នៅក្នុងបទសម្ភាសមួយកាលពីពេលថ្មីៗនេះ ឪពុករបស់លោក Elon Musk គឺលោក Errol បាននិយាយថា គាត់មិនមានមោទកភាពចំពោះគាត់ នោះទេ ទោះបីជា Musk ជោគជ័យលើរឿងជាច្រើន និងជាអ្នកមានបំផុតលំដាប់ទី១ លើលោកក៏ដោយ។ អំឡុងពេលសម្ភាសន៍ក្នុងកម្មវិធី “Kyle and Jackie O Show” កាលពីថ្ងៃចន្ទ លោក Errol បានបង្ហាញថា គាត់មិនមានមោទកភាពចំពោះលោក Elon Musk ដែលជាកូនប្រុសរបស់គាត់ទេ ដោយសារតែត្រកូល Musk សម្រេចបាន “រឿងជាច្រើនអស់រយៈពេលជាយូរណាស់មកហើយ”។ យ៉ាងណាមិញ កាលពីថ្ងៃសុក្រ ថ្មីៗនេះនៅក្នុងបទសម្ភាសន៍ជាមួយកាសែត The Daily Mail លោក Errol បានឆ្លើយតបទៅនឹងការលើកឡើងរបស់គាត់ ដោយនិយាយថា គាត់ពិតជាមានមោទកភាពចំពោះលោក Elon ។ ឪពុកវ័យ ៧៦ឆ្នាំ រូបនេះ បានបកស្រាយថា តាមពិតគាត់មានមោទកភាពចំពោះកូនប្រុសរបស់គាត់ បើទោះបីជាគាត់ធ្លាប់បានអះអាងផ្ទុយពីនេះក៏ដោយ ហើយការអះអាងនោះ ដោយសារតែគាត់យល់ខុសចំពោះសំនួរដែលពិធីករបានសួរគាត់។ ជាមួយគ្នានេះ លោក […]

កូរ៉េខាងត្បូង៖ របាយការណ៍ចុងក្រោយមួយស្តីអំពីគ្រោះថ្នាក់ដោយជំនន់ទឹកភ្លៀងនៅក្នុងប្រទេសកូរ៉េខាងត្បូងដែលបានកើតឡើងកាលពីយប់ថ្ងៃចន្ទឆ្លងចូលថ្ងៃអង្គារម្សិលមិញនេះបានបង្ហាញថា គិតត្រឹមព្រឹកថ្ងៃពុធ ទី១០ ខែសីហានេះគឺជំនន់ទឹកភ្លៀងបានឆក់យកជីវិតពលរដ្ឋកូរ៉េខាងត្បូងយ៉ាងតិចណាស់ចំនួន ៩នាក់។ បើយោងតាមការចុះផ្សាយរបស់បណ្តាញសារព័ត៌មាន Channel News Asia បានបញ្ជាក់ថា ក្រៅតែពីបានរកឃើញអ្នកស្លាប់ទាំង ៩នាក់នោះ អាជ្ញាធរកូរ៉េខាងត្បូងក៏បានរាយការណ៍អំពីករណីមានពលរដ្ឋចំនួន ១៧នាក់ត្រូវរងរបួស និងពលរដ្ឋចំនួន ៧នាក់ផ្សេងទៀតកំពុងបាត់ខ្លួនផងដែរ។ ក្នុងចំណោមពលរដ្ឋដែលបានស្លាប់ទាំង ៩នាក់នោះ គឺមានសាកសពចំនួន ៥នាក់ត្រូវបានរកឃើញនៅក្នុងទីក្រុងសេអ៊ូល សាកសពចំនួន ៣នាក់ត្រូវបានរកឃើញនៅក្នុងខេត្តហ្យុងជី និងសាកសពម្នាក់ទៀតត្រូវបានរកឃើញនៅក្នុងខេត្តហ្គាងវ៉ុន។ ចំពោះការខូចខាតវិញគឺមានផ្ទះសម្បែង អាគារ និងកន្លែងសាធារណៈប្រមាណជា ២៨,០០០កន្លែងត្រូវបានបំផ្លាញ ខណៈមានពលរដ្ឋជាង ១,១០០គ្រួសារត្រូវបង្ខំចិត្តធ្វើការជម្លៀសខ្លួនជាបន្ទាន់។ បើតាមរដ្ឋបាលឧតុនិយមកូរ៉េខាងត្បូងបានបញ្ជាក់ថា កាលពីថ្ងៃម្សិលមិញនេះភ្លៀងដែលបានធ្លាក់នៅក្នុងទីក្រុងសេអ៊ូលគឺមានកម្រិត ៥២៥​ មីលីម៉ែត្រ ខណៈនៅក្នុងតំបន់​ Yangpyeong ដែលជាតំបន់នៅជាប់ក្រុងសេអ៊ូលវិញគឺទឹកភ្លៀងមានកម្រិតរហូតដល់ ៥៣២,៥ មីលីម៉ែត្រក្នុងមួយម៉ោង ដែលសុទ្ធតែជាកម្រិតទឺកភ្លៀងខ្ពស់បំផុតមិនធ្លាប់មាននោះទេ៕ ផ្តល់សិទ្ធិដោយ៖ ខ្មែរណូត

តាមការស្រាវជ្រាវថ្មីមួយបានបង្ហាញថា ទឹកភ្លៀងនៅក្នុងទីតាំងភាគច្រើននៅលើផែនដីរបស់យើងនេះ មានកម្រិតនៃសារធាតុគីមីដែល «លើសពីកម្រិតសុវត្ថិភាព» នេះបើតាមការចុះផ្សាយរបស់សារព័ត៌មាន EURO NEWS ។ សារធាតុសំយោគទាំងនោះ ត្រូវបានគេហៅថា PFAS (poly- and perfluoroalkyl substances) ដែលជាសារធាតុត្រូវបានគេប្រើប្រាស់នៅក្នុងខ្ទះចៀនមិនជាប់ (non-stick pans) ពពុះពន្លត់អគ្គិភ័យ និងសម្លៀកបំពាក់ដែលមិនជ្រាបទឹក។ វាត្រូវបានដាក់ឈ្មោះថា «សារធាតុគីមីជារៀងរហូត» ហើយពួកវានៅតែបន្តកើតមានជាច្រើនឆ្នាំនៅក្នុងបរិស្ថាន ដោយ​គ្មាន​កន្លែង​សុវត្ថិភាព​នៅ​លើ​ផែនដីនេះ ​អាចជៀស​វាង​ពីពួក​វានោះ​ទេ។ អ្នកស្រាវជ្រាវមកពីសាកលវិទ្យាល័យ Stockholm បាននិយាយថា វាមានសារៈសំខាន់ខ្លាំងណាស់ ដែលការប្រើប្រាស់សារធាតុទាំងនេះត្រូវបានរឹតបន្តឹងឱ្យបានឆាប់រហ័ស។ អ្នកវិទ្យាសាស្ត្របារម្ភថា PFAS អាចបង្កហានិភ័យដល់សុខភាព រួមទាំងជំងឺមហារីក ទោះបីការស្រាវជ្រាវមិនទាន់អាចសន្និដ្ឋានបានច្បាស់លាស់ក៏ដោយ។ ពួកគេមានការព្រួយបារម្ភកាន់តែខ្លាំងឡើងអំពីការរីកសាយភាយនៃ PFAS ក្នុងប៉ុន្មានឆ្នាំថ្មីៗនេះ ហើយប្រហែល ៤,៥០០ នៃសមាសធាតុសំយោគមានមូលដ្ឋានលើហ្វ្លុយអូរីនទាំងនេះ ត្រូវបានគេរកឃើញនៅស្ទើរតែគ្រប់លំនៅដ្ឋាននៅលើផែនដី ក្នុងផលិតផលប្រចាំថ្ងៃរាប់រយមុខ រួមទាំងការវេចខ្ចប់ម្ហូបអាហារ ឧបករណ៍ចង្ក្រានមិនជាប់ អាវភ្លៀង សារធាតុស្អិត ក្រដាស និងថ្នាំលាប -ល-។ សម្រាប់សារធាតុដ៏ល្បីមួយទៀត គឺអាស៊ីតបង្កឱ្យមានជំងឺមហារីក perfluorooctanoic (PFOA) ក៏កំពុងធ្វើឱ្យចំនួនទឹកមានសុវត្ថិភាពធ្លាក់ចុះ […]

(វ៉ាស៉ីនតោន)៖ រដ្ឋបាលប្រធានាធិបតីអាមេរិក លោក ចូ បៃដិន នៅថ្ងៃចន្ទសប្តាហ៍នេះបានប្រកាសផ្ដល់កញ្ចប់ជំនួយយោធាមានទំហំ ១ពាន់លានដុល្លារបន្ថែម ដល់ប្រទេសអ៊ុយក្រែន ដែលរួមបញ្ចូលទាំងគ្រាប់រំសេវសម្រាប់ប្រព័ន្ធមីស៊ីលរយៈចម្ងាយឆ្ងាយ និងរថពាសដែកដឹកជញ្ជូនសម្ភារវេជ្ជសាស្រ្ត។ នេះបើយោងតាម ការដកស្រង់ចេញពីទីភ្នាក់ងារសារព័ត៌មាន Reuters នៅថ្ងៃអង្គារ ទី៩ ខែសីហា ឆ្នាំ២០២២។ នេះជាកញ្ចប់ជំនួយថ្មីចុងក្រោយបង្អស់ ដែលទីក្រុងវ៉ាស៉ីនតោនផ្តល់ឲ្យអ៊ុយក្រែន។ បើតាមទីភ្នាក់ងារសារព័ត៌មាន Reuters កញ្ចប់ជំនួយខាងលើនេះរួមមានគ្រាប់រំសេវ សម្រាប់ប្រព័ន្ធមីស៉ីល HIMARS គ្រាប់សម្រាប់ប្រព័ន្ធបាញ់មីស៉ីល NASAMS និងរថពាសដែកដឹកជញ្ជូនសំភារៈពេទ្យ M113 រហូតដល់ ៥០គ្រឿង។ គួរបញ្ជាក់ថា ទីភ្នាក់ងារអាមេរិកសម្រាប់ការអភិវឌ្ឍអន្តរជាតិ (USAID) ក៏បានសន្យាថានឹងផ្តល់ជំនួយជាថវិការចំនួន ៤.៥ពាន់លានដុល្លារ ដើម្បីជួយអ៊ុយក្រែន ក្នុងការផ្តល់មូលនិធិជាតម្រូវការបន្ទាន់សម្រាប់រដ្ឋាភិបាល រួមទាំងការទូទាត់ប្រាក់សោធននិវត្តន៍សុខមាលភាពសង្គម និងថ្លៃថែទាំសុខភាពផងដែរ៕ ផ្តល់សិទ្ធិដោយ៖ freshnews

នាយកប្រតិបត្តិក្រុមហ៊ុន Apple លោក Tim Cook បាននិយាយថា ប្រទេសវៀតណាម គឺជាទីផ្សារមួយក្នុងចំណោមទីផ្សារដែលកំពុងរីកចម្រើនចំនួនបួនសម្រាប់ក្រុមហ៊ុនរបស់ខ្លួន ដែលបានរួមចំណែកដល់ភាពជោគជ័យរបស់ក្រុមហ៊ុននៅក្នុងត្រីមាសទីពីរនៃឆ្នាំ ២០២២ នេះ។ នៅក្នុងរបាយការណ៍ហិរញ្ញវត្ថុរបស់ខ្លួនសម្រាប់ត្រីមាសទី២ ក្រុមហ៊ុន Apple បានប្រកាសពីប្រាក់ចំណូលសរុបចំនួន ៨៣ពាន់លានដុល្លារ កើនឡើង ២% ពីមួយឆ្នាំទៅមួយឆ្នាំ បើទោះបីជាស្ថានភាពទីផ្សារប្រែប្រួលក៏ដោយ។ ជាមួយគ្នានេះ កាលពីខែចុងខែកក្កដាលោក Tim Cook បាននិយាយក្នុងអំឡុងពេលប្រកាសពីប្រាក់ចំណូលរបស់ក្រុមហ៊ុនថា៖ ” យើងបានបង្កើតកំណត់ត្រាប្រចាំត្រីមាសខែមិថុនានៅអាមេរិក នៅអឺរ៉ុប និងនៅក្នុងតំបន់អាស៊ីប៉ាស៊ីហ្វិក។ យើងក៏បានឃើញកំណត់ត្រាប្រាក់ចំណូលប្រចាំត្រីមាសក្នុងខែមិថុនា ទាំងនៅក្នុងទីផ្សារអភិវឌ្ឍន៍ និងកំពុងរីកចម្រើន ជាមួយនឹងកំណើនពីរខ្ទង់នៅក្នុងប្រទេសប្រេស៊ីល ឥណ្ឌូនេស៊ី និងវៀតណាម និងការកើនឡើងជិតទ្វេដងនៃប្រាក់ចំណូលនៅក្នុងប្រទេសឥណ្ឌា”។ មិនតែប៉ុណ្ណោះលោកបានបន្ថែមថា ក្រុមហ៊ុននៅតែបន្តប្រតិបត្តិតាមភូមិសាស្ត្រសំខាន់ៗមួយចំនួនជាមួយនឹងការជ្រៀតចូលទាបនៃទូរស័ព្ទ iPhone រវាងប្រទេសឥណ្ឌូនេស៊ី វៀតណាម និងឥណ្ឌា ដែលយើងបានធ្វើបានយ៉ាងល្អ” ។ គួរបញ្ជាក់ផងដែរថា យុទ្ធសាស្ត្ររបស់ក្រុមហ៊ុន គឺប្រើប្រាស់ម៉ូដែលស្មាតហ្វូនដើម្បីពង្រីកវត្តមានរបស់ខ្លួន ជាមួយនឹងការផ្សព្វផ្សាយផលិតផលផ្សេងទៀតដើម្បីធ្វើតាម៕ ផ្តល់សិទ្ធិដោយ៖ ខ្មែរណូត

Mars Wrigley ក្រុមហ៊ុនផលិតស្ករគ្រាប់ដ៏ល្បី និងធំមួយរបស់អាមេរិកដែលគ្រប់គ្រងប្រ៊េនសូកូឡា Snickers បានចេញមុខសុំទោសជាសាធារណៈ បន្ទាប់ពីបានផ្សាយពាណិជ្ជកម្មពីដុំស្ករសូកូឡារបស់ខ្លួន ភ្ជាប់ជាមួយការលើកឡើងថា តៃវ៉ាន់ជាប្រទេសមួយ រហូតបង្កឱ្យមានការខឹងសម្បារពីចិនដីគោក។ នេះបើយោងតាមការចុះផ្សាយរបស់សារព័ត៌មាន Channel News Asia កាលពីថ្ងៃទី០៦ ខែសីហា កន្លងទៅនេះ។ តាមរយៈវីដេអូ និងរូបភាព ដែលបានបង្ហាញនៅលើគេហទំព័រ Snickers បានឱ្យដឹងថា ក្រុមហ៊ុនបានផ្សព្វផ្សាយពីដុំសូកូឡា Snickers ពិសេសដែលផលិតឡើងក្នុងចំនួនមានកំណត់ ដោយប្រូម៉ូតថា ផលិតផលនេះមានលក់នៅតែក្នុងប្រទេស កូរ៉េខាងត្បូង ម៉ាឡេស៊ី និងតៃវ៉ាន់ប៉ុណ្ណោះ។ ពាណិជ្ជកម្ម​ដែល​មាន​ក្រុម​ចម្រៀង​ប្រុស​កូរ៉េ​ខាង​ត្បូង BTS បាន​បង្ក​ឱ្យ​មាន​ការ​ខឹង​សម្បារ​យ៉ាង​ខ្លាំង​នៅ​លើ​ប្រព័ន្ធ​បណ្ដាញ​សង្គម Weibo របស់​ចិន កាល​ពី​ថ្ងៃ​សុក្រ ទី៥ ខែសីហា។ ក្រោយមក ក្រុមហ៊ុន Mars Wrigley បានចេញផ្សាយការសុំទោសនៅលើគណនី Snickers China Weibo របស់ខ្លួន ហើយបាននិយាយថា ខ្លឹមសារពាក់ព័ន្ធត្រូវបានកែប្រែ។ ជាមួយគ្នានេះដែរ ប៉ុន្មានម៉ោងបន្ទាប់ពីសេចក្តីថ្លែងការណ៍ដំបូង Snickers China បានចែករំលែកការបង្ហោះ Weibo […]

ព្រឹទ្ធសភាអាមេរិកបានអនុម័តលើវិក័យប័ត្រតម្លៃ ៤៣០ ពាន់លានដុល្លារ ដើម្បីប្រយុទ្ធប្រឆាំងនឹងការប្រែប្រួលអាកាសធាតុ និងកាត់បន្ថយការចំណាយលើការថែទាំសុខភាព។ ច្បាប់នេះអំពាវនាវឱ្យមានការចំណាយ ដើម្បីលើកកម្ពស់ការប្រើប្រាស់ថាមពលកកើតឡើងវិញ និងវិធានការផ្សេងទៀត ខណៈនឹងដំឡើងពន្ធលើអាជីវកម្មធំៗ ដើម្បីផ្តល់មូលនិធិដល់គ្រោងការនេះ។ ការបោះឆ្នោតកាលពីថ្ងៃអាទិត្យ ទទួលបានលទ្ធផល ៥០ ទល់ ៥០ ប៉ុន្ដែអនុប្រធានាធិបតីលោកស្រី Kamala Harris ដែលបម្រើការជាប្រធានព្រឹទ្ធសភា បានចូលរួមបោះឆ្នោតឱ្យបានលទ្ធផល ៥១ ទល់ ៥០។ ការអនុម័តវិក័យប័ត្រនេះ គឺជាជ័យ​ជម្នះសម្រាប់ប្រធានាធិបតីលោក ចូ បៃដិន ទោះបីជាផែនការចំណាយរបស់គាត់នេះ ត្រូវបានកាត់បន្ថយពី ១.៧៥ ទ្រីលានដុល្លារក៏ដោយ។ វិក័យប័ត្រដើមរបស់លោក បៃដិន រួមបញ្ចូលការកាត់ថ្លៃសិក្សាបន្ថែម លើការប្រយុទ្ធប្រឆាំងនឹងការប្រែប្រួលអាកាសធាតុ។ វិក័យប័ត្រនេះ បានជាប់គាំងជាយូរមកហើយនៅក្នុងសភា ដោយសារតែការផ្ទុយគំនិតគ្នាក្នុងចំណោមគណបក្សប្រជាធិបតេយ្យផ្ទាល់ខ្លួនរបស់គាត់។ ដូច្នេះលោក បៃដិន កាត់បន្ថយការចំណាយលើច្បាប់នេះ ដើម្បីទទួលបានការឯកភាពគ្នាក្នុងចំណោមគណបក្សប្រជាធិបតេយ្យ។ កំណែចុងក្រោយនៃវិក័យប័ត្រនេះ ត្រូវបានគេរំពឹងថា នឹងត្រូវបានអនុម័តផងដែរដោយសភាតំណាង ដែលគ្រប់គ្រងដោយគណបក្សប្រជាធិបតេយ្យក្នុងពេលឆាប់ៗនេះ និងចុះហត្ថលេខាដោយលោក បៃដិន ដើម្បីធ្វើវាឱ្យទៅជាច្បាប់៕ ផ្តល់សិទ្ធិដោយ៖ ខ្មែរណូត

ម៉ាកាវ៖ យោងតាមការចុះផ្សាយរបស់បណ្តាញសារព័ត៌មាន Channel News Asia បានឲ្យដឹងថា អាជ្ញាធរក្រុងម៉ាកាវបានសម្រេចអនុវត្តវិធានការធ្វើតេស្តរកជំងឺកូវីដ-១៩ទ្រង់ទ្រាយធំជាថ្មីម្តងទៀតហើយ ក្រោយម៉ាកាវ ទើបសម្រេចលុបចោលវិធានការបិទខ្ទប់ទីក្រុងបានមិនដល់មួយសប្តាហ៍ផង។ គួររម្លឹកជូនថា កាលពីថ្ងៃទី០២ ខែសីហាកន្លងទៅ អាជ្ញាធរក្រុងម៉ាកាវបានសម្រេចប្រកាសបើកទីក្រុងឲ្យមានសកម្មភាពអាជីវកម្ម សកម្មភាពធ្វើដំណើរ និងសកម្មភាពកំសាន្តឡើងវិញ ក្រោយម៉ាកាវមិនបានរកឃើញករណីឆ្លងជំងឺកូវីដ-១៩ថ្មីជាច្រើនថ្ងៃជាប់ៗគ្នា។ យ៉ាងណាក្តី នៅថ្ងៃអាទិត្យ ទី០៧ ខែសីហានេះ អាជ្ញាធរក្រុងម៉ាវបានប្រកាសឲ្យពលរដ្ឋទាំងអស់ ពោលគឺមានចំនួនប្រមាណជា ៧០០,០០០នាក់ត្រូវធ្វើតេស្តដោយប្រើឧករណ៍តេស្តរហ័សជាថ្មីម្តងទៀត។ វិធានការធ្វើតេស្តទ្រង់ទ្រាយនៅពេលនេះនឹងត្រូវប្រើរយៈពេល ២ថ្ងៃ ដោយគិតចាប់ពីថ្ងៃអាទិត្យ ទី៧ រហូតដល់ថ្ងៃចន្ទ ទី៨ ខែសីហានេះ។ សូមបញ្ជាក់ជូនថា វិធានការធ្វើតេស្តទ្រង់ទ្រាយធំនេះត្រូវបានដាក់ចេញ ក្រោយអាជ្ញាធរសុខាភិបាលម៉ាកាវបានរកឃើញករណីអ្នកឆ្លងជំងឺកូវីដ-១៩ថ្មីចំពោះអ្នកដំណើរម្នាក់ដែលទើបត្រលប់មកពីទីក្រុង Zhuhai ដែលជាទីក្រុងជាប់ជាមួយនឹងម៉ាកាវ៕ ផ្តល់សិទ្ធិដោយ៖ ខ្មែរណូត

(ហុងកុង)៖ ប្រព័ន្ធផ្សព្វផ្សាយរដ្ឋរុស្ស៉ី បានរាយការណ៍ថាកូរ៉េខាងជើងមានបំណងបញ្ជូនកងទ័ពស្ម័គ្រចិត្ត ១០០,០០០នាក់ ដើម្បីឱ្យទៅជួយរុស្ស៉ីច្បាំងយកជ័យជម្នះ នៅក្នុងសង្រ្គាមអ៊ុយក្រែន។ នេះបើតាមការដកស្រង់ចេញផ្សាយពីសារព័ត៌មាន South China Morning Post នៅថ្ងៃចន្ទ ទី៨ ខែសីហា ឆ្នាំ២០២២។ ប្រព័ន្ធផ្សព្វផ្សាយរដ្ឋរុស្ស៉ី Channel One Russia ធ្វើសេចក្ដីរាយការណ៍បែបនេះ ដោយផ្អែកលើសម្ដីអ្នកជំនាញខាងយោធារុស្ស៉ីម្នាក់ គឺលោក អ៉ីហ្គ័រ កូរ៉ុតឈិនកូ (Igor Korotchenko) ដែលបានបញ្ជាក់ដូច្នេះថា «មានសេចក្ដីរាយការណ៍មួយចំនួនថាកងទ័ពស្ម័គ្រចិត្តកូរ៉េខាងជើង ១០០,០០០នាក់ កំពុងត្រៀមខ្លួនធ្វើដំណើរមក (រុស្ស៉ី) និងចូលរួមក្នុងជម្លោះ»។ លោក កូរ៉ុតឈិនកូ បន្ថែមទៀតថា «ប្រសិនបើកូរ៉េខាងជើង បង្ហាញពីឆន្ទៈដើម្បីបំពេញកាតព្វកិច្ចអន្តរជាតិរបស់ពួកគេក្នុងការ ប្រយុទ្ធប្រឆាំងជាមួយហ្វាស៊ីសអ៊ុយក្រែន នោះយើងគួរតែអនុញ្ញាតឱ្យពួកគេធ្វើវាចុះ»។ ក៏ប៉ុន្តែ ទាំងខាងរដ្ឋាភិបាលរុស្ស៉ី និងកូរ៉េខាងជើងមិនបានធ្វើអត្ថាធិប្បាយអ្វី ឆ្លើយតបទៅនឹងសេចក្ដីរាយការណ៍នេះឡើយ។ គួរបញ្ជាក់ថា កូរ៉េខាងជើង ត្រូវបានគេរាយការណ៍ថា ជាប្រទេសមានយោធាធំលំដាប់ទី៤ នៅលើពិភពលោក ដោយមានកងទ័ពសកម្មសរុប ១.៣លាននាក់ និងកងទ័ពបម្រុង ៦០០,០០០នាក់៕ ផ្តល់សិទ្ធិដោយ៖ freshnews

យោងតាមការចុះផ្សាយរបស់ ក្រសួងព័ត៌មាន នៅថ្ងៃទី០៨ ខែសីហា ឆ្នាំ២០២២ បានឱ្យដឹងថា នាយកដ្ឋានគ្រប់គ្រងជំងឺរបស់ប្រទេសថៃ (DDC) កាលពីថ្ងៃទី៥ ខែសីហា បានប្រកាសពីការរកឃើញករណីឆ្លងជំងឺអុតស្វាទី៤ ដែលបានកើតលើស្ត្រីម្នាក់អាយុ ២២ឆ្នាំដែលជាការឆ្លងលើស្ត្រីដំបូងគេដែលត្រូវបានរកឃើញនៅក្នុងប្រទេសនេះ។ អគ្គនាយក DDC លោក អូផាត កនកាវីនពុង បាននិយាយថា អ្នកជំងឺនេះត្រូវបានគេរាយការណ៍ថា ឧស្សាហ៍ទៅកម្សាន្តពេលយប់នៅទីក្រុងបាងកកម្តងក្នុងមួយសប្តាហ៍ ហើយកាលពីថ្ងៃទី ២៩ ខែកក្កដា នាងបានកើតគ្រុនក្តៅ បន្ទាប់មកមានពងបែកដែលលេចឡើងនៅលើជើង និងដៃរបស់នាងនៅថ្ងៃបន្ទាប់។ ក្រោយមកពងបែកទាំងនោះបានរាលដាលពាសពេញរាងកាយរបស់នាង។ នៅថ្ងៃទី៣ ខែសីហា នាងបានទៅពិនិត្យនៅមន្ទីរពេទ្យមួយនៅក្នុងខេត្តសាមុតប្រាកាន ដើម្បីធ្វើរោគវិនិច្ឆ័យ និងព្យាបាល។ សំណាករបស់នាងត្រូវបានបញ្ជូនទៅនាយកដ្ឋានវិទ្យាសាស្ត្រវេជ្ជសាស្ត្រ និងមន្ទីរពិសោធន៍នៅមហាវិទ្យាល័យវេជ្ជសាស្ត្រនៃសាកលវិទ្យាល័យជូឡាឡុងកន ដែលក្រោយមកបានបញ្ជាក់ថា នាងបានឆ្លងមេរោគជំងឺអុតស្វា។ នៅពេលមុននេះ ប្រទេសថៃបានបង្កើនវិធានការត្រួតពិនិត្យជំងឺអុតស្វានៅគ្រប់ចំណុចត្រួតពិនិត្យជំងឺ និងច្រកចូលអន្តរជាតិទាំងអស់ បន្ទាប់ពីរកឃើញករណីឆ្លងទីបី៕ ប្រភព៖ ក្រសួងព័ត៌មាន