(សៀមរាប)៖ ការជួយយកអាសាគ្នាក្នុងគ្រាលំបាក ជាវប្បធម៌ដែលបានចាក់ឫសយ៉ាង​ជ្រៅក្នុងបេះដូងខ្មែរ។ សង្គ្រាមកើតពីការឈ្លានពានរបស់កងទ័ពថៃចាប់ពីថ្ងៃទី២៤ ដល់​​ថ្ងៃទី២៨ ខែកក្កដា ឆ្នាំ២០២៥ បានបង្ខំឱ្យពលរដ្ឋខ្មែរជិត២០ម៉ឺននាក់ ចាកចេញ​ពីផ្ទះសម្បែងរបស់ពួកគេ ទៅរកកន្លែងសុវត្ថិភាពរៀបចំដោយអាជ្ញាធរ។

ផ្សាររាត្រីផ្លូវ៦០ម៉ែត្រ ស្ថិតនៅក្នុងក្រុងសៀមរាប ខេត្តសៀមរាប ជាទីតាំង​មួយក្នុង​ចំណោមទីតាំងជាច្រើនទៀត ​ដែល​អាជ្ញា​​ធរ បានរៀបចំឱ្យជនភៀស​សឹក​ស្នាក់​អា​ស្រ័យកំលុងពេលសង្គ្រាមឈ្លានពីសំណាក់កងទ័ពថៃ។ ផ្សាររាត្រីជាទីតាំងឯកជន​គ្រប់​គ្រងដោយលោក ទិន ការវិវឌ្ឍន៍ និងលោក ឡុង សត្យា។

ផ្សារនេះមានជនភៀសសឹកសរុប ៨៣០នាក់ ដែលក្នុងនោះមានចាស់ជរា និង​ក្មេងៗ​ផងដែរ។ ទីតាំងនេះ បានបើកទទួលជនភៀសសឹកចូលមកស្នាក់នៅចាប់ពីថ្ងៃទី២៦ ខែកក្កដា រហូតដល់ថ្ងៃទី១០ ខែសីហា។ ក្នុងកំលុងពេលស្នាក់នៅទីតាំងនេះ ជន​ភៀស​​សឹកទទួលបានការយកចិត្តទុកដាក់ខ្ពស់ពីសំណាក់អាជ្ញាធរ និង​គណៈកម្មការ​គ្រប់គ្រងផ្សារ ក៏ដូចជាសប្បុរសជននានា។

នៅទីតាំងនេះ មានការផ្តល់ទឹកស្អាត អគ្គិសនី និងបន្ទប់អនាម័យ ដោយមិនមាន​គិត​ថ្លៃ​អ្វីទាំងអស់។ បន្ថែមពីលើនោះ អាជ្ញាធរ និងគណៈកម្មការគ្រប់គ្រងផ្សារ បានកៀរគរ​សប្បុរសជននាំយកស្បៀងអាហារ និងអំណោយផ្សេងចែកជូនជាបន្តបន្ទាប់ផងដែរ ដើម្បី​ដោះស្រាយការលំបាករបស់ពួកគាត់។

ក្រៅពីផ្តល់កិច្ចគាំពារក្នុងកំលុងពេលស្នាក់នៅរយៈពេលប្រមាណកន្លះខែហើយនោះ នៅថ្ងៃទី១០ ខែសីហា ថ្ងៃត្រឡប់ទៅលំនៅឋានវិញនោះ លោស្រី ម៉ៅ សុខឃាង អភិ​បាល​រងក្រុងសៀមរាប និងលោកស្រី ឆៃ ច័ន្ទរិទ្ធីសូលីដា រដ្ឋលេខាធិការក្រសួងព័ត៌​មាន និងជាប្រធានក្រុមការងាររៀបចំអង្គការចាត់តាំងយុវជន​គណបក្សប្រជាជន​កម្ពុជា​​នៅសហរដ្ឋអាមេរិក​ ប្រចាំតំបន់ឆ្នេរខាង​លិច ទទួលបន្ទុករដ្ឋអារីហ្សូណា និង​ក្រុម​ការងារ ព្រមទាំងលោក ទិន ការវិវឌ្ឍន៍ និងលោក ឡុង សត្យា ក៏ដូចជា​សប្បុ​រស​ជននានា បានរួមគ្នារៀបចំពិធីជូនដំណើរប្រជាពលរដ្ឋភៀសសឹក ដោយរៀបចំពិធី​ពិសា​​នំបញ្ចុក នំប័ុងសម្លរគីរីសាច់មាន់ និងបាញ់ហយផងដែរ។

ការរៀបចំនេះ បានស្តែងឱ្យឃើញនូវមនោសញ្ចេតនា ការស្រឡាញ់ ការជួយយក​អា​សា​គ្នារវាងគ្រួសារខ្មែរក្នុងពេលជួបអាសន្ន ហើយក៏ជាការផ្តល់នូវភាពកក់ក្តៅដល់ជន​ភៀស​សឹក ក៏ដូចជាការអបអរនូវសុខសន្តិភាពសម្រាប់ប្រជាជាតិកម្ពុជា ក្រោមកិច្ច​ប្រឹង​ប្រែងរបស់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងសម្តេចមហា​បវរ​ធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

សូមបញ្ជាក់ផងដែរថា ក្នុងកំលុងពេលស្នាក់នៅបណ្តោះអាសន្ននៅផ្សាររាត្រីនេះ មានជនភៀសសឹកមួយគូ បានចាប់ប្រតិព័ទ្ធបង្កើតបាននូវមនោសញ្ចេតនាស្នេហារវាង​គ្នា​ផងដែរ។ ជនភៀសសឹកជួបស្នេហ៍នេះ ខាងប្រុសមានឈ្មោះ ផេង ផា អាយុ ៤៩ឆ្នាំ មានស្រុកំណើតនៅស្រុកជាំក្សាន្ត ខេត្តព្រះវិហារ ហើយខាងស្រី មានឈ្មោះ ហួរ សៀង​ណាន អាយុ ៣៧ឆ្នាំ មានស្រុកកំណើតនៅក្រុងប៉ោយប៉ែត ខេត្តបន្ទាយ​មានជ័យ។

ដោយឃើញការស្រឡាញ់ប្រតិព័ទ្ធរបស់ជនភៀសសឹកមួយគូនេះ នៅល្ងាចថ្ងៃទី៩ ខែសីហា ឆ្នាំ២០២៥ អាជ្ញាធរ ក៏ដូចជាគណៈកម្មការផ្សាររាត្រី បានរៀបចំពិធីសែន​ព្រេន​ជូន​ពួកគាត់យកគ្នាជាគូរមុនត្រឡប់ទៅលំនៅឋានវិញផងដែរ៕