ក្រុមហ៊ុនហុងដា (Honda) បានប្រកាសកាលពីថ្ងៃចន្ទថា ខ្លួននឹងណែនាំម៉ូតូអគ្គិសនីចំនួន ១០ ប្រភេទ ឬច្រើនជាងនេះ នៅត្រឹមឆ្នាំ២០២៥ ហើយខ្លួននឹងផ្តោតសំខាន់លើទីផ្សារអាស៊ី និងអឺរ៉ុប ជាជាងទីផ្សារនៅអាមេរិកខាងជើង។ ក្រុមហ៊ុនផលិតយានយន្តដ៏ធំរបស់ពិភពលោកមួយនេះ ក៏បាន​ចែករំលែក​ស្លាយ​មួយ​ដែល​បង្ហាញ​ពី​រូបភាព​នៃ​គំរូ​ម៉ូតូអគ្គិសនី​​ចំនួន ១១ ប្រភេទ ហើយ​ម៉ូតូភាគច្រើន មើលទៅដូចជាក្រុមម៉ូតូអូតូ ឬប្រភេទកូនទា។ ក្រុមហ៊ុន Honda កំពុងបង្កើតវេទិកា «FUN» ថ្មីមួយ ហើយគ្រោងនឹងបង្ហាញម៉ូដែលអគ្គិសនី «ខ្នាតធំ» ចំនួន ៣ នៅក្នុងប្រទេសជប៉ុន សហរដ្ឋអាមេរិក និងអឺរ៉ុប ចន្លោះឆ្នាំ២០២៤ និងឆ្នាំ២០២៥។ ក្រុមហ៊ុនក៏កំពុងធ្វើការលើម៉ូតូសម្រាប់ក្មេងៗផងដែរ ដោយផ្អែកលើម៉ាស៊ីន powertrain និងបច្ចេកវិទ្យាថ្ម Solid-state battery ដើម្បីផ្តល់ថាមពលដល់គ្រប់ម៉ូដែល ដែលខ្លួនគ្រោងនឹងបង្ហាញនៅមុនឆ្នាំ២០២៥។ ក្នុងពេលជាមួយគ្នានេះ ក្រុមហ៊ុនបាននិយាយថា ខ្លួននឹងបន្តផលិតម៉ូដែលម៉ាស៊ីនចំហេះ ប៉ុន្តែបានសន្យាថា នឹងធ្វើឱ្យពួកគេកាន់តែមានភាពស្និទ្ធស្នាលនឹងបរិស្ថាន ដោយនឹងផលិតម៉ូតូប្រភេទជា «flex-fuel» ដែលអាចប្រើប្រាស់ឥន្ធនៈមានមូលដ្ឋានលើអេតាណុល E20 និង E100 នៅឆ្នាំ២០២៣ និង២០២៥។ ទោះយ៉ាងណាក៏ដោយ ម៉ូដែលទាំងនោះនឹងមិនមានលក់នៅក្នុងសហរដ្ឋអាមេរិកទេ […]

អាមេរិក៖ មន្ត្រីសុខាភិបាលអាមេរិកបានព្រមានថា មេរោគនៃជំងឺអ៊ុតស្វា Monkeypox អាចធ្វើការបំប្លែងខ្លួននិងបង្កើតភាពស៊ាំដើម្បីទប់ទល់ជាមួយនឹងថ្នាំបាន នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅព្រឹកថ្ងៃសុក្រ​ ទី១៦ ខែកញ្ញានេះ។ សេចក្តីព្រមានមន្ត្រីសុខាភិបាលអាមេរិកនេះនៅពេលនេះគឺត្រូវបានធ្វើឡើងក្រោយគេបានដាក់ឲ្យប្រើប្រាស់ថ្នាំប្រឆាំងនឹងជំងឺអ៊ុតស្វា Monkeypox មួយប្រភេទឈ្មោះថា TPOXX ខណៈក្នុងការប្រើប្រាស់ថ្នាំលេបប្រភេទនេះគឺអ្នកជំងឺតម្រូវឲ្យលេបថ្នាំនេះតែមួយមុខគត់ ដោយមិនមានបន្ថែមនូវថ្នាំអ្វីផ្សេងទៀតនោះទេ។ បើតាមអ្នកជំនាញអាមេរិកបានពន្យល់ថា ការប្រើប្រាស់ថ្នាំប្រឆាំងនឹងមេរោគនៃជំងឺអ៊ុតស្វា Monkeypox  តែមួយមុខគត់ដូចនេះអាចនឹងធ្វើឲ្យមេរោគងាយស៊ាំទៅនឹងសារធាតុប្រឆាំងនៅក្នុងថ្នាំពេទ្យ ហើយពេលនោះមេរោគនឹងផ្តើមធ្វើការបំប្លែងខ្លួនជាវ៉ារ្យ៉ង់ថ្មីមួយទៀត ខណៈមេរោគនឹងមានសមត្ថភាពខ្ពស់អាចយកឈ្នះលើថ្នាំបាន ពោលគឺថ្នាំលេបនឹងលែងមានប្រសិទ្ធភាពក្នុងការសម្លាប់មេរោគទៀតហើយ។ គួរបញ្ជាក់ជូនថា គិតត្រឹមពេលនេះថ្នាំលេប TPOXX ត្រូវបានណែនាំឲ្យប្រើប្រាស់ក្នុងចំណោមអ្នកជំងឺរាប់ពាន់នាក់រួចហើយនៅក្នុងសហរដ្ឋអាមេរិក៕ ផ្តល់សិទ្ធិដោយ៖ ខ្មែរណូត

(មូស្គូ)៖ ក្រសួងការបរទេសរុស្ស៉ី បាននិយាយថាប្រសិនបើសហរដ្ឋអាមេរិកសម្រេចចិត្តផ្គត់ផ្គង់ដល់ទីក្រុងកៀវ នូវប្រព័ន្ធមីស៊ីលរយៈចម្ងាយឆ្ងាយ នោះវា នឹងឆ្លង «បន្ទាត់ក្រហម» ដែលនឹងធ្វើឱ្យទីក្រុងវ៉ាស៊ីនតោន ក្លាយជា «ភាគីនៃជម្លោះមួយ» នៅអ៊ុយក្រែន។ នេះបើយោងតាមការដកស្រង់ផ្សាយពី សារព័ត៌មាន Al-Jazeera នៅថ្ងៃសុក្រ ទី១៦ ខែកញ្ញា ឆ្នាំ២០២២។ នៅក្នុងសន្និសីទសារព័ត៌មានមួយនៅថ្ងៃព្រហស្បតិ៍សប្តាហ៍នេះ អ្នកនាំពាក្យក្រសួងការបរទេសរុស្ស៉ី លោកស្រី ម៉ារៀ ហ្សាខារ៉ូវ៉ា (Maria Zakharova) បានបន្ថែមថា រុស្ស៊ី «រក្សាសិទ្ធិការពារទឹកដីរបស់ខ្លួន» ហើយប្រសិនបើទីក្រុងវ៉ាស៊ីនតោនសម្រេចចិត្តផ្គត់ផ្គង់មីស៊ីលរយៈចម្ងាយឆ្ងាយដល់ទីក្រុងកៀវ ទៀតនោះ វាអាចនិយាយបានថាជាការដើរហួសខ្សែបន្ទាត់ក្រហម ដែលនឹងធ្វើឱ្យសហរដ្ឋអាមេរិកក្លាយទៅជាភាគីផ្ទាល់នៃជម្លោះនេះដែរ។ គួរបញ្ជាក់ថា ប្រធានាធិបតីអាមេរិក លោក ចូ បៃដិន នៅថ្ងៃព្រហស្បតិ៍សប្ដាហ៍នេះដែរ បានប្រកាសពីកញ្ចប់ជំនួយយោធាថ្មីមានទំហំទឹកប្រាក់ ៦០០លានដុល្លារ ដើម្បីជួយអ៊ុយក្រែន ក្នុងការប្រយុទ្ធតតាំងជាមួយកងទ័ពរុស្ស៉ី។ កញ្ចប់ជំនួយយោធាថ្មី ក្នុងនោះរួមមានទាំងប្រព័ន្ធមីស៊ីល HIMARS ហើយបើតាមកំណត់ហេតុសេតវិមាន កញ្ចប់ជំនួយនេះក៏នឹងត្រូវបានប្រើប្រាស់សម្រាប់ការបណ្ដុះបណ្ដាលយោធាផងដែរ។ ទីក្រុងវ៉ាស៊ីនតោនត្រូវបានគេ រាយការណ៍ថា បានបញ្ជូនអាវុធក្នុងទំហំទឹកប្រាក់ ១៥.១ពាន់លានដុល្លារហើយចាប់តាំងពីសង្រ្គាមផ្ទុះឡើងមក៕ ផ្តល់សិទ្ធិដោយ៖ freshnews

(សាម៉ាកាន់)៖ រដ្ឋមន្ត្រីក្រសួងថាមពលរុស្ស៉ី លោក អាឡិចហ្សាន់ឌឺ ណូវ៉ាក់ (Alexander Novak) បាននិយាយថាបំពង់ឧស្ម័នមួយរបស់រុស្ស៉ីតភ្ជាប់ទៅកាន់ ប្រទេសចិន នឹងជំនួសបំពង់ឧស្ម័ន Nord Stream 2 តភ្ជាប់ទៅកាន់អឺរ៉ុប និងដែលត្រូវបានបោះបង់ចោលអំឡុងសង្រ្គាមនៅអ៊ុយក្រែន។ នេះបើតាមការចេញ ផ្សាយដោយទីភ្នាក់ងារសារព័ត៌មាន AFP នៅថ្ងៃសុក្រ ទី១៦ ខែកញ្ញា ឆ្នាំ២០២២។ នៅពេលត្រូវបានសាកសួរនៅក្នុងបទសម្ភាសន៍ជាមួយទូរទស្សន៍រុស្ស៉ី រ៉ូសស៊ីយ៉ាង វ័ន (Rossiya-1) កាលពីថ្ងៃព្រហស្បតិ៍សប្ដាហ៍នេះថាតើរុស្ស៉ីនឹងយក បំពង់ឧស្ម័ន Asian Force Siberia 2 ជំនួសបំពង់ឧស្ម័នអឺរ៉ុប Nord Stream 2 ដែរឬក៏យ៉ាងណា? លោក ណូវ៉ាក់ បានឆ្លើយយ៉ាងខ្លីថា «ពិតមែនហើយ»។ លោក ណូវ៉ាក់ ដែលបានអមដំណើរលោក ពូទីន ចូលរួមក្នុងកិច្ចប្រជុំអង្គការកិច្ចសហប្រតិបត្តិការសៀងហៃ ក្នុងប្រទេសអ៊ូសបេគីស្ថានដែរនោះ ក៏បានឱ្យ ដឹងដែរថាចិន និងរុស្ស៉ី នឹងចុះហត្ថលេខាលើកិច្ចព្រមព្រៀងមួយក្នុងពេលឆាប់ៗនេះ ស្ដីពីការបង្ហូរឧស្ម័ន ៥០ពាន់លានម៉ែត្រគូបក្នុងមួយឆ្នាំ កាត់តាមបំពង់ ឧស្ម័ន […]

(វ៉ាស៊ីនតោន)៖ ប្រធានាធិបតីអាមេរិក លោក ចូ បៃដិន បានប្រកាសពីកញ្ចប់ជំនួយយោធាថ្មីមានទំហំទឹកប្រាក់ ៦០០លានដុល្លារ ដើម្បីជួយអ៊ុយក្រែន ក្នុងការប្រយុទ្ធតតាំងជាមួយកងទ័ពរុស្ស៉ី។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី១៦ ខែកញ្ញា ឆ្នាំ២០២២។ ដោយផ្អែកលើកំណត់ហេតុមួយរបស់សេតវិមានបញ្ជូនឱ្យក្រសួងការបរទេសអាមេរិក កាលពីថ្ងៃព្រហស្បតិ៍សប្ដាហ៍នេះ ទីភ្នាក់ងារសារព័ត៌មាន Reuters បានឱ្យដឹងទៀតថាលោក ចូ បៃដិន បានអនុម័តការផ្ដល់កញ្ចប់ជំនួយយោធាបន្ថែមខាងលើ ដោយប្រើប្រាស់សិទ្ធិអំណាចប្រធានាធិបតី ឬ Presidential Drawdown Authority ដែលអនុញ្ញាតឱ្យប្រធានាធិបតីអនុម័តលើការបញ្ជូនអាវុធយកចេញពីឃ្លាំងស្ដុកអាវុធរបស់សហរដ្ឋអាមេរិក។ គួរបញ្ជាក់ថា កញ្ចប់ជំនួយយោធាខាងលើ ក្នុងនោះរួមមានទាំងប្រព័ន្ធមីស៊ីល HIMARS ហើយបើតាមកំណត់ហេតុសេតវិមាន កញ្ចប់ជំនួយនេះ ក៏នឹងត្រូវបានប្រើប្រាស់សម្រាប់ការបណ្ដុះបណ្ដាលយោធាផងដែរ ខណៈមកទល់នឹងពេលនេះទីក្រុងវ៉ាស៊ីនតោនត្រូវបានគេរាយការណ៍ថា បានបញ្ជូនអាវុធក្នុងទំហំទឹកប្រាក់ ១៥.១ពាន់លានដុល្លារហើយចាប់តាំងពីសង្រ្គាមផ្ទុះឡើងមក៕ ផ្តល់សិទ្ធិដោយ៖ freshnews

លោក Yvon Chouinard ម្ចាស់ក្រុមហ៊ុនសម្លៀកបំពាក់ឡើងភ្នំដ៏ល្បីមួយឈ្មោះថា Patagonia និងជាមហាសេដ្ឋីពាន់លានដុល្លារ បានសម្រេចបរិច្ចាគក្រុមហ៊ុនរបស់ខ្លួន ទៅឱ្យអង្គការមិនរកប្រាក់ចំណេញ ដើម្បីសង្រ្គោះភពផែនដី។ យោងតាមការចុះផ្សាយរបស់សារព័ត៌មាន The New York Time បានឱ្យដឹងថា ជាជាងលក់ក្រុមហ៊ុន ឬ ដាក់វាជាសាធារណៈ លោក Chouinard ប្រពន្ធរបស់គាត់ និងកូនចំនួនពីរនាក់ បានផ្ទេរកម្មសិទ្ធិរបស់ពួកគេនៅ Patagonia ដែលមានតម្លៃប្រហែល ៣ពាន់លានដុល្លារទៅឱ្យក្រុមហ៊ុន trust និងអង្គការមិនរកប្រាក់ចំណេញ។ ក្រុមហ៊ុន និងអង្គការទាំងនោះ ត្រូវបានបង្កើតឡើង ដើម្បីការពារឯករាជ្យភាពរបស់ក្រុមហ៊ុន និងធានាថាប្រាក់ចំណេញទាំងអស់របស់ក្រុមហ៊ុន Patagoni ប្រហែល ១០០លានដុល្លារក្នុងមួយឆ្នាំ ត្រូវបានប្រើដើម្បីប្រយុទ្ធប្រឆាំងនឹងការប្រែប្រួលអាកាសធាតុ និងការពារដីមិនទាន់បានអភិវឌ្ឍនៅជុំវិញពិភពលោក។ មហាសេដ្ឋីវ័យ ៨៣ឆ្នាំ បាននិយាយនៅក្នុងបទសម្ភាសន៍ផ្តាច់មុខមួយថា៖ “សង្ឃឹមថាវានឹងមានឥទ្ធិពលលើទម្រង់ថ្មីនៃមូលធននិយមសម្រាប់អ្នកមានមួយចំនួនតូច និងក្រុមអ្នកក្រ។ យើង​នឹង​ផ្តល់​ប្រាក់​មួយចំនួន​ដល់​មនុស្ស​ដែល​កំពុង​ធ្វើ​ការ​យ៉ាង​សកម្ម​លើ​ការ​សង្គ្រោះ​ភព​ផែនដី​នេះ”។ យ៉ាងណាមិញ ក្រុមហ៊ុន Patagonia នឹងបន្តដំណើរការជាសាជីវកម្មឯកជនរកប្រាក់ចំណេញដែលមានមូលដ្ឋាននៅទីក្រុង Ventura រដ្ឋកាលីហ្វ័រញ៉ា ដោយលក់អាវ មួក និងខោជិះស្គីតម្លៃជាង ១ពាន់លានដុល្លារជារៀងរាល់ឆ្នាំ។ ប៉ុន្តែលោក […]

ថៃ៖ យោងតាមរយៈគេហទំព័រ​ហ្វេស​ប៊ុក​របស់​មជ្ឈមណ្ឌល​ហ្សែន​វេជ្ជ​សា​ស្រ្ត នៃមន្ទីរពេទ្យ​រ៉ា​ម៉ា​ធិ​បូ​ឌី បាន​បង្ហោះ​សារ​អំពី​ការ​តាមដាន​ជំងឺ​កូ​វី​ដ​១៩ “ជំនាន់​ទី​៣” អូមីក្រុង “BA.2.75.2” ដែល​វិទ្យាស្ថាន​ហ្សែ​ន​ប្រទេស​ឥណ្ឌា​បាន​ព្រមាន​ថា អូមីក្រុង BA.2.75 ​បាន​ចាប់ផ្តើម​ក្នុង ប្រទេសឥណ្ឌាចាប់តាំងពីខែឧសភា មានចំនួន ៨២.៩% នៃករណីថ្មីរបស់មេរោគប្រភេទ BA.2.75 ដែលមានឈ្មោះមិនទាន់ផ្លូវការគឺ Centaurus។ ហើយវាថែមទាំងមានសក្ដានុពលបំផុតសម្រាប់ការបំលែងថ្មី បើប្រៀបធៀបទៅនឹងមេរោគប្រភេទកូរ៉ូណា ២០១៩ ដែលធ្លាប់ជាមេរោគបំលែងថ្មី បានផ្ទុះកាលពីមុន ប៉ុន្តែឥឡូវនេះមេរោគ អូមីក្រុង BA.2.75 ត្រូវបានផ្លាស់ប្តូរឬបំលែងថ្មីជាបន្តបន្ទាប់ ដោយមួយក្នុងចំនោមប្រភេទរង ដែលបានផ្លាស់ប្តូរគឺ “BA.2.75.2” ត្រូវបានគេស្គាល់ក្រៅផ្លូវការថា “Centaurus 2.0” ព្រោះវាជាកូនទីពីររបស់ BA.2.75 ដោយកូនទីមួយគឺ BA.2.75.1 ។ តាមរយៈអ្នកជំនាញខាងភាពស៊ាំមកពីសាកលវិទ្យាល័យប៉េកាំងបានកំណត់អត្តសញ្ញាណ អូមីក្រុង BA.2.75.2 ថាជាប្រភេទមេរោគបំលែងដែលអាចគេចពីភាពស៊ាំបានយ៉ាងល្អបំផុតក្នុងពេលបច្ចុប្បន្ន ហើយវាថែមទាំងអាចបណ្តាលឱ្យមានការរីករាលដាលបន្ថែមទៀតនាពេលអនាគត។ ជាមួយគ្នានេះដែរមជ្ឈមណ្ឌល Genome ក៏បានបញ្ជាក់បន្ថែមទៀតថា អូមីក្រុង BA.2.75 ដែលបានផ្លាស់ប្តូរពី BA.2 ត្រូវបានចាត់ទុកថា ជាជំនាន់ទី២ ដោយបានបំលែងចេញពីមេរោគដើម ឬ Wuhan។ […]

បន្ទាប់ពី Covid-19 ខ្សែសង្វាក់ភាពយន្តធំទីពីររបស់ពិភពលោក Cineworld ត្រូវដាក់ពាក្យសុំក្ស័យធន ដើម្បីរៀបចំរចនាសម្ព័ន្ធបំណុល និងធនធានហិរញ្ញវត្ថុរបស់ខ្លួន។ យោងតាម CNN ខ្សែសង្វាក់រោងកុនធំជាងគេទីពីររបស់ពិភពលោក Cineworld Group បានដាក់ពាក្យសុំការការពារក្ស័យធននៅក្នុងតុលាការ របស់សហរដ្ឋអាមេរិកដើម្បីបន្ធូរបន្ថយបំណុលរបស់ខ្លួន ចំនួន ៦ពាន់លានដុល្លារ។ លោក Mooky Greidinger នាយកប្រតិបត្តិនៃ Cineworld បានពន្យល់ថាការមកដល់នៃជំងឺរាតត្បាតបានធ្វើឱ្យប្រតិបត្តិការអាជីវកម្មធ្លាក់ចុះនៅពេលដែលរោងកុនត្រូវបានបង្ខំឱ្យបិទហើយម៉ោងបញ្ចាំងភាពយន្តត្រូវបានកាត់បន្ថយ។ ទោះបីជាយ៉ាងណាក៏ដោយ លោកបាននិយាយថា ការដាក់ពាក្យក្ស័យធនគឺជាផ្នែកមួយនៃផែនការពង្រឹងជំហរហិរញ្ញវត្ថុរបស់ខ្លួន ដើម្បីបង្កើតរចនាសម្ព័ន្ធដើមទុនដែលអាចបត់បែនបាន ដោយហេតុនេះជួយឱ្យអាជីវកម្មដំណើរការប្រកបដោយប្រសិទ្ធភាពផ្លែផ្កា៕ ផ្តល់សិទ្ធិដោយ៖ ខ្មែរណូត

អង្គការសុខភាពពិភពលោក កាលពីថ្ងៃពុធ ទី១៤ ខែកញ្ញា ឆ្នាំ២០២២ បាននិយាយថា ចំនួនករណីថ្មីនៃជំងឺ COVID-19 ដែលត្រូវបានរាយការណ៍មកខ្លួន គឺបានធ្លាក់ចុះយ៉ាងខ្លាំង ហើយ WHO ជំរុញឱ្យពិភពលោកចាប់យកឱកាសនេះ ដើម្បីបញ្ចប់ការរាតត្បាតនៃជំងឺ ដែលបានសម្លាប់ពលរដ្ឋអស់រាប់លាននាក់ចាប់តាំងពីចុងឆ្នាំ២០១៩ មួយនេះ។ ប្រធានអង្គការសុខភាពពិភពលោក លោក Tedros Adhanom Ghebreyesus បាននិយាយថា ករណីថ្មីៗមានការថយចុះគួរឱ្យកត់សម្គាល់ ហើយសប្តាហ៍មុនវាបានធ្លាក់ចុះដល់កម្រិតទាបបំផុត ចាប់តាំងពីខែមីនាឆ្នាំ២០២០ មក។ គាត់បានប្រាប់អ្នកយកព័ត៌មានថា៖«យើងមិនដែលនៅលើទីតាំងប្រសើរជាងនេះ ដើម្បីបញ្ចប់ជំងឺរាតត្បាតទេ។ យើង​មិន​ទាន់​ទៅដល់ទីតាំងនោះឡើយ​ទេ ប៉ុន្តែ​ទី​បញ្ចប់របស់វា ​គឺ​ជិតមកដល់ហើយ»។ លោក​បាន​បន្ថែម​ថា៖«ប៉ុន្តែ​ពិភពលោក​ចាំបាច់​ត្រូវ​បង្កើន​ការ​ចាប់​យក​ឱកាស​នេះ។ ប្រសិនបើយើងមិនចាប់យកឱកាសនេះឥឡូវនេះទេ យើងប្រឈមនឹងហានិភ័យនៃការប្រែប្រួលកាន់តែច្រើន ការស្លាប់កាន់តែច្រើន ការរំខានកាន់តែច្រើន និងភាពមិនច្បាស់លាស់កាន់តែច្រើន»។ គួរឱ្យដឹងដែថា យោងតាមរបាយការណ៍រោគរាតត្បាតចុងក្រោយបង្អស់របស់អង្គការសុខភាពពិភពលោកស្តីពី COVID-19 ចំនួនករណី ដែលបានរាយការណ៍បានធ្លាក់ចុះ ២៨% មកនៅត្រឹម ៣.១ លាន ក្នុងអំឡុងពេលសប្តាហ៍ ដែលបញ្ចប់នៅថ្ងៃទី១១ ខែកញ្ញា បន្ទាប់ពីការធ្លាក់ចុះ ១២% កាលពីសប្តាហ៍មុន៕ ផ្តល់សិទ្ធិដោយ៖ ខ្មែរណូត

បងប្អូនប្រហែលជានៅចាំបានពីករណីឃាតកម្ម ដែលធ្លាប់ល្បីល្បាញកក្រើករាជធានីភ្នំពេញ កាលពីខែមករា ឆ្នាំ២០២០ នៅពេលដែលបុរសជាមន្ដ្រីយោធាពាក់ស័ក្ដិ៤ បានបាញ់ចំក្បាលនារីជាគូដណ្ដឹង ដែលជានិស្សិតពេទ្យ និងជាអ្នកលក់ឡេតាមអនឡាញ រហូតដល់ស្លាប់នៅនឹងកន្លែង។ ឥឡូវនេះ បុគ្គលឈ្មោះ យឺន វ៉ាន់ដេត ដែលកំពុងសំងំលាក់ខ្លួនធ្វើជាកម្មករខុសច្បាប់នៅខេត្តចន្ទបូរី ត្រូវបានឃាត់ខ្លួនដោយអាជ្ញាធររបស់ប្រទេសថៃ នេះបើតាមការចុះផ្សាយរបស់សារព័ត៌មាន Thairath ។ ភាគីកម្ពុជាបានសហការផ្តល់ព័ត៌មានទៅកាន់សមត្ថកិច្ចថៃ ហើយសមត្ថកិច្ចថៃក៏បានឃាត់ខ្លួន យឺន វ៉ាន់ដេត និងកំពុងតែអនុវត្តតាមច្បាប់អន្តោប្រវេសន៍ ដើម្បីប្រគល់មកកម្ពុជាចាត់ការតាមផ្លូវច្បាប់ បន្ទាប់ពីនេះទៀត៕ ផ្តល់សិទ្ធិដោយ៖ ខ្មែរណូត