(ភ្នំពេញ)៖ តារាងចម្រៀងរ៉េបដ៏ល្បីរបស់កម្ពុជា ម៉ាន់ វណ្ណដា (Vann Da) នៅព្រឹកថ្ងៃទីពុធ ទី១៤ ខែសីហា ឆ្នាំ២០២៤ បានវិលត្រលប់មកដល់ទឹកដីកម្ពុជា វិញហើយ ដោយមានការទទួលស្វាគមន៍ពីលោកបណ្ឌិតទេសរដ្ឋមន្ដ្រី ថោង ខុន ប្រធានគណៈកម្មាធិការជាតិអូឡាំពិកកម្ពុជា (NOCC) នឹងលោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) ផងដែរ ។

កំពូលតារាចម្រៀង រ៉េបល្បីឈ្មោះរបស់កម្ពុជា លោក វណ្ណដា បានធ្វើឲ្យប្រជាជនខ្មែរមានមោទនភាពជាខ្លាំង តាមរយៈការចូលរួមច្រៀងបិទព្រឹត្តិការណ៍កីឡាអូឡាំពិក Paris Olympics Games 2024 កម្រិតពិភពលោកដែលប្រារព្ធធ្វើឡើងនៅទីក្រុងបារីស ប្រទេសបារាំង ។

នេះអាចនិយាយបានថា វណ្ណដា ជាតារាចម្រៀងខ្មែរលើកដំបូងហើយ ដែលមានវត្តមានក្នុងកម្មវិធីដ៏ធំ និងអស្ចារ្យបែបនេះ។ តាមរយៈការចូលរួមនេះ វណ្ណដា បាននាំយកចម្រៀងដ៏ល្បីរបស់ខ្លួន ចំណងជើងថា «Time To Rise» មកបកស្រាយ អមជាមួយការរៀបចំខ្លួនដ៏ល្អឥតខ្ចោះ បង្ហាញពីអត្តសញ្ញាណខ្មែរ ឲ្យពិភពលោកបានស្គាល់កាន់តែច្បាស់។

គួរជម្រាបថា នេះជាប្រវត្តិសាស្ត្រហើ ដែលសិល្បករខ្មែរ តារាចម្រៀងរ៉េប វណ្ណដា បានចូលរួមសម្តែង ក្នុងព្រឹត្តិការណ៍បិទកីឡាអូឡាំពិក ឆ្នាំ២០២៤ នៅទីក្រុងប៉ារីស ប្រទេសបារាំងនេះ ៕ ផ្ដល់សិទ្ធិដោយ៖ Fresh News