កាលពីថ្ងៃអាទិត្យ ក្រុមហ៊ុនផលិតរថយន្ត Tesla បានប្រកាសថា ខ្លួននឹងចាប់ផ្តើមសាងសង់រោងចក្រអាគុយ Megapack ថ្មីក្នុង​ទីក្រុង​សៀងហៃ ដែលនឹងចាប់ផ្ដើមនៅចុងឆ្នាំនេះ។ វាគ្រោងនឹងបញ្ចប់នៅពាក់កណ្តាលឆមាសទី២ នៃឆ្នាំ២០២៤ ដោយនឹងអាចផលិតអាគុយ Megapack បានប្រមាណ ១០,០០០ គ្រឿង ជារៀងរាល់ឆ្នាំ។ អាគុយ Megapack នីមួយៗអាចផ្ទុកថាមពលបានគ្រប់គ្រាន់ ដើម្បីផ្តល់ថាមពលដល់ផ្ទះប្រហែល ៣,៦០០ ខ្នង ក្នុងរយៈពេលមួយម៉ោង។ Tesla បានប្រាប់ Bloomberg ថា ខ្លួនគ្រោងនឹងលក់អាគុយ Megapack ដែលខ្លួនផលិតនៅក្នុងប្រទេសចិនទូទាំងពិភពលោក។ ជម្រាបដែរថា ក្រុមហ៊ុនបានបង្កើតការដំឡើង Megapack នៅក្នុងទីតាំងមួយចំនួនជុំវិញពិភពលោក រួមទាំងរដ្ឋតិចសាស់ និងអូស្ត្រាលីខាងត្បូង។

សេចក្តីប្រកាសកាលពីថ្ងៃអាទិត្យបានបង្ហាញថា Tesla បង្កើនការពឹងផ្អែករបស់ខ្លួនលើប្រទេសចិន ខណៈដែលសហរដ្ឋអាមេរិកកំពុងប្រើគោលនយោបាយសេដ្ឋកិច្ច ដើម្បីជំរុញក្រុមហ៊ុនផលិតរថយន្ត និងក្រុមហ៊ុនផលិតផ្សេងទៀត ឱ្យផលិតផលិតផលរបស់ពួកគេបន្ថែមទៀតនៅក្នុងស្រុក។

នៅចុងខែមុន នាយកដ្ឋានរតនាគារបានចេញសេចក្តីណែនាំថ្មីៗ ដែលរៀបរាប់លម្អិតអំពីរថយន្តអគ្គិសនី ដែលមានលក្ខណៈគ្រប់គ្រាន់សម្រាប់ឥណទានពន្ធ ៧,៥០០ ដុល្លារ របស់ច្បាប់កាត់បន្ថយអតិផរណា។ នៅក្រោមច្បាប់ដែលបានធ្វើបច្ចុប្បន្នភាព នាយកដ្ឋានរដ្ឋបានចែងថា ក្រុមហ៊ុនត្រូវតែប្រើប្រាស់ប្រភពសារធាតុរ៉ែនៅក្នុងអាគុយរថយន្តរបស់ពួកគេពីសហរដ្ឋអាមេរិក និងដៃគូពាណិជ្ជកម្មដែលត្រូវបានអនុម័តផ្សេងទៀតសម្រាប់រថយន្ត ដើម្បីឱ្យមានលក្ខណៈគ្រប់គ្រាន់ក្នុងការទទួលបានឥណទានពន្ធនោះ។ ជាមួយគ្នានេះ រដ្ឋបាលលោក បៃដិន ថ្មីៗនេះបាននិយាយថា អ្នកទទួលមូលនិធិ CHIPS Act ក៏នឹងត្រូវចុះហត្ថលេខាលើកិច្ចព្រមព្រៀង ដែលត្រូវសន្យាថា ពួកគេនឹងមិនពង្រីកសមត្ថភាពផលិតកម្មនៅក្នុងប្រទេសចិនផងដែរ៕ ផ្តល់សិទ្ធិដោយ៖ ខ្មែរណូត