(បរទេស)៖​ ក្រុមហ៊ុនបច្ចេកវិទ្យាយក្ស Apple ត្រូវបានគេរាយការណ៍ថា កំពុងអភិវឌ្ឍន៍ឧបករណ៍មនុស្សយន្តនៅលើតុ (tabletop robot device) ដែលត្រូវបានគេរំពឹងថានឹងចេញលក់នៅប្រហែលឆ្នាំ២០២៦ ឬ ២០២៧ ជាមួយនឹងតម្លៃប៉ាន់ស្មានប្រហែល ១,០០០ដុល្លារ។ ឧបករណ៍នេះមានអេក្រង់បង្ហាញបែប iPad ភ្ជាប់ទៅនឹងដៃមនុស្សយន្ត ដែលអាចបង្វិលបាន 360 ដឺក្រេ និងផ្អៀងឡើងលើចុះក្រោម។ នេះបើយោងតាមការចេញផ្សាយដោយ GSMArena នៅថ្ងៃទី១៥ ខែសីហា ឆ្នាំ២០២៤។

ប្រភពពីលោក Mark Gurman មកពី Bloomberg បានឱ្យដឹងថា tabletop robot device ឬ មនុស្សយន្តថេប្លេតរបស់ក្រុមហ៊ុន Apple ត្រូវបានរចនាឡើងដើម្បីដំណើរការជាមជ្ឈមណ្ឌលគ្រប់គ្រងផ្ទះឆ្លាតវៃ (smart home device), ឧបករណ៍សន្និសីទវីដេអូ (video conferencing tool) និងតួនាទីតាមដានសុវត្ថិភាពផ្ទះ (home security monitor)។ ជាងនេះទៅទៀត វាត្រូវបានរួមបញ្ចូលមុខងារដើម្បីឆ្លើយតបទៅនឹងការបញ្ជាដោយសំឡេងតាមរយៈ Siri ហើយនឹងប្រើប្រាស់កំណែ iPadOS ផ្ទាល់ខ្លួន។ ប្រភពដដែល បានគូសបញ្ជាក់ថា ឧបករណ៍នេះ នឹងចេញមកជាមួយនឹងមុខងារបញ្ញាសិប្បនិមិត្ត AI (Apple Intelligence) របស់ Apple ផងដែរ។

គួរជម្រាបដែរថា គម្រោងនេះ ត្រូវបានដឹកនាំដោយលោក Kevin Lynch​ ដែលជានាយកប្រតិបត្តិទទួលបន្ទុកគម្រោងផលិតរថយន្ត Apple ដែលមានឈ្មោះថា Project Titan ខណៈបច្ចុប្បន្ននេះ បានបោះបង់ចោលការផលិតទៅហើយ។ អ្នកវិភាគមួយចំនួនបានបង្ហាញថា ការងាកទៅផលិតឧបករណ៍មនុស្សយន្ត គឺជាយុទ្ធសាស្រ្តថ្មីរបស់ក្រុមហ៊ុន Apple ក្នុងការស្វែងរកទីផ្សារ និងបច្ចេកវិទ្យាថ្មីៗ ព្រមទាំងរកទីតាំងឈរនៅក្នុងទិដ្ឋភាពថ្មី ដូចក្រុមហ៊ុនបច្ចេកវិទ្យាយក្សដទៃទៀត៕ ផ្ដល់សិទ្ធិដោយ៖ Fresh News