(បានដាស៊េរី បេហ្កាវ៉ាន់, ព្រុយណេ)៖ មេដឹកនាំនៃបណ្ដាប្រទេសជាសមាជិកអាស៊ាន បានបើកកិច្ចប្រជុំកំពូលប្រចាំឆ្នាំនៅថ្ងៃអង្គារនេះ ដោយមិនមានវត្តមាន មេដឹកនាំយោធាមីយ៉ាន់ម៉ា លោក មីន អោង ហ្លេង នោះទេ។ នេះបើតាមការចេញផ្សាយដោយទីភ្នាក់ងារព័ត៌មាន Reuters នៅថ្ងៃអង្គារ ទី២៦ ខែតុលា ឆ្នាំ២០២១។ ប្រធានាធិបតីអាមេរិក លោក ចូ បៃដិន ក៏នឹងត្រូវចូលរួមក្នុងកិច្ចប្រជុំកំពូលអាស៊ាន-អាមេរិកតាមប្រព័ន្ធវីដេអូផងដែរ, ប៉ុន្តែមិនដូចសព្វដង, អាស៊ានត្រូវបើកកិច្ចប្រជុំ ដោយមិនមានអ្នកតំណាងណាម្នាក់មកពីមីយ៉ាន់ម៉ានោះឡើយ។ ព្រុយណេដែលជាអ្នកទទួលរៀបចំកិច្ចប្រជុំកំពូល បាននិយាយថាអាស៊ាននឹងអញ្ជើញអ្នកតំណាង មិនមែនជាអ្នកនយោបាយមកពីប្រទេសមីយ៉ាន់ម៉ា ប៉ុន្តែមិនបានលម្អិតថាតើនរណាគួរតែចូលរួមនោះទេ។ គួរបញ្ជាក់ថា ក្រសួងការបរទេសមីយ៉ាន់ម៉ា កាលពីថ្ងៃចន្ទម្សិលមិញបានបញ្ជាក់ថាខ្លួននឹងមិនចូលរួមក្នុងកិច្ចប្រជុំកំពូលអាស៊ានទេ ប្រសិនបើអ្នកតំណាងរបស់ខ្លួន មិនមែនជាប្រមុខរដ្ឋ ឬក៏រដ្ឋមន្ត្រីជាន់ខ្ពស់។ រដ្ឋមន្ត្រីការបរទេសអាស៊ាន កាលពីថ្ងៃទី១៥ ខែតុលាកន្លងទៅនេះ បានសម្រេចចិត្តហាមមិនឱ្យលោក មីន អោង ហ្លេង ចូលរួមក្នុងកិច្ចប្រជុំ ដោយសារតែបរាជ័យក្នុងការអនុវត្តតាមគោលការណ៍៥ចំណុចដែលបានព្រមព្រៀងជាមួយអាស៊ាន ក្នុងនោះរួមមានការបញ្ចប់អំពើហិង្សា និងបើកកិច្ចសន្ទនាស្វែងរកដំណោះស្រាយជាដើម៕ ផ្តល់សិទ្ធិដោយ៖ freshnews

ក្រុមហ៊ុនអាមេរិក Moderna កាលពីថ្ងៃអាទិត្យ ទី២៥ ខែតុលា ឆ្នាំ២០២១ បានរាយការណ៍ពី «ការឆ្លើយតបនៃអង់ទីករការពារដ៏រឹងមាំ» របស់វ៉ាក់សាំងបង្ការជំងឺ COVID-19 របស់ខ្លួន (mRNA-1273) ចំពោះកុមារដែលមានអាយុពី ៦ ទៅ ១១ឆ្នាំ ហើយខ្លួនគ្រោងនឹងបញ្ជូនលទ្ធផលនេះ ទៅដល់និយតករនៅទូទាំងសកលលោកឆាប់ៗ នេះបើតាមការចុះផ្សាយរបស់សារព័ត៌មាន Channel News Asia ។ ក្រុមហ៊ុនបានសិក្សាលើអ្នកចូលរួមប្រមាណ ៤,៧៥៣ នាក់ ហើយក្រោយពួកគេទទួលវ៉ាក់សាំងដូសទី២ បានរយៈពេល ១ខែ វាបានបង្ហាញថា ពួកគេមានការឆ្លើយតបនៃប្រព័ន្ធភាពស៊ាំខ្ពស់ ខណៈផលរំខានមានដូចជា៖ អស់កម្លាំង ឈឺក្បាល គ្រុនក្តៅ និងការឈឺចាប់នៅកន្លែងចាក់ ដែលពួកវាអាចមានជាទូទៅបន្ទាប់ពីការចាក់វ៉ាក់សាំង។ វ៉ាក់សាំងបង្ការជំងឺ COVID-19 ដែលក្រុមហ៊ុន Moderna ប្រើនៅក្នុងការសាកល្បង គឺជាវ៉ាក់សាំងកម្រិត ៥០ មីក្រូក្រាម ដែលជាកម្រិតពាក់កណ្តាល ដែលប្រើក្នុងវ៉ាក់សាំងសម្រាប់មនុស្សពេញវ័យ។ កម្រិតថ្នាំ ៥០ មីក្រូក្រាម ក៏ត្រូវបានអនុញ្ញាតឱ្យប្រើជាដូចទី៣ ឬ Booster ផងដែរ។ លទ្ធផលរបស់ក្រុមហ៊ុន […]

(សិង្ហបុរី)៖ ប្រទេសសិង្ហបុរីបានរាយការណ៍ពីករណីឆ្លងកូវីដ១៩ ថ្មីៗចំនួន ៣,១៧៤ករណីបន្ថែមទៀត គិតត្រឹមថ្ងៃត្រង់ថ្ងៃចន្ទ ទី២៥ ខែតុលា ឆ្នាំ២០២១នេះ។ នេះបើយោងតាមការចេញផ្សាយដោយសារព័ត៌មាន CNA នៅយប់ថ្ងៃចន្ទ ទី២៥ ខែតុលា ឆ្នាំ២០២១នេះ។ សម្រាប់រយៈពេលដូចគ្នានេះ ប្រទេសអាស៊ានមួយនេះក៏បានរកឃើញអ្នកស្លាប់ថ្មី ដោយសារជំងឺដ៏កាចសាហាវនេះចំនួន ១៤នាក់បន្ថែមទៀតផងដែរ ដែលនាំចំនួនអ្នកស្លាប់សរុបនៅទូទាំប្រទេសដីកោះដ៏តូចមួយនេះកើនដល់ ៣២៩នាក់ ចំណែកករណីឆ្លងកូវីដ១៩នៅទូទាំងប្រទេស សរុបចំនួន ១៧៥,៨១៨ករណីចាប់តាំងពីមានរាតត្បាតជំងឺនេះមក។ ករណីឆ្លងថ្មីប្រចាំថ្ងៃសម្រាប់ថ្ងៃនេះ គឺមានការថយចុះបន្តិច បើធៀបនឹងតួលេខដែលបានរាយការណ៍ កាលពីថ្ងៃសុក្រម្សិលមិញដែលមានចំនួន ៣,៣៨៣ករណី។ សូមជំរាបថា ស្ថានការណ៍កូវីដ១៩ នៅក្នុងប្រទេសសិង្ហបុរីនៅសប្តាហ៍ចុងក្រោយនេះហាក់កំពុងប្រឈមនឹងរលកឆ្លងថ្មី ដែលមានសភាពធ្ងន់ធ្ងរជាងពេលមុនៗ៕ ផ្តល់សិទ្ធិដោយ៖ freshnews

(វែលីងតោន)៖ ប្រទេសនូវែលសេឡង់នៅថ្ងៃចន្ទ ទី២៥ ខែតុលា ឆ្នាំ២០២១នេះ បានរាយការណ៍ពីការរកឃើញករណីឆ្លងជំងឺ COVID-19 ក្នុងសហគមន៍ថ្មីៗចំនួន ១០៩ករណីបន្ថែមទៀត ដែលភាគច្រើនត្រូវបានរកឃើញនៅក្នុងទីក្រុងដ៏ធំបំផុតរបស់ខ្លួន នោះគឺទីក្រុងអកលែនដ៍ (Auckland) ខណៈដែលវាជាចំនួនករណីឆ្លងប្រចាំថ្ងៃ ខ្ពស់បំផុតទី ២ ចាប់តាំងពីវីរុសបំប្លែងខ្លួន Delta បានចាប់ផ្តើមរាតត្បាត។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters។ ការកើនឡើងនូវករណីឆ្លង បានបង្ខំឱ្យនាយករដ្ឋមន្ត្រីនូវែលសេឡង់ លោកស្រី ចេស៉ីនដា អាដឺន (Jacinda Ardern) បោះបង់ចោលនូវយុទ្ធសាស្ត្រលុបបំបាត់ជំងឺ COVID-19 របស់លោកស្រីហើយប្តូរទៅរកយុទ្ធសាស្រ្ត «សម្របខ្លួនរស់នៅជាមួយជំងឺនេះវិញ» ដោយផ្ដោតយ៉ាងខ្លាំងទៅលើការបង្កើន អត្រានៃការចាក់វ៉ាក់សាំង។ គិតត្រឹមថ្ងៃចន្ទនេះ ប្រហែល ៧១ភាគរយនៃប្រជាជននូវែលសេឡង់ទាំង ៥លាននាក់ បានទទួលការចាក់វ៉ាក់សាំងពេញលេញ (ចំនួន ០២ដូស) រួចរាល់ហើយ។ កាលពីសប្តាហ៍មុន លោកស្រី Jacinda Ardern បាននិយាយថា ប្រទេសនូវែលសេឡង់នឹងបញ្ចប់វិធានការបិទខ្ទប់ដ៏តឹងរ៉ឹងរបស់ខ្លួន និងស្តារសេរីភាពបន្ថែមទៀតលុះត្រាតែប្រហែល ៩០ភាគរយ នៃប្រជាជនរបស់ខ្លួនបានទទួលការចាក់វ៉ាក់សាំងពេញលេញ៕ ផ្តល់សិទ្ធិដោយ៖ freshnews

(ស៉ីដនី)៖ ក្រុមមន្ត្រីអូស្ត្រាលីគ្រោងនឹងដាក់ចេញ នូវយុទ្ធនាការចាក់វ៉ាក់សាំងបង្ការជំងឺ COVID-19 «ដូសទី៣ ឬដូសជំរុញ» ក្នុងពេលឆាប់ៗនេះ ដើម្បីការពារការកើតឡើងវិញនៃករណីឆ្លង ខណៈប្រជាជនដែលរស់នៅក្នុងទីក្រុងធំៗចំនួន ២ របស់ប្រទេសនេះ គឺទីក្រុងស៊ីដនី និងមែលប៊ន បានចាប់ផ្តើមរីករាយនឹងសេរីភាពកាន់តែច្រើន បន្ទាប់ពីការជាប់គាំងអស់រយៈពេលជាច្រើនខែ។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅព្រឹកថ្ងៃចន្ទ ទី២៥ ខែតុលា ឆ្នាំ២០២១។ ជុំវិញគម្រោងខាងលើនេះ លោកឧត្តមសេនីយឯក ចន ហ្វ្រេវែន (John Frewen) ប្រធានក្រុមការងារចាក់វ៉ាក់សាំងរបស់ប្រទេសអូស្រ្តាលី បានគូសបញ្ជាក់ប្រាប់សារព័ត៌មាន ABC នៅថ្ងៃចន្ទនេះថា «យើងគិតថា អ្វីដែលនឹងកើតឡើងនោះគឺ ការចាក់វ៉ាក់សាំងដូសទី ៣ ឬដូសជំរុញ នឹងត្រូវធ្វើឡើងចាប់ពីរយៈពេល ៦ខែនៃការចាក់វ៉ាក់សាំងដូសទី ២ របស់អ្នក»។ លោក Frewen បានថ្លែងបន្ថែមទៀតថា ការណែនាំពីក្រុមផ្តល់ប្រឹក្សាអំពីការចាក់វ៉ាក់សាំងរបស់ប្រទេសនេះ ស្តីពីការចាក់វ៉ាក់សាំងដូសទី ៣ ឬដូសជំរុញគឺ «ជិតមកដល់ហើយ»។ បុគ្គលិកសុខាភិបាល និងអ្នករស់នៅក្នុងមណ្ឌលថែទាំមនុស្សចាស់ និងពិការ នឹងត្រូវបានផ្តល់ការចាក់ក្នុងដំណាក់កាលដំបូង។ គួរបញ្ជាក់ថា ក្រុមមន្ត្រីអូស្រ្តាលីកំពុងងាករេ […]

(ម៉ង់រ៉េអាល់)៖ ក្រុមឆ្មាំសមុទ្រកាណាដាបានជួយសង្រ្គោះមនុស្ស ១៦នាក់ចេញពីកប៉ាល់ដឹកទំនិញមួយគ្រឿងដែលត្រូវបានអគ្គិភ័យឆាបឆេះ និងកំពុងបញ្ចេញឧស្ម័នពុល គ្របដណ្ដប់តំបន់ឆ្នេរ របស់កាណាដា ក្នុងតំបន់មហាសមុទ្រប៉ាស៊ីហ្វិក។ នេះបើតាមការចេញផ្សាយដោយទីភ្នាក់ងារព័ត៌មាន Reuters នៅថ្ងៃចន្ទ ទី២៥ ខែតុលា ឆ្នាំ២០២១។ នៅក្នុងសេចក្ដីថ្លែងការណ៍របស់ខ្លួនចេញផ្សាយកាលពីថ្ងៃអាទិត្យចុងសប្ដាហ៍កន្លងទៅនេះ, ឆ្មាំសមុទ្រកាណាដាបានឱ្យដឹងថាអគ្គិភ័យឆាបឆេះកប៉ាល់ដឹកទំនិញឈ្មោះ Zim Kingston ត្រូវបានរាយការណ៍នៅម៉ោងប្រមាណ ១១៖០០នាទីយប់ម៉ោង (នៅក្នុងតំបន់) កាលពីថ្ងៃសៅរ៍ ទី២៣ ខែតុលានេះ។ ឆ្មាំសមុទ្រកាណាដាបន្ថែមថាអគ្គិភ័យនៅតែបន្តឆាបឆេះកប៉ាល់ដឹកទំនិញនេះ និងកំពុងបញ្ចេញឧស្ម័នពុលទៅអាកាស ខណៈមនុស្ស ១៦នាក់ត្រូវបានជួយសង្រ្គោះ។ ប៉ុន្តែ មិនទាន់មានសេចក្ដីរាយការណ៍ពីទំហំនៃការខូចខាត ឬមូលហេតុបង្កឱ្យមានអគ្គិភ័យនេះនៅឡើយទេ ស្របពេលក្រុមអ្នកពន្លត់អគ្គិភ័យកំពុងធ្វើប្រតិបត្តិការរបស់ពួកគេនៅឡើយ។ គួរបញ្ជាក់ថា បើតាមឆ្មាំសមុទ្រកាណាដា កប៉ាល់ដឹកទំនិញឈ្មោះ Zim Kingston មានគោលដៅធ្វើដំណើរឆ្ពោះទៅកាន់ទីក្រុង Vancouver ប៉ុន្តែស្រាប់តែមានអគ្គិភ័យ ឆាបឆេះនៅពាក់កណ្ដាលផ្លូវ។ បច្ចុប្បន្ន កប៉ាល់នេះកំពុងស្ថិតនៅឯតំបន់ច្រកសមុទ្រ ហ័ន ដឺ ហ្វូកា (Juan de Fuca) ដែលជាព្រំដែនសមុទ្ររវាងប្រទេសកាណាដា និងសហរដ្ឋអាមេរិក៕ ផ្តល់សិទ្ធិដោយ៖ freshnews

(ប៉េកាំង)៖ អាជ្ញាធរចិនបានសម្រេចបិទខ្ទប់ (lockdown) ស្រុកមួយ ស្ថិតនៅក្នុងតំបន់ស្វយ័ត អ៊ីនណឺ ម៉ុងហ្គោលី (Inner Mongolia) ភាគខាងជើងប្រទេស ដោយសារតែកំណើននៃករណីឆ្លងមេរោគ COVID-19 បំប្លែងខ្លួន Delta។ នេះបើតាមការចេញផ្សាយដោយ សារព័ត៌មាន Bloomberg នាព្រឹកថ្ងៃចន្ទ ទី២៥ ខែតុលា ឆ្នាំ២០២១។ ស្រុកដែលត្រូវបានបិទខ្ទប់ខាងលើនេះ មានឈ្មោះថា អ៊ីជីន (Ejin) ដោយអាជ្ញាធរបានតម្រូវឲ្យមនុស្សទាំងអស់ចំនួន ៣៥,៧០០នាក់ ស្នាក់នៅក្នុងផ្ទះជាកំហិត គិតចាប់ពីថ្ងៃចន្ទនេះតទៅ។ ស្រុកដ៏តូចមួយនេះ បានរកឃើញករណីឆ្លង COVID-19 បំប្លែងខ្លួន Delta ជាង ១៥០ករណី គិតត្រឹមចុងសប្តាហ៍មុននេះប៉ុណ្ណោះ។ គួរបញ្ជាក់ថា ការ lockdown ស្រុក Ejin នៃតំបន់ស្វយ័ត Inner Mongolia បានកើតមានឡើងតែ ១ថ្ងៃប៉ុណ្ណោះ បន្ទាប់ពីគណៈកម្មការសុខាភិបាលជាតិចិន បានព្រមានពីការផ្ទុះករណីឆ្លងថ្មីចុងក្រោយនេះថា អាចនឹងមានស្ថានភាពកាន់់តែអាក្រក់ បន្ទាប់ពីខេត្តចំនួន ១១ រួចមកហើយរបស់ប្រទេសចិន បានរាយការណ៍ពីការរកឃើញ ករណីពាក់ព័ន្ធនៅកំលុងពេលតែ […]

(សិង្ហបុរី)៖ ប្រទេសសិង្ហបុរីបានរាយការណ៍ពីករណីឆ្លងកូវីដ១៩ ថ្មីៗចំនួន ៣,៣៨៣ករណីបន្ថែមទៀត គិតត្រឹមថ្ងៃត្រង់ថ្ងៃអាទិត្យ ទី២៤ ខែតុលា ឆ្នាំ២០២១នេះ។ នេះបើយោងតាមការចេញផ្សាយដោយសារព័ត៌មាន CNA នៅយប់ថ្ងៃអាទិត្យ ទី២៤ ខែតុលា ឆ្នាំ២០២១នេះ។ សម្រាប់រយៈពេលដូចគ្នានេះ ប្រទេសអាស៊ានមួយនេះក៏បានរកឃើញអ្នកស្លាប់ថ្មី ដោយសារជំងឺដ៏កាចសាហាវនេះចំនួន ១៥នាក់បន្ថែមទៀតផងដែរ ដែលនាំចំនួនអ្នកស្លាប់សរុបនៅទូទាំប្រទេសដីកោះដ៏តូចមួយនេះកើនដល់ ៣១៥នាក់ ចំណែកករណីឆ្លងកូវីដ១៩នៅទូទាំងប្រទេស សរុបចំនួន ១៧២,៦៤៤ករណីចាប់តាំងពីមានរាតត្បាតជំងឺនេះមក។ ករណីឆ្លងថ្មីប្រចាំថ្ងៃសម្រាប់ថ្ងៃនេះ គឺមានការថយចុះបន្តិច បើធៀបនឹងតួលេខដែលបានរាយការណ៍ កាលពីថ្ងៃសុក្រម្សិលមិញដែលមានចំនួន ៣,៥៩៨ករណី។ សូមជំរាបថា ស្ថានការណ៍កូវីដ១៩ នៅក្នុងប្រទេសសិង្ហបុរីនៅសប្តាហ៍ចុងក្រោយនេះហាក់កំពុងប្រឈមនឹងរលកឆ្លងថ្មី ដែលមានសភាពធ្ងន់ធ្ងរជាងពេលមុនៗ ៕ ផ្តល់សិទ្ធិដោយ៖ freshnews

(ហាណូយ)៖ ក្រសួងសុខាភិបាលវៀតណាមនៅថ្ងៃអាទិត្យនេះបានប្រកាសរកឃើញករណីឆ្លងថ្មីៗ នៃជំងឺកូវីដ១៩ ចំនួន៤,០៤៥ករណីបន្ថែមទៀត ក្នុងរយៈពេល២៤ម៉ោងចុងក្រោយនេះ។ នេះបើតាមតាមការចេញផ្សាយ ដោយទីភ្នាក់ងារសារព័ត៌មាន Viet Nam News នៅយប់ថ្ងៃទី២៤ ខែតុលា ឆ្នាំ២០២១។ ក្នុងចំណោមករណីឆ្លងថ្មីៗខាងលើ មាន១៧ករណីជាករណីនាំចូល ក្រៅពីនោះជាករណីឆ្លងក្នុងស្រុកទាំងអស់ ខណៈទីក្រុងហូជីមិញដែលជាចំណុចកណ្តាល នៃការផ្ទុះរីករាលនៃជំងឺនេះបានរ៉ាប់រងករណីឆ្លងថ្មីតែឯងរហូតដល់៩៦៦នាក់។ ក្នុងរបាយការណ៍ថ្ងៃសៅរ៍នេះដែរ ក្រសួងសុខាភិបាលវៀតណាមក៏បានប្រកាសពីករណីអ្នកស្លាប់ថ្មី ដោយសារជំងឺដ៏កាចសាហាវនេះទេចំនួន៥៣នាក់បន្ថែមទៀតផងដែរ។ សរុបមកវិញ គិតត្រឹមយប់ថ្ងៃទី២៤ ខែតុលា ឆ្នាំ២០២១នេះ វៀតណាមមានករណីឆ្លងកូវីដ-១៩ សរុបនៅទូទាំងប្រទេសចំនួន ៨៨៨,៩៤០នាក់ ក្នុងនោះអ្នកជំងឺជាសះស្បើយចំនួន ៨០៥,៩៧៨នាក់ ចំណែកចំនួនអ្នកស្លាប់សរុបចំនួន ២១,៦៧៣នាក់៕ ផ្តល់សិទ្ធិដោយ៖ freshnews

(ប៉េកាំង)៖ មន្ត្រីសុខាភិបាលបាននិយាយនៅថ្ងៃអាទិត្យនេះថា ការផ្ទុះឡើងនៃករណីឆ្លងកូវីដ១៩ ចុងក្រោយបង្អស់របស់ប្រទេសចិន ទំនងជានឹងរីករាលដាលបន្ថែមទៀត ខណៈអាជ្ញាធរបានជំរុញឱ្យគ្រប់តំបន់ទាំងអស់បង្កើនការត្រួតពិនិត្យ និងអំពាវនាវឱ្យកាត់បន្ថយការធ្វើដំណើរឆ្លងកាត់ខេត្ត។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន CNA នៅយប់ថ្ងៃអាទិត្យ ទី២៤ ខែតុលា ឆ្នាំ២០២១។ ករណីឆ្លងក្នុងស្រុកច្រើនជាង១០០ករណីត្រូវបានបញ្ជាក់ក្នុងសប្តាហ៍ចុងក្រោយនេះនៅទូទាំងខេត្តចំនួន១១ ដែលភាគច្រើនមានទំនាក់ទំនងជាមួយក្រុមទេសចរណ៍ចំនួន១៣ផ្សេងគ្នា។ អ្នកនាំពាក្យគណៈកម្មាធិការសុខាភិបាលជាតិចិនលោក Mi Feng បានប្រាប់អ្នកសារព័ត៌មានកាលពីថ្ងៃអាទិត្យថា មានហានិភ័យខ្ពស់ចំពោះការផ្ទុះឆ្លងនេះ ដែលអាចរីករាលដាលបន្ថែមទៀតដោយមានជំនួយពី «កត្តារដូវ»។ គួរបញ្ជាក់ថា កាលពីថ្ងៃព្រហស្បតិ៍ ទី២១ ខែតុលា ឆ្នា២០២១កន្លងទៅនេះ អាជ្ញាធរតាមតំបន់មួយចំនួននៅក្នុងប្រទេសចិន បានសម្រេចលុបចោលជើងហោះហើររាប់រយជើង, បិទសាលារៀននានាជាបណ្តោះអាសន្ន និងជំរុញឲ្យមានការធ្វើតេស្តទ្រង់ទ្រាយធំ ដើម្បីទប់ទល់នឹងការផ្ទុះករណីឆ្លង COVID-19 ថ្មីៗ ដែលជាប់ពាក់ព័ន្ធនឹងអ្នកទេសចរមួយក្រុម៕ ផ្តល់សិទ្ធិដោយ៖ freshnews