(បន្ទាយមានជ័យ)៖ នៅវេលាម៉ោងប្រមាណ ១០៖៣០នាទីព្រឹក ថ្ងៃទី១៣ ខែវិច្ឆិកា ឆ្នាំ២០២៥នេះ ក្រុមអ្នកសង្កេតការណ៍អាស៊ាន AOT បានចុះទៅពិនិត្យផ្ទាល់នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ទីភូមិឋានរបស់ប្រជាពលរដ្ឋខ្មែរដែលរងនូវការបាញ់ប្រហារយ៉ាងសាហាវព្រៃផ្សៃ ពីសំណាក់ក្រុមទាហានដៃឆៅរបស់ថៃ កាលពីថ្ងៃទី១២ ខែវិច្ឆិកាម្សិលមិញ ដែលបណ្ដាលឲ្យពលរដ្ឋខ្មែរម្នាក់ស្លាប់ និងរងរបួសចំនួន៣នាក់។

អំឡុងពេលចុះទៅដល់ទីតាំងដែលរងនូវការបាញ់ប្រហារទាំងកម្រោលពីសំណាក់កងទ័ពថៃនោះ កងទ័ពកម្ពុជាដែលមិនប្រដាប់ដោយអាវុធ បានរៀបរាប់យ៉ាងលម្អិតអំពីហេតុការណ៍ដែលបានកើតឡើង ជូនដល់ក្រុមអ្នកសង្កេតការណ៍អាស៊ាន AOT។

កងទ័ពកម្ពុជាមិនប្រដាប់ដោយអាវុធ ដែលឈរជើងការពារនៅភូមិព្រៃចាន់ បានអះអាងថា កងទ័ពថៃបានញុះញង់អុចអាលរយៈពេលពីរថ្ងៃហើយ ពោលចាប់តាំងពីថ្ងៃទី១១ ខែវិច្ឆិកាមក តាមរយៈការស្រែកជេរមកកាន់កម្លាំងកម្ពុជា។ បើទោះបីស្រែកជេរអុចអាលយ៉ាងណាក៏ដោយ ក៏កងទ័ពកម្ពុជាបន្ដរក្សាការអត់ធ្មត់ក្នុងកម្រិតខ្ពស់បំផុត ហើយក៏មិនតបតអ្វីទាំងអស់។

រហូតដល់ថ្ងៃទី១២ ខែវិច្ឆិកា ឆ្នាំ២០២៥ បន្ទាប់ពីការអុចអាលតាមរយៈពាក្យសម្ដីមិនបានសម្រេចនោះ ក៏បាញ់ប្រហារមកលើប្រជាពលរដ្ឋដែលជាជនស៉ីវិលស្លូតត្រង់របស់កម្ពុជា និងទីតាំងឈរជើងរបស់កងកម្លាំងកម្ពុជាតែម្ដង។

កងកម្លាំងកម្ពុជាបានបញ្ជាក់ទៅកាន់ក្រុមអ្នកសង្កេតការណ៍អាស៊ាន AOT ទៀតថា ការបាញ់ប្រហារនៅថ្ងៃម្សិលមិញនេះ គឺមានចំនួន៣លើក ដោយលើកទី១ នៅរង្វង់ម៉ោងប្រមាណ ៣រសៀល លើកទី២ នៅរង្វង់ម៉ោងប្រមាណ ៤រសៀល និងលើកទី៣ នៅរង្វង់ម៉ោងជិត៦ល្ងាច។ ក្នុងនោះ ការបាញ់ប្រហារលើកទី១ បណ្ដាលឲ្យប្រជាពលរដ្ឋរងរបួសចំនួន៣នាក់ និងលើកទី២ បណ្ដាលឲ្យស្លាប់ម្នាក់ ខណៈលើកទី៣ មិនមានអ្នករងរបួសនោះទេ។

ខ្មាន់កាំភ្លើងដែលបើកការបាញ់ប្រហារលើជនស៉ីវិលស្លូតត្រង់របស់កម្ពុជា គឺជាទាហានប៉ារ៉ា និងឈរខាងក្រោយជាទាហានឈុតខ្មៅ ដោយប្រើប្រាស់កាំភ្លើងយន្ដបាញ់រះស្រោចមកលើភូមិឋានរបស់ប្រជាពលរដ្ឋតែម្ដង នៅក្នុង ភូមិព្រៃចាន់ ឃុំអូរបីជាន់ ស្រុកអូរជ្រៅ។

មូលហេតុដែលកងកម្លាំងកម្ពុជា ឃើញច្បាស់អំពីហេតុការណ៍នេះ ព្រោះថាទីតាំងឈរជើងរបស់កម្ពុជា ចម្ងាយប្រមាណ១០០ម៉ែត្រប៉ុណ្ណោះ ពីទីតាំងដែលទាហានថៃបាញ់ប្រហារ។ សរុបការបាញ់ប្រហារទាំង៣លើកនេះ ស្មើប្រមាណជាង១០០គ្រាប់។

ទន្ទឹមការបញ្ជាក់របស់កងកម្លាំងកម្ពុជា នៅទីតាំងកើតហេតុបានបន្សល់នូវស្លាកស្នាមធ្លុះជញ្ជាំងបន្ទប់ទឹក ធ្លុះដើមឈើ និងជញ្ជាំងផ្ទះរបស់ប្រជាពលរដ្ឋ។ ដោយឡែកទីតាំងដែលបាញ់បណ្ដាលឲ្យពលរដ្ឋកម្ពុជា ស្លាប់ភ្លាមៗនៅកន្លែងកើតហេតុនោះ គឺបានបន្សល់នូវស្នាមឈាមនៅលើដី និងនៅលើឫស្សីក្បែរគល់ស្វាយក្រោយផ្ទះរបស់គាត់ស្នាក់នៅ។

សូមជម្រាបថា មុនចុះទៅពិនិត្យស្ថានភាពនៅទីតាំងដែលទាហានថៃចិញ្ចឹមចិត្តឈ្លានពានដែនអធិបតេយ្យកម្ពុជា ក្រុមអ្នកសង្កេតការណ៍អាស៊ាន AOT ក៏បានចុះទៅពិនិត្យស្ថានភាពជនរងគ្រោះ ដែលត្រូវទាហានថៃបាញ់ប្រហារ ព្រមទាំងសាកសពអ្នកដែលបាត់បង់ជីវិតនៅមន្ទីរពេទ្យផងដែរ។

មកទល់ពេលនេះ ជនស៉ីវិលកម្ពុជាដែលរងគ្រោះទាំងបីនាក់នោះ បានទទួលការវះកាត់យកក្បាលគ្រាប់ចេញដោយជោគជ័យ និងកំពុងបន្ដទទួលការថែទាំយ៉ាងយកចិត្តទុកដាក់បំផុតពីក្រុមគ្រូពេទ្យជំនាញ នៅមន្ទីរពេទ្យខេត្តមិត្តភាពកម្ពុជា ជប៉ុន មង្គលបូរី។

ជនរងគ្រោះដែលរងរបួសទាំង៣នាក់៖

*ទី១៖ ឈ្មោះ នី សុម៉េង ភេទប្រុស អាយុ៣២ឆ្នាំ រស់នៅភូមិផ្សារកណ្ដាល ឃុំផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ ត្រូវត្រគៀកខាងស្ដាំធ្លុះពីក្រោយមកមុខ
*ទី២៖ ឈ្មោះ រិទ្ធ ចាន់ធា ភេទប្រុស អាយុ២៩ឆ្នាំ រស់នៅភូមិខ្លាកូនថ្មី សង្កាត់កំពង់ស្វាយ ក្រុងសិរីសោភ័ណ្ឌ ខេត្តបន្ទាយមានជ័យ (បាញ់ត្រូវភ្លៅស្តាំ)
*ទី៣៖ ឈ្មោះ សូ ចំរ៉ុង ភេទប្រុស អាយុ៣៨ឆ្នាំ រស់នៅភូមិតំណក់ទឹក ឃុំចន្ទគីរី ក្រុងប៉ោយប៉ែត ខេត្តបន្ទាយមានជ័យ ត្រូវពោះ។

ដោយឡែក អ្នកស្លាប់នៅកន្លែងកើតហេតុឈ្មោះ ឌី ណៃ ហៅ កុសល ត្រូវបានបញ្ជូនមកតម្កល់ធ្វើបុណ្យនៅវត្តចាន់ស៊ី ក្នុងស្រុកអូរជ្រៅ ខេត្តបន្ទាយមានជ័យ៕