ខ្លួនបន្ថែមទៀត ដើម្បីកំណើនការងារជូនប្រជាពលរដ្ឋក្នុងខេត្ត ហើយរដ្ឋបាលខេត្ត និងរង់ចាំជួយសម្របសម្រួលបញ្ហាប្រឈមនានានៅក្នុងកសិដ្ឋានគ្រប់ពេលវេលា ព្រមទាំងបានសូមជូនពរឱ្យកសិដ្ឋានដំណើរការដាំដុះបន្លែផ្លែឈើធម្មជាតិប្រកបដោយផ្លែផ្កាល្អបន្ថែមទៀតនៅពេលខាងមុខ។ ថ្លែងប្រាប់បណ្តាញព័ត៌មាន ម្ចាស់មជ្ឈមណ្ឌលពិតជាចាប់អារម្មណ៍ខ្លាំងលើការអំណោយផលក្នុងការដាំដុះដែលផ្ទុយពីបណ្តាប្រទេសមួយចំនួន មានអាកាសធាតុក្តៅពេក និងត្រជាក់ពេកធ្វើឲ្យការដាំផ្លែទំពាំងបាយជូរ ម្ទេស ប៉េងប៉ោះ ខាត់ណាស្រួយ ផ្ទី កាឆាយ ដើមជន្លង់ ត្រសក់ ចិញ្ចឹមត្រី និងដំណាំរួមផ្សំមួយចំនួនទៀតពិបាកថែរទាំ ហើយជំហ៊ានទីមួយរបស់មជ្ឈមណ្ឌលបានចំណាយទុកប្រមាណជាង ៣លានដុល្លា ថែមទាំងបានផ្តល់ឱកាសការងារ […]

(ភ្នំពេញ)៖ លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី៩ ខែមីនា ឆ្នាំ២០២៥នេះ បានចេញមកបញ្ជាក់អំពីស្ថានភាពតម្លៃគ្រាប់ស្វាយចន្ទីឆៅ បន្ទាប់ពីនាពេលថ្មីៗនេះ មានការដកស្រង់សម្ដីរបស់ប្រធានសហព័ន្ធស្វាយចន្ទីកម្ពុជា លោក អួន ស៊ីឡុត ថាបច្ចុប្បន្ននេះតម្លៃគ្រាប់ស្វាយចន្ទីឆៅមានការធ្លាក់ចុះជាគំហុក បង្កើតឱ្យមានការភ័ន្តច្រឡំ។ លោកបានបញ្ជាក់ថា តម្លៃគ្រាប់ស្វាយចន្ទីឆៅតែងមានការខុសប្លែកគ្នាតាមរដូវ នៅដើមរដូវ និងនៅពេលរដូវប្រមូលផលច្រើន។ លោកបានបន្តថា នេះគ្រាន់តែជាការប្រែប្រួលតម្លៃតាមនិន្នាការធម្មតា តែងតែកើតមានឡើងជារៀងរាល់ឆ្នាំតែប៉ុណ្ណោះ។ ទន្ទឹមនឹងនេះ អ្នកនាំពាក្យក្រសួងកសិកម្មបានបន្តថា បើយើងប្រៀបធៀបតម្លៃគ្រាប់ស្វាយចន្ទីឆៅក្នុងខែមីនា ឆ្នាំ២០២៥ ទៅនឹងតម្លៃកាលពីក្នុងខែមីនា ឆ្នាំ២០២៤ ឃើញថាឆ្នាំនេះនៅមានតម្លៃល្អជាងនៅឡើយ។ ជាមួយគ្នានេះ លោក ឃឹម ហ្វីណង់ បានគូសបញ្ជាក់បន្ថែមថា ស្ថានភាពតម្លៃប្រែប្រួលមិនមែនកើតឡើង ដោយសារការក្រឡុកតម្លៃពីឈ្មួញនោះទេ ខណៈដែលក្រសួងកសិកម្មបានយកចិត្តទុកដាក់យ៉ាងខ្លាំង ចំពោះតម្លៃកសិផលសំខាន់ៗ។ លោកបានបន្ថែមថា ប្រសិនជាតម្លៃគ្រាប់ស្វាយចន្ទីឆៅមានការប្រែប្រួលខ្លាំងមែននោះ ក្រសួងនឹងធ្វើអន្តរាគមន៍ភ្លាមៗ។ ជាថ្មីម្ដងទៀត អ្នកនាំពាក្យរូបនេះ បានស្នើសុំឱ្យមានការផ្សព្វផ្សាយព័ត៌មានពាក់ព័ន្ធនឹងទីផ្សារគ្រាប់ស្វាយចន្ទីឱ្យបានត្រឹមត្រូវ គ្រប់ជ្រុងជ្រោយ ដើម្បីផ្ដល់ទិន្នន័យពិតប្រាកដជូនទៅសាធារណជន និងប្រជាពលរដ្ឋដែលជាកិសករ ចៀសវាងធ្វើឱ្យមានការភ័ន្តច្រឡំណាមួយ៕ ផ្ដល់សិទ្ធិដោយ៖ Freshnews

(ភ្នំពេញ)៖ ក្រសួងបរិស្ថាន ជូនដំណឹងអំពីស្ថានភាពគុណភាពខ្យល់ នៅក្នុងព្រះរាជាណាចក្រកម្ពុជា សម្រាប់ថ្ងៃទី៨ ខែមីនា ឆ្នាំ២០២៥ ចាប់ពីម៉ោង ៦ល្ងាច ដល់ម៉ោង ៦ព្រឹកថ្ងៃទី៩ ខែមីនា ឆ្នាំ២០២៥ ដែលមានកំហាប់ភាគល្អិតនិចលគិតជាមធ្យមស្មើនឹង១៧.៦៦ µg/m3 ធៀបនឹងស្តង់ដារ ៥០ ug/m3 និងគិតជាសន្ទស្សន៍គុណភាពខ្យល់ (Air Quality Index) គឺ «ល្អណាស់»។ ពណ៌ខៀវៈ គុណភាពខ្យល់ល្អណាស់មានខេត្តបាត់ដំបង ខេត្តកំពង់ឆ្នាំង ខេត្តព្រៃវែង ខេត្តកែប ខេត្តក្រចេះ ខេត្តមណ្ឌលគីរី ខេត្តត្បូងឃ្មុំ ខេត្តកំពត ខេត្តកំពង់ចាម ខេត្តស្វាយរៀង ខេត្តព្រះសីហនុ ខេត្តកំពង់ធំ ខេត្តកំពង់ស្ពឺ ខេត្តកោះកុង ខេត្តពោធិ៍សាត់ ខេត្តព្រះវិហារ រាជធានីភ្នំពេញ ខេត្តប៉ៃលិន ខេត្តស្ទឹងត្រែង ខេត្តរតនគិរី ខេត្តតាកែវ ខេត្តសៀមរាប និងខេត្តឧត្តរមានជ័យ, ពណ៌បៃតងៈ គុណភាពខ្យល់ល្អមាន ខេត្តបន្ទាយមានជ័យ និងខេត្តកណ្តាល៕ ផ្ដល់សិទ្ធិដោយ៖ Freshnews

(ស្វាយរៀង)៖ លោក អម មង្គល រដ្ឋលេខាធិការក្រសួងមហាផ្ទៃ បានសម្រេចប្រគល់ភារកិច្ចជូន អគ្គស្នងការដ្ឋាននគរបាលជាតិ ដើម្បីអនុវត្តវិន័យលើមន្ត្រីនគរបាលចំនួន៤រូប នៃអធិការដ្ឋាននគរបាលស្រុកស្វាយទាប ខេត្តស្វាយរៀង។ ក្នុងលិខិតដែលត្រូវបានចែកចាយនៅថ្ងៃទី៨ ខែមីនា ឆ្នាំ២០២៥នេះ លោក អម មង្គល បានសម្រេចឲ្យដកហូតតួនាទីលោកវរសេនីយ៍ទោ សោម សារ៉ន អធិការនគរបាលស្រុកស្វាយទាប និងបន្ថយឋានន្តរស័ក្តិចំនួន២ថ្នាក់។ ជាមួយគ្នានោះ ក្រសួងមហាផ្ទៃ ក៏បានសម្រេចដាក់ពិន័យលើលោកវរសេនីយ៍ត្រី វ៉ា សំណាង អធិការរងផ្នែកនគរបាលយុត្តិធម៌, លោកអនុសេនីយ៍ឯក ផាត់ ផល នាយរងផ្នែកអន្តោប្រវេសន៍ និងលោកអនុសេនីយ៍ឯក កឹម ស៊ីថុន នាយរងផ្នែកយុត្តិធម៌ នៃអធិការដ្ឋានគនរបាលស្រុកស្វាយទាប តាមរូបភាពព្រមានជាលាយលក្ខណ៍អក្សរលើកទី១។ ការសម្រេចដាក់ពិន័យលើមន្ត្រីនគរបាលស្រុកស្វាយទាបទាំង ៤នាក់ខាងលើ បានធ្វើឡើងបន្ទាប់ពីក្រសួងមហាផ្ទៃរកឃើញថា បានសមគំនិតគ្នាលួចលក់វត្ថុតាង នៃបទល្មើសចរាចរណ៍ រួមមានឡាកាម៉ារីឆ្លាម ១គ្រឿង និងគោយន្តកន្ត្រៃ ១គ្រឿង។ ជាមួយគ្នានោះ មន្ត្រីទាំង៤នាក់ខាងលើ បានតម្រូវឲ្យមន្ត្រីនគរបាលក្រោមឱវាទបង់ប្រាក់ចំនួន៥០០ដុល្លារ ជាថ្នូរនឹងការតែងតាំងមុខតំណែង និងដំឡើងឋានន្តរស័ក្តិ។ ជាងនេះទៅទៀត មន្ត្រីទាំង៤នាក់នេះ បានបង្គាប់ឲ្យអាណាព្យាបាលជនសង្ស័យគ្រឿងញៀន បង់ប្រាក់ឲ្យពួកគេក្នុងម្នាក់ៗ២០០ដុល្លារ ជាថ្នូរនឹងការដោះលែង។ […]

(កំពង់ចាម)៖ លោក អ៊ុន ចាន់ដា ប្រធានសាខាកាកបាទក្រហមកម្ពុជា ខេត្តកំពង់ចាម រួមជាមួយសហការី នៅព្រឹកថ្ងៃសៅរ៍ ទី៨ ខែមិនាឆ្នាំ២០២៥ នេះ បានអញ្ជើញចុះសួរសុខទុក្ខ និងនាំយកអំណោយមនុស្សធម៌ របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ផ្តល់ជូនអាជីវករលក់អាគុយ ម៉ូតូ កង់ ១៧គ្រូសារ រស់នៅភូមិទី៨ សង្កាត់កំពង់ចាម ក្រុងកំពង់ចាម ដែលរងគ្រោះដោយអគ្គីភ័យ មូលហេតុឆ្លងចរន្តអគ្គិសនី ធ្វើឲ្យតូបអាជីវកម្ម ១៧ ល្វែងជាប់ៗគ្នា ត្រូវភ្លើងឆាបឆេះអស់ទាំងស្រុងតែម្តង ដែលហេតុការណ៍នេះ កើតឡើង កាលពីម៉ោងជិត១២ អាធ្រាត្រ ថ្ងៃទី៧ ខែមីនា ឆ្នាំ២០២៥៕ ស្ថិតក្នុងឱកាសចុះសួរសុខទុក្ខនោះ លោក អ៊ុន ចាន់ដា ប្រធានគណ:កម្មាធិការសាខា បានសម្តែងការសោកស្តាយជាពន់ពេក ជាមួយគ្រួសារជនរងគ្រោះ  ចំពោះ ឧបត្តិហេតុដែលកើតឡើងស្មានមិនដល់នេះ នាំអោយខូចខាតទាំងលំនៅដ្ឋាន តូបអាជីវកម្ម បាត់បង់ទាំងសម្ភារ: កង់ ម៉ូតូ អស់ជាច្រើនគ្រឿង ដែលតាំងលក់ គិតប៉ាន់ស្មានតម្លៃជាទឹកប្រាក់ខូចខាតអស់ប្រមាណជាជិត ២,០០០,០០០ ដុល្លារអាមេរិក។ […]

(កំពង់ចាម)៖ នៅយប់រំលងអធ្រាត្រឈានចូលថ្ងៃទី៨ ខែមីនា ឆ្នាំ២០២៥នេះ មានករណីអគ្គីភ័យឆាប់ឆេះផ្ទះប្រជាពលរដ្ឋយ៉ាងសន្ធោសន្ធៅ ស្ថិតនៅចំណុចភូមិទី៨ សង្កាត់កំពង់ចាម ក្រុងកំពង់ចាម ខេត្តកំពង់ចាម។ ក្រោយទទួលព័ត៌មានភ្លាមនោះ លោកឧត្តមសេនីយ៍ទោ ហេង វុទ្ធី ស្នងការនគរបាលខេត្តកំពង់ចាម បានដឹកនាំបញ្ជាកម្លាំងដោយផ្ទាល់ជួយអន្តរាគមន៍ ដោយមានរថយន្តពន្លត់អគ្គីភ័យ ចំនួន១០គ្រឿង ក្នុងនោះរថយន្តខេត្ត ចំនួន៣គ្រឿង និងតាមបណ្ដាក្រុង/ស្រុក ចំនួន៧គ្រឿង ដើម្បីអន្តរាគមន៍ជាបន្ទាន់។ ក្នុងករណីអគ្គិភ័យឆាប់ឆេះនេះបណ្ដាលឲ្យឆេះផ្ទះអស់ ចំនួន១៧ល្វែង តែមិនមានប៉ះពាល់ដល់អាយុជីវិតមនុស្សឡើយ ដោយប្រើប្រាស់ទឹកអស់ចំនួន៥៣ស៉ឺទែន ទើបអាចគ្រប់គ្រងអគ្គីភ័យរលត់១០០% មិនឆេះរាលដាលបន្ដ នៅវេលាម៉ោង ៤៖១០នាទីទៀបភ្លឺ។ បច្ចុប្បន្នកម្លាំងជំនាញបាននិងកំពុងស្រាវជ្រាវរកមូលហេតុ នៃការឆេះនេះ និងសិក្សាចំពោះទំហំ និងទ្រព្យសម្បត្តិដែលបានខូចខាត។ ស្នងការដ្ឋាននគរបាលខេត្តកំពង់ចាម សូមអំពាវនាវដល់ប្រជាពលរដ្ឋគ្រប់រូប សូមមេត្តាប្រុងប្រយ័ត្នឲ្យបានខ្ពស់ ត្រូវពិនិត្យឲ្យបានល្អិតល្អន់ចំពោះការរៀបចំបណ្ដាញខ្សែភ្លើង ការពិនិត្យធុងហ្គាស ភ្លើងធូប ទៀនជាដើម។ សូមទំនាក់ទំនងមកវេនប្រចាំបញ្ជា២៤/២៤ម៉ោង គ្រប់ហេតុការណ៍កើតឡើង ក្នុងភូមិសាស្ត្រខេត្តកំពង់ចាម តាមរយៈលេខទូរស័ព្ទ 097 778 0003៕ ផ្ដល់សិទ្ធិដោយ៖ Fresh News

(ភ្នំពេញ)៖ នៅថ្ងែទី៨ ខែមីនា ឆ្នាំ២០២៥ ដែលជាថ្ងៃប្រារព្ធខួបទី១១៤ នៃទិវាអន្តរជាតិនារី, លោកបណ្ឌិត ចន ណារិទ្ធ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការក្រុមប្រឹក្សាជាតិគាំពារសង្គម មានប្រសាសន៍ថា បន្ទាប់ពីក្រុមប្រឹក្សាជាតិគាំពារសង្គមបានសិក្សាអំពីលទ្ធភាពក្នុងការពង្រីកវិសាលភាពវិសាលភាពនៃកម្មវិធីផ្ដល់សាច់ប្រាក់ឧបត្ថម្ភរបស់រាជរដ្ឋាភិបាលសម្រាប់សមាជិក ប.ស.ស. ជាស្ត្រីមានផ្ទៃពោះ និងកុមារអាយុក្រោម ២ឆ្នាំ ដល់មន្រ្តីនគរបាលជាតិ និងមន្រ្តីពន្ធនាគារ, ក្រសួងសេដ្ឋកិច្ច និងហិរញ្ញវត្ថុ, ក្រសួងការងារ និងបណ្តុះបណ្តាលវិជ្ជាជីវៈ និងក្រសួងសុខាភិបាល បានសម្រេចចេញប្រកាសអន្តរក្រសួង លេខ០៧៥/២៥ ក.ប/ប្រ.ក.ប.ស.ស. ដើម្បីផ្ដល់សាច់ប្រាក់ឧបត្ថម្ភ ដល់ស្រ្តីមន្រ្តីនគរបាលជាតិ និងមន្រ្តីពន្ធនាគារ អំឡុងមានផ្ទៃពោះ រហូតដល់កុមារអាយុ ២ឆ្នាំ។ លោកបណ្ឌិត បានបន្តថា ការគិតគូរអំពីលទ្ធភាពនៃការពង្រីកវិសាលភាពនៃកម្មវិធីឧបត្ថម្ភសាច់ប្រាក់នេះ ត្រូវបានធ្វើឡើងតាមការណែនាំដ៏ខ្ពង់ខ្ពស់របស់ សម្តេចអគ្គមហាសេនាបតីជោ ហ៊ុន សែន អតីតនាយករដ្ឋមន្រ្តី និងបច្ចុប្បន្នជាប្រធានព្រឹទ្ធសភា ដល់ក្រុមប្រឹក្សាជាតិគាំពារសង្គម និងក្រសួង-ស្ថាប័នពាក់ព័ន្ធ រួមមានក្រសួងការងារ និងបណ្ដុះបណ្ដាលវិជ្ជាជីវៈ, បេឡាជាតិសន្តិសុខសង្គម, ក្រសួងសុខាភិបាល, ក្រសួងមហាផ្ទៃ, និងអគ្គនាយកដ្ឋានថវិកានៃក្រសួងសេដ្ឋកិច្ច និងហិរញ្ញវត្ថុ។ លោកបណ្ឌិត បានបន្តថា គិតត្រឹមដំណាច់ឆ្នាំ២០២៤នេះ, ស្រ្តីមានផ្ទៃពោះ […]

(សេអ៊ូល)៖ តុលាការ​ក្រុង​សេអ៊ូល ​បាន​លុប​ចោល​ដីកា​ចាប់​ខ្លួន​អតីត​ប្រធានាធិបតី Yoon Suk Yeol នៅ​ថ្ងៃ​សុក្រនេះ ដោយ​បើក​ផ្លូវ​សម្រាប់​លទ្ធភាព​ដែល​លោក​អាច​នឹង​ត្រូវ​ដោះលែង​ពី​ពន្ធនាគារ ខណៈ​ដែល​លោក​កំពុង​ប្រឈម​មុខ​នឹង​ការ​កាត់ទោស​ពី​បទ​ញុះញង់​ឱ្យ​មាន​ការ​បះបោរ​ ទាក់ទង​នឹង​ការ​ប្រកាស​ច្បាប់អាជ្ញាសឹក​ក្នុង​រយៈពេល​ខ្លី​មួយ។ នេះបើតាមការចេញផ្សាយ ដោយទីភ្នាក់ងារសារព័ត៌មាន Reuters។ តុលាការ​បាន​បញ្ជាក់​ថា ការ​សម្រេច​ចិត្ត​នេះ​ផ្អែក​លើ​កត្តា​ពេលវេលា​នៃ​ការ​ចោទប្រកាន់ ដែល​កើតឡើង​បន្ទាប់​ពី​រយៈពេល​ឃុំខ្លួន​ដំបូង​បាន​ផុត​កំណត់ និង​ភាព​មិន​ប្រក្រតី​នៃ​នីតិវិធី​ស៊ើបអង្កេត​ដែល​ធ្វើ​ឡើង​ដោយ​ភ្នាក់ងារ​ពីរ​ផ្សេង​គ្នា។ ទោះ​ជា​យ៉ាង​ណា ការ​សម្រេច​នេះ​មិន​បាន​ទម្លាក់​ចោល​បទ​ចោទ​ព្រហ្មទណ្ឌ​ ដែល​នាំ​ឱ្យមានការ​ចាប់​ខ្លួន​លោក​កាលពី​ថ្ងៃ​ទី ១៥ ខែ​មករា​នោះ​ទេ ហើយ​ក៏​មិន​ប៉ះពាល់​ដល់​បណ្តឹង​ចោទប្រកាន់​មួយទៀត ​នៅ​តុលាការធម្មនុញ្ញ​ដែរ។ ក្រុម​មេធាវី​របស់​លោក Yoon បាន​ស្វាគមន៍​សេចក្តី​សម្រេច​នេះ ដោយ​ចាត់​ទុក​ថា​ជា​ភស្តុតាង​បញ្ជាក់​ថា​ករណី​នេះ​មាន​ចរិត​នយោបាយ។ ពួកគេ​បាន​អំពាវនាវ​ឲ្យ​មានការ​ដោះលែង​លោក Yoon ជា​បន្ទាន់ ទោះ​ដឹង​ថា​អាច​មាន​បណ្តឹង​ឧទ្ធរណ៍​ពី​រដ្ឋអាជ្ញា​ក៏​ដោយ។ ការ​ប្រកាស​សាលក្រម​នេះ ​បាន​បង្ក​ឲ្យ​មាន​ការ​ប្រមូលផ្តុំ​ទាំង​អ្នក​គាំទ្រ និង​អ្នក​ប្រឆាំង​លោក Yoon នៅ​ទីក្រុង​សេអ៊ូល។ ក្រុម​មេធាវី​ការពារ​ក្តី​បាន​អះអាង​ថា ដីកា​ចាប់​ខ្លួន​មាន​កំហុស​នីតិវិធី ហើយ​ការិយាល័យ​ស៊ើបអង្កេត​អំពើ​ពុករលួយ​ មិន​មាន​សិទ្ធិ​អំណាច​ស៊ើបអង្កេត​លើ​បទ​ចោទ​ពី​បទ​ញុះញង់​ឲ្យ​មាន​ការ​បះបោរ​នោះ​ទេ៕ Fresh News