(ខាទុំ)៖ កាលពីថ្ងៃចន្ទ ទី១ ខែសីហា ក្រុមឧទ្ទាមនៅស៊ូដង់ បានឱ្យដឹងថា មនុស្សយ៉ាងហោច១០០០នាក់ បានបាត់បង់ជីវិត ក្នុងគ្រោះរអិលបាក់ដីដ៏អាក្រក់ ដែលបានលេបត្របាក់ភូមិមួយទាំងស្រុង នៅតំបន់ជួរភ្នំ Marra ភាគខាងលិចប្រទេសអាហ្រ្វិកមួយនេះ ដោយបន្សល់ទុកមនុស្សតែម្នាក់គត់ នៅរស់រានមានជីវិត។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ក្រុមឧទ្ទាម Sudan Liberation Movement/Army បាននិយាយថា ហេតុការណ៍ខាងលើ បានកើតឡើងកាលពីថ្ងៃទី៣១ ខែសីហា បន្ទាប់ពីភ្លៀងបានធ្លាក់ខ្លាំងជាច្រើនថ្ងៃជាប់គ្នា។ ក្រុមឧទ្ទាមនេះ ដែលគ្រប់គ្រងតំបន់ខាងលើ ស្ថិតក្នុងតំបន់ Durfur របស់ស៊ូដង់ បានដង្ហោយសុំឱ្យអង្គការសហប្រជាជាតិ ក៏ដូចជាទីភ្នាក់ងារមនុស្សធម៌ដទៃទៀត ជួយដល់កិច្ចប្រឹងប្រែងទាញយកសាកសពជនរងគ្រោះ ដែលរួមមានទាំងបុរស ស្រ្តី និងកុមារ។ បើតាមក្រុម Sudan Liberation Movement/Army ភូមិរងគ្រោះ ត្រូវបានបំផ្លាញទាំងស្រុង។

គួរបញ្ជាក់ថា ប្រជាជនស៊ូដង់ ដែលរត់គេចពីសង្រ្គាមស៉ីវិលរវាងកងទ័ពស៊ូដង់ និងកងកម្លាំងទាហានប៉ារ៉ា RSF នៅរដ្ឋ North Darfur បាននាំគ្នាជ្រកកោននៅតំបន់ជួរភ្នំ Marra បើទោះបីជាកន្លែងខ្វះខាតស្បៀងអាហារ និងថ្នាំពេទ្យក៏ដោយ។ សង្រ្គាមដែល​អូសបន្លាយប្រមាណ២ឆ្នាំមកនេះ បាននិងកំពុងធ្វើឱ្យប្រជាជន ប្រឈមមុខនឹងវិបត្តិទុរ្ភិក្សធ្ងន់ធ្ងរ ហើយពួកគេត្រូវបានបង្ខំឱ្យរត់ព្រាត់ប្រាស​ពីផ្ទះសម្បែងរបស់ខ្លួន ខណៈដែលរដ្ឋធានីនៃរដ្ឋ North Dafur គឺទីក្រុង Al-Fashir ស្ថិតក្រោមការបាញ់ផ្លោង៕ ផ្ដល់សិទ្ធិដោយ៖ Fresh News