ស្ដេចប្រដាល់ហ្វីលីពីន Manny Pacquiao បានជិះយន្តហោះឯកជនរបស់គាត់មកដល់នៅទីក្រុងបាងកក របស់ប្រទេសថៃ នៅថ្ងៃព្រហស្បតិ៍ម្សិលមិញ នាម៉ោងប្រហែល ៣រសៀល ដើម្បីចូលរួមសន្និសីទសារព័ត៌មានស្តីពីការប្រកួត ដែលនឹងគ្រោងធ្វើឡើងនៅខែមករា ឆ្នាំក្រោយ ជាមួយនឹងអ្នកប្រដាល់ថៃ Buakaw Banchamek។ កីឡាករហ្វីលីពីន ដែលហៅក្រៅថា PacMan ត្រូវបានទទួលស្វាគមន៍ដោយអ្នកគាំទ្រ និងប្រព័ន្ធផ្សព្វផ្សាយនៅអាកាសយានដ្ឋានអន្តរជាតិដនមឿង មុនពេលឆ្ពោះទៅសណ្ឋាគារ។

នាយកប្រតិបត្តិរបស់ Fresh Air Festival លោក Vinij Lertratanachai បានឱ្យដឹងថា លោកកំពុងរៀបចំព្រឹត្តិការណ៍កីឡាដ៏សំខាន់មួយនៅក្នុងប្រទេសថៃ ដែលជាការប្រកួតរវាង Buakaw និង Pacquiao។ លោក Vinij បាននិយាយថា អ្នកប្រដាល់ជើងខ្លាំងទាំង ២ នឹងប្រកួតក្នុង «The Match of Legends» ឬ «The Match 3» ដែលគ្រោងនឹងធ្វើឡើងនៅខែមករា ឆ្នាំ២០២៤ នៅទីក្រុងបាងកក។

ចាប់តាំងពីឆ្នាំ១៩៩៥ លោក Pacquiao ដែលកំពុងមានវ័យ ៤៤ឆ្នាំ បានប្រកួតចំនួន ៧២ដង ដោយឈ្នះ ៦២ដង (ផ្ដួលគូប្រកួតឱ្យសន្លប់ ៣៩ដង) ចាញ់ ៨ដង និងស្មើ ២ដង។ ចំណែក Buakaw ទទួលបានកេរ្តិ៍ឈ្មោះតាមរយៈការឈ្នះការប្រកួតអន្តរជាតិដូចជា៖ ការប្រកួត K-1 World MAX ឆ្នាំ២០០៤ និង២០០៦។ គួរឱ្យដឹងដែរថា លោក Vinij មាន​បទពិសោធន៍ច្រើន​ក្នុង​ការ​រៀបចំ​ព្រឹត្តិការណ៍​កីឡា​កម្រិត​ស្ដង់ដារ ដូចជាការប្រកួតរវាងក្រុម Manchester United និង Liverpool ក្នុង​ទីក្រុង​បាងកក​កាល​ពី​ឆ្នាំ​មុនជាដើម៕ ផ្តល់សិទ្ធិដោយ៖ ខ្មែរណូត