ទីបំផុត! TikTok វិលត្រឡប់មក App Store និង Play Store អាមេរិកវិញហើយ បន្ទាប់ពីត្រូវបានដកចេញកាលពីខែមុន
(បរទេស)៖ ទទួលបានរបាយការណ៍មកថា វេទិកាប្រព័ន្ធផ្សព្វផ្សាយសង្គម TikTok ដែលស្ថិតក្រោមកម្មសិទ្ធិរបស់ចិន បានត្រឡប់ទៅហាងកម្មវិធីរបស់ Apple និង Google វិញហើយ បន្ទាប់ពីត្រូវបានដកចេញជាបណ្តោះអាសន្ននៅសហរដ្ឋអាមេរិកកាលពីថ្ងៃទី១៨ ខែមករា ដើម្បីឆ្លើយតបទៅនឹងច្បាប់សន្តិសុខជាតិដែលចូលជាធរមាន។ នេះបើយោងតាមការចេញផ្សាយពី CNBC នៅថ្ងៃទី១៣ ខែកុម្ភៈ ឆ្នាំ២០២៥។
ជិតរយៈពេលមួយខែ នៅថ្ងៃព្រហស្បតិ៍សប្តាហ៍នេះ TikTok ត្រូវបានដាក់ឱ្យទាញយកជាថ្មីម្តងទៀតនៅក្នុង App Store និង Play Store។ ជុំវិញ ការដកកម្មវិធីចិនដ៏លេចធ្លោនេះ បានកើតចេញពីការព្រួយបារម្ភអំពីសន្តិសុខជាតិ ដោយរដ្ឋាភិបាលសហរដ្ឋអាមេរិកព្រួយបារម្ភអំពីកម្មសិទ្ធិរបស់ ByteDance និងការតភ្ជាប់ទៅកាន់សាធារណៈរដ្ឋប្រជាមានិតចិន។ ច្បាប់ស្តីពីការការពារពីសត្រូវបរទេស ដែលចុះហត្ថលេខាដោយអតីតប្រធានាធិបតីលោក Joe Biden ក្នុងខែមេសា បានកំណត់ថា ByteDance ដែលជាក្រុមហ៊ុនមេរបស់ TikTok ត្រូវដកហូតប្រតិបត្តិការនៅសហរដ្ឋអាមេរិកត្រឹមថ្ងៃទី១៩ ខែមករា ឬប្រឈមនឹងការហាមឃាត់។
យ៉ាងណាមិញ TikTok បានអះអាងថា ច្បាប់នេះរំលោភលើសិទ្ធិវិសោធនកម្មលើកទី១ នៃអ្នកប្រើប្រាស់ជាង ១៧០ លាននាក់នៅសហរដ្ឋអាមេរិក។ កាលពីខែមករា តុលាការកំពូលបានចូលរួមភាគីជាមួយរដ្ឋបាលលោក Biden ដោយបញ្ជាក់ថា «សភាបានកំណត់ការដកខ្លួនចេញដើម្បីដោះស្រាយបញ្ហាសុវត្ថិភាព ទាក់ទងនឹងការអនុវត្តការប្រមូលទិន្នន័យរបស់ TikTok និងទំនាក់ទំនងជាមួយសត្រូវបរទេស»។ តែយ៉ាងណា TikTok បានរុញច្រានការសម្រេចចិត្តរបស់តុលាការកំពូល ហើយបានធ្វើការឆ្លើយតបគំរាមកំហែងបកវិញក្នុងការបិទប្រតិបត្តិការអាមេរិក លុះត្រាតែរដ្ឋបាល Biden ធ្វើអន្តរាគមន៍។
គួរជម្រាបថា ការវិលត្រឡប់ទៅលើអ៊ីនធឺណិតសហរដ្ឋអាមេរិកវិញរបស់កម្មវិធី TikTok បន្ទាប់ពីប្រធានាធិបតីលោក Donald Trump បាននិយាយថាគាត់នឹងពន្យារពេលការអនុវត្តការហាមឃាត់នេះ។ លោកបានចុះហត្ថលេខា លើដីកាប្រតិបត្តិមួយនៅថ្ងៃដំបូងដែលលោកចូលកាន់តំណែងដើម្បីពន្យារពេលកំណត់នៃច្បាប់នេះបន្ថែមទៀត ៧៥ ថ្ងៃដល់ថ្ងៃទី ៥ ខែមេសា។ លោក Trump បាននិយាយនៅលើវេទិកា Truth Social របស់គាត់ថាគាត់ «ចង់ឱ្យសហរដ្ឋអាមេរិកមានកម្មសិទ្ធិ ៥០% ក្នុងការបណ្តាក់ទុនរួមគ្នា» ដើម្បី «រក្សាទុក TikTok, រក្សាវានៅក្នុងដៃឱ្យល្អ»៕ ផ្ដល់សិទ្ធិដោយ៖ Fresh News
