(ប៉ារីស)៖ ព្រឹត្តិការណ៍ប្រកួតកីឡាចម្រុះអូឡាំពិករដូវក្តៅ Olympics Game 2024 លើកទី៣៣ ដោយមាន ៣២ប្រភេទកីឡា ដែលរៀបចំនៅប្រទេសបារាំង ឆ្នាំ២០២៤ បានបិទបញ្ចប់ជាផ្លូវការហើយ ដោយក្រុមអត្តពលិកសហរដ្ឋអាមេរិក និងក្រុមចិន រកបានមេដាយមាសច្រើនជាងគេ ដល់ទៅ ៤០គ្រឿងស្មើគ្នា ខណៈក្រុមម្ចាស់ផ្ទះបារាំង រកបានត្រឹម ១៦គ្រឿងប៉ុណ្ណោះ ក្នុងកម្មវិធីកីឡាចម្រុះមានរយៈពេល ៤ឆ្នាំម្តងនេះ។

គិតត្រឹម ១០ប្រទេសក្នុងកំពូលតារាងមេដាយនៃព្រឹត្តិការណ៍ប្រកួតកីឡាចម្រុះអូឡាំពិករដូវក្តៅ ឆ្នាំ២០២៤ ក្រុមអត្តពលិកអាមេរិក រកបានមេដាយសរុបចំនួន ១២៦គ្រឿង មានមេដាយមាស ៤០គ្រឿង ប្រាក់៤៤ នឹងសំរឹទ្ធ៤២ ហើយក្រុមអត្តពលិកចិន ក៏យកបានមេដាយមាស ៤០គ្រឿង ប្រាក់ ២៧ និងសំរឹទ្ធ ២៤ សរុបរកបាន ៩១គ្រឿង។

ហើយក្រុមអត្តពលិកជប៉ូន ឈរលេខ៣ រកបានមេដាយសរុប ៤៥គ្រឿងមានមេដាយមាស ២០គ្រឿង ប្រាក់១២ នឹងសំរឹទ្ធ ១៣គ្រឿង ជាមួយក្រុមអូស្រ្តាលី រកបានមេដាយមាស ១៨គ្រឿង មានប្រាក់១៩ នឹងសំរឹទ្ទ១៦ សរុបរកបាន ៥៣គ្រឿង ហើយក្រុមអត្តពលិកហូឡង់ រកបានមេដាយសរុប ៣៤គ្រឿង, ក្រុមអត្តពលិកអង់គ្លេស រកបានសរុប ៦៥គ្រឿង, ក្រុមកូរ៉េខាងត្បូង រកបាន ៣២គ្រឿង, ក្រុមអ៉ីតាលី រកបានសរុប ៤០គ្រឿង និងក្រុមអល្លឺម៉ង់ រកបានសរុប ៣៣គ្រឿង។

រំលឹកផងថា នេះជាការបន្តកាន់កាប់កំពូលតារាងចំណាត់ថ្នាក់មេដាយអូឡាំពិក របស់ក្រុមអត្តពលិកសហរដ្ឋអាមេរិក គិតចាប់តាំងពីឆ្នាំ២០០៨ នៅទីក្រុងប៉េកាំង ដែលក្នុងរយៈពេលការរៀបចំ ៤លើកមកនេះ ក្រុមអាមេរិកជាក្រុមរកបានមេដាយច្រើនជាងគេ ដោយនៅឆ្នាំ២០១២ រកបានសរុប ១០៤គ្រឿង, ឆ្នាំ២០១៦ រកបានសរុប ១២១គ្រឿង, ឆ្នាំ២០២០ រកបាន ១១៣គ្រឿង និងឆ្នាំ២០២៤ រកបានសរុបដល់ទៅ ១២៦គ្រឿង។

ដោយគិតមកដល់ព្រឹត្តិការណ៍ប្រកួតកីឡាចម្រុះអូឡាំពិករដូវក្តៅ Olympics Game 2024 លើកទី៣៣ នេះ សហរដ្ឋអាមេរិក រកបានមេដាយពីចូលរួមកីឡាចម្រុះនេះ សរុបចំនួន ២៧៥៥គ្រឿង ដោយក្នុងនោះមានមេដាយមាស ១១០១គ្រឿង ខណៈអាមេរិក នឹងបន្តរៀបចំការព្រឹត្តិការណ៍កីឡាចម្រុះអូឡាំពិករដូវក្តៅ នៅឆ្នាំ២០២៨ នៅរដ្ឋ Los Angeles៕ ផ្ដល់សិទ្ធិដោយ៖ Fresh News